បុរសចំណាស់ម្នាក់វង្វេងស្មារតីដើរចេញពីផ្ទះរយៈពេល១យប់១ថ្ងៃហើយ ក្រុមគ្រួសាររកមិនទាន់ឃើញ
- ប៉ៃលិន
ខេត្តប៉ៃលិន ៖ រហូតមកដល់វេលាម៉ោង៣ និង៣០នាទីរសៀលនេះថ្ងៃទី០២ តុលា នេះទៅហើយ បុរសវ័យចំណាស់ម្នាក់អាយុជាង៧០ឆ្នាំ ដែលបានដើរវង្វេងចេញពីផ្ទះរបស់ខ្លួន បាត់មិនទាន់រកឃើញនៅឡើយទេ ខណៈដែលក្រុមគ្រួសារកំពុងតែម្នីម្នាដើររកទាំងមានការព្រួយបារម្ភពីសុវត្ថិភាពយ៉ាងខ្លាំង ។
ហេតុការណ៍គាត់ដើរវង្វេងបាត់ពីផ្ទះនេះ បានកើតឡើងកាលពីវេលាល្ងាចថ្ងៃទី០១ ខែតុលា ឆ្នាំ២០២៦ ស្ថិតនៅក្នុងភូមិពេជ្រគីរី សង្កាត់ប៉ៃលិន ក្រុងប៉ៃលិន ខេត្តប៉ៃលិន ។ ប្រភពព័ត៌មានពីស្ត្រីម្នាក់ ឈ្មោះ សូម ផារុន ត្រូវជាភរិយាបុរសវ័យចំណាស់ខាងលើ បានរៀបរាប់ឱ្យដឹងថា បុរសដែលត្រូវជាស្វាមីរបស់គាត់ បានដើរវង្វេងចេញពីផ្ទះ មានឈ្មោះ ឡុង ធី អាយុជាង៧០ឆ្នាំ រស់នៅក្នុងភូមិសង្កាត់ខាងលើ ដោយកាលពីល្ងាចថ្ងៃកើតហេតុ គាត់មានការរវល់ធ្វើដំណើរទៅប្រជុំនៅក្រុងប៉ៃលិន លុះពេលត្រឡប់មកវិញ ស្រាប់តែបាត់ប្តីមិនឃើញនៅនឹងផ្ទះដូចសព្វមួយដងឡើយ ។
គាត់បន្តទៀតថា គ្រាន់តែទទួលដំណឹងថា បាត់ប្តីនេះភ្លាម គាត់ក៏ប្រញាប់ខ្នះខ្នែងដើរស្វែងរកគ្រប់ច្រកល្ហក ពីផ្ទះមួយទៅផ្ទះមួយ រហូតដល់ធ្វើដំណើរទៅរកដល់ទីរួមក្រុងប៉ៃលិន តែនៅមិនអាចរកប្តីរបស់គាត់ឃើញនៅឡើយទេ មិនដឹងជាគាត់ចូលទៅសំងំនៅទីណាឡើយ ។
គាត់បញ្ជាក់ទៀតថា អ្នកភូមិក៏បានបង្ហើបប្រាប់គាត់ដែរថា កាលពីយប់ថ្ងៃទី០១ ខែតុលា គេបានប្រទះឃើញប្តីរបស់គាត់ដើរចុះឡើងៗនៅតាមផ្លូវក្រុងប៉ៃលិន ហើយដោយមិនចាប់អារម្មណ៍ គាត់ក៏បន្តដើរទៅកន្លែងផ្សេងទៀតបាត់តែម្តង ។
ស្ត្រីខាងលើក៏បានប្រកាសស្រាវជ្រាវរកតាមបណ្តាញសង្គមហ្វេសប៊ុកដែរ ដោយប្រាប់ថា គាត់បានបាត់សមាជិកគ្រួសារ ឈ្មោះ ឡុង ធី ដែលបានវង្វេងចេញពីផ្ទះកាលពីថ្ងៃ០១ ខែតុលា ឆ្នាំ២០២៦ បើសិនជាបងប្អូនណាបានឃើញរូបគាត់ សូមមេត្តាជួយឃាត់បុរសខាងលើទុកផង ហើយអាចទាក់ទងតាមលេខទូរស័ព្ទ ០៩៧៥៤៣០១០៨ ។
ស្ត្រីជាប្រពន្ធបានបន្ថែមទៀតថា គាត់ពិតជាមានការព្រួយបារម្ភចំពោះប្តីរបស់ខ្លួនខ្លាំងណាស់ ដោយកាលពីមុនគាត់ក៏ធ្លាប់វង្វេងដើរចេញពីផ្ទះញយដងដែរ តែពេលគាត់ដឹងខ្លួនក៏ដើរត្រឡប់មកវិញ ។ ជួនកាលទៀត គាត់ក៏ឱ្យកូន ឬអ្នកជិតខាងជួយដឹកត្រឡប់មកផ្ទះវិញដែរ ។
តែពេលនេះ ហាក់ដូចជាបាត់ដំណឹងឈឹង រហូតមកដល់ពេលនេះហើយ មិនទាន់ដំណឹងនៅឡើយទេ ដោយគាត់ក៏បានស៊ើបសួរបន្តទៀតទៅតាមអ្នកដែលធ្លាប់ស្គាល់នៅតាមភូមិនានាផងដែរ ។
ចែករំលែកព័តមាននេះ