ផ្លូវខ្នងទំនប់ត្នោតទេរ ប្រវែងជិត ៣គីឡូម៉ែត្រ កំពុងត្រូវបានស្ថាបនាឡើងវិញ
- តាកែវ
ខេត្តតាកែវ ៖ ដោយមានការយកចិត្តទុកដាក់លើសុវត្ថិភាព សុខុមាលភាព និងការសម្រួលដល់ការធ្វើដំណើររបស់បងប្អូនប្រជាពលរដ្ឋ លោក វ៉ី សំណាង អភិបាល នៃគណៈអភិបាលខេត្តតាកែវ បានដឹកនាំប្រតិភូរដ្ឋបាលខេត្ត និងអាជ្ញាធរពាក់ព័ន្ធ ចុះពិនិត្យដោយផ្ទាល់នូវសកម្មភាពជួសជុលបន្ទាន់លើកំណាត់ផ្លូវខ្នងទំនប់ត្នោតទេរ ដែលបានរងការខូចខាត និងបង្កការលំបាកដល់ការប្រកបរបរចិញ្ចឹមជីវិត ក៏ដូចជាការធ្វើចរាចរណ៍ប្រចាំថ្ងៃរបស់ប្រជាពលរដ្ឋក្នុងមូលដ្ឋាន ។
ពាក់ព័ន្ធនឹងការងារជួសជុលស្តារឡើងវិញនេះ លោក អភិបាលខេត្តតាកែវ បានធ្វើការស្នើសុំកិច្ចអន្តរាគមន៍ និងការគាំទ្រដោយ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ដើម្បីចាត់ចែងកម្លាំងបច្ចេកទេស និងកៀងគរថវិកាសម្រាប់ការជួសជុលបន្ទាន់នេះឱ្យបានទាន់ពេលវេលា ។
ឆ្លើយតបនឹងសំណើអន្តរាគមន៍នេះ មន្ទីរសាធារណការ និងដឹកជញ្ជូនខេត្តតាកែវ បាននិងកំពុងដឹកនាំក្រុមការងារបច្ចេកទេស ចុះអនុវត្តសកម្មភាពជួសជុលផ្លូវខ្នងទំនប់ត្នោតទេរ ស្ថិតក្នុងឃុំទ្រា ស្រុកសំរោង ខេត្តតាកែវ យ៉ាងសស្រាក់សស្រាំ ដោយធ្វើការក្រាលដីល្បាយថ្ម កៀកិន និងបង្ហាប់យ៉ាងយកចិត្តទុកដាក់ ទៅតាមបទដ្ឋានបច្ចេកទេស។
តាមការឱ្យដឹងពីលោក ណុប នី ប្រធានមន្ទីរសារធារណៈការ និងដឹកជញ្ជូនខេត្តតាកែវ បានឱ្យដឹងថា គម្រោងផ្លូវជួសជុលបន្ទាន់នេះ មានប្រវែងសរុប ២,៩៣០ ម៉ែត្រ (ជិត ៣ គីឡូម៉ែត្រ) មានទទឹងផ្លូវប្រវែង ៦ ម៉ែត្រ និងកម្រាស់ល្បាយថ្មីចាក់លើតួផ្លូវបន្ថែម ០,១៥ ម៉ែត្រ ។
លោកណុប នី ប្រធានមន្ទីរសាធារណការនឹងដឹកជញ្ជូនខេត្ត បានបញ្ជាក់ថា តាមការណែនាំរបស់អភិបាលខេត្ត គម្រោងជួសជុលបន្ទាន់នេះ ត្រូវបានកំណត់ឱ្យបញ្ចប់ជាស្ថាពរយ៉ាងយូរត្រឹម ថ្ងៃទី០៥ ខែតុលា ខាងមុខនេះ ដើម្បីឱ្យទាន់ពេលវេលាសម្រាប់ដាក់ឱ្យប្រជាពលរដ្ឋបានធ្វើដំណើរប្រកបដោយភាពងាយស្រួល ធានាសុវត្ថិភាព និងប្រកបអាជីវកម្មផ្សេងៗ ជាពិសេសគឺកាត់បន្ថយការកកស្ទះចរាចរណ៍ក្នុងអំឡុងពេលពិធីបុណ្យភ្ជុំបិណ្ឌ ដែលជាបុណ្យប្រពៃណីជាតិដ៏ធំមួយរបស់ប្រជាជនកម្ពុជា។
លោក វ៉ី សំណាង បានសម្តែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមការងារបច្ចេក ទេសនៃមន្ទីរសាធារណការ និងដឹកជញ្ជូនខេត្ត ដែលបានខិតខំបំពេញភារកិច្ចទាំងយប់ទាំងថ្ងៃ ៕
ចែករំលែកព័តមាននេះ