ខេត្តពោធិ៍សាត់ ៖ ថ្ងៃទី០២ ខែតុលា ឆ្នាំ២០២៦ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តពោធិ៍សាត់ រួមជាមួយលោក ខូយ រីដា អភិបាល នៃគណៈអភិបាលខេត្តពោធិ៍សាត់ បានអញ្ជើញជាអធិបតី ក្នុងពិធីជួបសំណេះសំណាល និងសួរសុខទុក្ខជាមួយកងកម្លាំងប្រដាប់អាវុធទាំងបីប្រភេទ សរុបចំនួន ៩០៦នាក់ ដែលជាអង្គភាពសម្ព័ន្ធមេត្រីភាពជាមួយក្រសួងរ៉ែ និងថាមពល។
ពិធីនេះបានប្រារព្ធធ្វើឡើងនៅសាលប្រជុំទេពឧញ៉ា ឃ្លាំង មឿង សាលាខេត្តពោធិ៍សាត់ ដោយមានការចូលរួមពីលោក លោកស្រី អភិបាលរងខេត្ត លោក មេបញ្ជាការ កងកម្លាំងប្រដាប់អាវុធទាំងបីអង្គភាព រួមមាន៖ ស្នងការដ្ឋាននគរបាលខេត្ត, បញ្ជាការដ្ឋានកងរាជអាវុធហត្ថខេត្ត និងតំបន់ប្រតិបត្តិការសឹករងពោធិ៍សាត់ ព្រមទាំងមន្ត្រីរាជការ ដែលពាក់ព័ន្ធជាច្រើនរូបទៀត ។
ពិធីជួបសំណេះសំណាលនេះ ធ្វើឡើងក្នុងគោលបំណង ដើម្បីសម្តែងនូវការគិតគូរ យកចិត្តទុកដាក់ និងពង្រឹងចំណងសម្ព័ន្ធមេត្រីភាពឱ្យកាន់តែជិតស្និទ្ធ រវាងក្រសួងរ៉ែ និងថាមពល ជាមួយកងកម្លាំងប្រដាប់អាវុធក្នុងខេត្តពោធិ៍សាត់ ព្រមទាំងជាការលើកទឹកចិត្តដល់កងកម្លាំង ដែលបានខិតខំបំពេញភារកិច្ចបម្រើជាតិ និងប្រជាជននាពេលកន្លងមក ។
មានប្រសាសន៍នាឱកាសនោះ ឯកឧត្តម កែវ រតនៈ បានលើកឡើងថា ក្នុងឱកាសដែលរដូវកាលបុណ្យកាន់បិណ្ឌ និងភ្ជុំបិណ្ឌ ដែលជាពិធីបុណ្យប្រពៃណីជាតិដ៏ធំរបស់ខ្មែរយើងបានចូលមកដល់ ក្រសួងតែងតែនឹកគិត និងមិនដែលមើលរំលងពីសុខទុក្ខរបស់បងប្អូនកងកម្លាំងឡើយ។ ឯកឧត្តមបានបញ្ជាក់យ៉ាងច្បាស់ពីទឹកចិត្តស្រឡាញ់ រាប់អាន និងការដឹងគុណយ៉ាងជ្រាលជ្រៅចំពោះកងកម្លាំងប្រដាប់អាវុធទាំងអស់ ដែលបាននិងកំពុងលះបង់កម្លាំងកាយចិត្ត ក្នុងការខិតខំការពារសន្តិសុខ សុវត្ថិភាព សណ្ដាប់ធ្នាប់សាធារណៈជូនប្រជាពលរដ្ឋ ជាពិសេសគឺការឈរជើងយ៉ាងរឹងមាំក្នុងការការពារបូរណភាពទឹកដី និងអធិបតេយ្យភាពជាតិ ។
ទន្ទឹមនឹងនេះ ឯកឧត្តមរដ្ឋមន្ត្រី ក៏បានពាំនាំនូវការផ្តាំផ្ញើសួរសុខទុក្ខ និងពរជ័យសិរីសួស្តីពីសំណាក់ថ្នាក់ដឹកនាំកំពូល នៃរាជរដ្ឋាភិបាល ជូនដល់កងកម្លាំងប្រដាប់អាវុធទាំងអស់ និងគ្រួសារ សូមឲ្យមានសុខភាពល្អបរិបូរណ៍ កម្លាំងមាំមួន និងទទួលបានជោគជ័យគ្រប់ភារកិច្ច ។
ដើម្បីជាការលើកទឹកចិត្ត និងចូលរួមអបអរសាទរក្នុងឱកាសបុណ្យភ្ជុំបិណ្ឌ ឯកឧត្តម កែវ រតនៈ និងលោក ខូយ រីដា បានឧបត្ថម្ភអំណោយ និងថវិកាដល់កងកម្លាំងប្រដាប់អាវុធទាំង ៩០៦នាក់ ដោយក្នុងម្នាក់ៗទទួលបានអង្ករ ២០ គីឡូក្រាម ទឹកស៊ីអ៊ីវ ០១ យួរ ទឹកត្រី ០១ យួរ មី ០១ កែស ថវិកាចំនួន ១០ ម៉ឺនរៀល។ ដោយឡែក សម្រាប់អង្គភាពទាំងបី (ស្នងការដ្ឋាននគរបាលខេត្ត, បញ្ជាការដ្ឋានកងរាជអាវុធហត្ថខេត និងតំបន់ប្រតិបត្តិការសឹករងខេត្ត) ក្នុងមួយអង្គភាពៗទទួលបានថវិកាឧបត្ថម្ភបន្ថែមចំនួន ០៤ លានរៀល ផងដែរ ៕
ចែករំលែកព័តមាននេះ