កាហ្វេមណ្ឌលគិរី ក្លាយជាដំណាំយុទ្ធសាស្ត្របង្កើតប្រាក់ចំណូលខ្ពស់ អាជ្ញាធរខេត្តជំរុញការប្រមូលផលឱ្យត្រូវស្តង់ដា ដើម្បីយកឈ្នះទីផ្សារ
- មណ្ឌលគិរី
ខេត្តមណ្ឌលគិរី ៖ ដើម្បីលុបបំបាត់បញ្ហាប្រឈមក្នុងការប្រមូលផលតាមបែបធម្មតាដែលនាំឱ្យបាត់បង់គុណភាព និងខុសស្តង់ដារបច្ចេកទេស រដ្ឋបាលខេត្តមណ្ឌលគិរី បានប្រគល់សម្ភារបច្ចេកទេសប្រមូលផលជូនដល់ប្រជាកសិករចំនួន ៥០០នាក់ ស្ថិតក្នុងឃុំប៊ូស្រា ស្រុកពេជ្រាដា នាថ្ងៃទី០១ ខែតុលា ឆ្នាំ២០២៦ ក្នុងឱកាសអបអរសាទរទិវាកាហ្វេអន្តរជាតិ។
ឯកឧត្តម គង់ គឹមនី អភិបាលខេត្តមណ្ឌលគិរី បានគូសបញ្ជាក់ថា ការផ្តល់ជូនសម្ភារបច្ចេកទេសនាពេលនេះ មិនត្រឹមតែជាការសម្រួលដល់ការងារប្រមូលផល និងសុវត្ថិភាពរបស់កសិករក្នុងរដូវកាលឆ្នាំ២០២៦ ប៉ុណ្ណោះទេ ប៉ុន្តែជាជំហានយុទ្ធសាស្ត្រក្នុងការជួយឱ្យកសិករប្រមូលផលបានត្រឹមត្រូវតាមបទដ្ឋានបច្ចេកទេស ធានាបាននូវគុណភាព រសជាតិ និងទទួលបានតម្លៃសេដ្ឋកិច្ចខ្ពស់។
ឯកឧត្តមបន្តថា សម្ភារដែលបានចែកជូនរួមមាន មួក អៀមដាក់ផ្លែកាហ្វេ និងសានូរការពារជង្គង់ ដែលជាឧបករណ៍ចាំបាច់ជួយការពារសុវត្ថិភាព និងបង្កើនល្បឿនក្នុងការប្រមូលផល។
គួរបញ្ជាក់ថា ខេត្តមណ្ឌលគិរីមានអំណោយផលខ្លាំងលើប្រភេទដីក្រហមជីជាតិ និងអាកាសធាតុត្រជាក់ ធ្វើឱ្យទិន្នផលកាហ្វេក្នុងឆ្នាំ២០២៥ សម្រេចបានរហូតដល់ ១,២៦៥ តោន លើផ្ទៃដីប្រមូលផល ៥១៥ ហិកតា (នៃផ្ទៃដីដាំដុះសរុប ៦២៧ ហិកតា)។ ការបំពាក់សម្ភារថ្មីនេះ ត្រូវបានរំពឹងថានឹងរញុចឱ្យទិន្នផល និងគុណភាពកាហ្វេមណ្ឌលគិរីក្នុងឆ្នាំ២០២៦ នេះ កាន់តែមានសក្តានុពលខ្ពស់ជាងមុនថែមទៀត៕
ចែករំលែកព័តមាននេះ