ទីក្រុងប៉េកាំង៖ មន្ត្រីរដ្ឋាភិបាលអាមេរិកជឿជាក់ថាយោធាចិនទំនងជាមិនទាន់វាយប្រហារកោះតៃវ៉ាន់មុនឆ្នាំ២០២៨ទេទោះបីប្រធានាធិបតីចិន លោកស៊ីជីនពីង បន្តណែនាំឱ្យកងទ័ពត្រៀមខ្លួនឱ្យបានរួចរាល់ត្រឹមឆ្នាំ២០២៧យ៉ាងណាក្ដី។ នៅក្នុងចំណោមហេតុផលជាច្រើននៃការមិនទាន់វាយប្រហារនោះរួមមានការមិនទាន់ត្រៀមខ្លួនរួចរាល់នៃកងទ័ព ខណៈដែលបក្សកុម្មុយនិស្តចិនកំពុងបន្តបោសសម្អាតអំពើពុករលួយដូចភ្លៀងរលឹម និងការរង់ចាំអ៊ុតលទ្ធផលនៃការបោះឆ្នោតនៅតៃវ៉ាន់នៅក្នុងឆ្នាំ២០២៨។
មន្ត្រីរដ្ឋាភិបាលចិនសង្ឃឹមថាគណបក្សដែលមានទំនោរទៅរកទីក្រុងប៉េកាំងអាចនឹងឈ្នះឆ្នោត។ បើដូច្នេះមែន ចិនមិនចាំបាច់ហត់ប្រើកម្លាំងយោធាដើម្បីវាយប្រហារទេ។ នេះបើយោងតាមការប្រមើលមើលរបស់មន្ត្រីរដ្ឋាភិបាលអាមេរិក២នាក់។ ប្រសិនបើលទ្ធផលឆ្នោតបង្ហាញថាគណបក្សប្រជាធិបតេយ្យចម្រើនដែលកំពុងដឹកនាំប្រទេសសព្វថ្ងៃ និងដែលមាននិន្នាការប្រឆាំងទីក្រុងប៉េកាំងបន្តជាប់ឆ្នោតនៅអាណត្តិទីបួនទៀត ពេលនោះចិននឹងត្រៀមខ្លួនកាន់តែខ្លាំងដើម្បីប្រើប្រាស់កម្លាំងយោធា។
មន្ត្រីរដ្ឋាភិបាលអាមេរិកម្នាក់ដែលស្នើសុំមិនបញ្ចេញឈ្មោះថ្លែងថាប្រសិនបើរឿងនេះកើតឡើងមែន លោកគិតថាឆ្នាំ២០២៨នឹងក្លាយជាឆ្នាំដ៏តានតឹង។ លោកឡៃឈីតឹដែលដឹកនាំកោះតៃវ៉ាន់រយៈពេល២ឆ្នាំមកហើយ ហើយគណបក្ស DPP របស់លោកនៅតែប្រកាន់ខ្ជាប់ជំហរមិនចូលទៅខាងចិនទេ ជាហេតុធ្វើឱ្យរដ្ឋាភិបាលទីក្រុងប៉េកាំងមានកំហឹងយ៉ាងខ្លាំង។ ចំណុចដែលចិនមិនសប្បាយចិត្តនៅត្រង់ថាតៃវ៉ាន់ថ្លែងថាមានតែប្រជាជនតៃវ៉ាន់ប៉ុណ្ណោះមានសិទ្ធិសម្រេចជោគវាសនារបស់ខ្លួនដោយខ្លួនឯង។
ការវាយតម្លៃអំពីគម្រោងវាយប្រហារតៃវ៉ាន់ដែលមន្ត្រីរដ្ឋាភិបាលអាមេរិកទស្សន៍ទាយដូចខាងលើនេះជាការធ្វើបច្ចុប្បន្នភាពដ៏សំខាន់មួយដើម្បីស្វែងយល់ថាលោកស៊ីជីនពីងចង់ឱ្យកងទ័ពត្រៀមលក្ខណៈឱ្យបានរួចរាល់ត្រឹមឆ្នាំ២០២៧។ នៅក្នុងការថ្លែងសុន្ទរកថានៅសប្ដាហ៍នេះ លោកស៊ីជីនពីងបាននិយាយរំលឹកអំពីកោះតៃវ៉ាន់ និងលើកឡើងអំពីការលើកកម្ពស់ការអភិវឌ្ឍជាតិដោយសន្តិវិធីនៅក្នុងទំនាក់ទំនងចិន និងតៃវ៉ាន់។
អ្នកវិភាគយល់ថាឆ្នាំ២០២៧ជាឆ្នាំដែលកងទ័ពចិនត្រូវត្រៀមលក្ខណៈសម្បត្តិ មិនមែនជាឆ្នាំដែលចិនវាយប្រហារកោះតៃវ៉ាន់នោះទេ។ ប៉ុន្តែវាបានបង្កជាភាពជ្រួលច្របល់នៅក្នុងចំណោមរដ្ឋាភិបាលអាមេរិកដែលចង់ទប់ទល់នឹងឥទ្ធិពលរបស់ចិននៅឥណ្ឌូ-ប៉ាស៊ីហ្វិច។ ភ្នាក់ងារសម្ងាត់អាមេរិកធ្លាប់ឱ្យតម្រុយថាចិនត្រៀមវាយប្រហារតៃវ៉ាន់។ ពួកគេសរសេររៀបរាប់នៅក្នុងរបាយការណ៍វាយតម្លៃប្រចាំឆ្នាំថាប្រទេសចិនមិនទាន់មានផែនការវាយតៃវ៉ាន់នៅឆ្នាំក្រោយទេ ហើយចិនព្យាយាមគ្រប់គ្រងកោះនេះដោយវិធីមិនប្រើប្រាស់កម្លាំងទ័ពប្រសិនបើអាចធ្វើទៅបាន៕ ប្រភព៖ Reuters
ចែករំលែកព័តមាននេះ