ប្រតិបត្តិការជាង ៤ម៉ោង ទំរាំសង្គ្រោះដំរីព្រៃ២ក្បាល ចេញពីស្រះទឹកដោយជោគជ័យ និងវិលត្រឡប់ចូលព្រៃវិញដោយសុវត្ថិភាព
- មណ្ឌលគិរី
ខេត្តមណ្ឌលគិរី ៖ កម្លាំងមន្ទីរបរិស្ថានខេត្តមណ្ឌលគិរី បានចុះប្រតិបត្តិការសង្គ្រោះសត្វដំរីព្រៃចំនួន ០២ក្បាល (ក្នុងនោះមានដំរីញីចំនួន ០១ក្បាល) ដែលបានធ្លាក់ចូលទៅក្នុងស្រះទឹកមួយកន្លែង ដែលប្រជាពលរដ្ឋជីកសម្រាប់ប្រើប្រាស់ តែមិនអាចឡើងមកលើវិញបាន ឱ្យរួចផុតពីគ្រោះថ្នាក់ និងត្រឡប់ចូលទៅក្នុងព្រៃធម្មជាតិវិញដោយសុវត្ថិភាព នៅចំណុចចុងរ៉ាង ស្ថិតក្នុងភូមិពូហ្សាម ឃុំសែនមនោរម្យ ស្រុកអូររាំង នាព្រឹកថ្ងៃទី០១ ខែតុលា ឆ្នាំ២០២៦ ។
លោក ហាស់ វិបុល ប្រធានមន្ទីរបរិស្ថានខេត្តមណ្ឌលគិរី បានឱ្យដឹងថា ដោយសារតែទីតាំងកើតហេតុមានភាពលំបាក និងជម្រៅស្រះទឹកជ្រៅ ក្រុមការងារត្រូវប្រើប្រាស់កម្លាំងបាយជីកដីបើកផ្លូវដោយដៃ អស់រយៈពេលជាង ៤ម៉ោង ទើបអាចសម្រួលផ្លូវឱ្យសត្វដំរីព្រៃទាំង ២ក្បាល មានលទ្ធភាពឡើងចេញពីស្រះទឹកបានដោយជោគជ័យ។
លោក ហាស់ វិបុល ប្រធានមន្ទីរបរិស្ថានខេត្តមណ្ឌលគិរី បានថ្លែងអំណរគុណយ៉ាងជ្រាលជ្រៅ និងកោតសរសើរចំពោះស្មារតីទទួលខុសត្រូវខ្ពស់របស់មន្ត្រីឧទ្យានុរក្ស អាជ្ញាធរដែនដី និងជាពិសេសបងប្អូនប្រជាពលរដ្ឋក្នុងសហគមន៍ ដែលបានផ្តល់ព័ត៌មានទាន់ពេលវេលា និងរួមសហការគ្នាយ៉ាងស្រសាក់ស្រស្រាំក្នុងសកម្មភាពសង្គ្រោះនេះ។
លោកប្រធានមន្ទីរបានបន្ថែមថា «សត្វដំរីព្រៃ គឺជាប្រភេទសត្វកម្រ និងជាសម្បត្តិធម្មជាតិដ៏មានតម្លៃមហាសាលសម្រាប់ប្រទេសកម្ពុជា ក៏ដូចជាខេត្តមណ្ឌលគិរីទាំងមូល។ ការចូលរួមជួយសង្គ្រោះដំរីព្រៃនាពេលនេះ មិនត្រឹមតែជាការការពារជីវិតសត្វព្រៃប៉ុណ្ណោះទេ ប៉ុន្តែគឺជាការបង្ហាញពីការភ្ញាក់រលឹក និងការយល់ដឹងកាន់តែច្បាស់របស់បងប្អូនប្រជាពលរដ្ឋអំពីសារសំខាន់នៃការអភិរក្សធនធានធម្មជាតិ និងសត្វព្រៃ»។
លោក ហាស់ វិបុល ក៏បានអំពាវនាវដល់បងប្អូនប្រជាពលរដ្ឋទាំងអស់ដែលរស់នៅជុំវិញតំបន់ការពារធម្មជាតិ និងតំបន់ក្បែរព្រៃ បន្តចូលរួមសហការជាមួយមន្ទីរបរិស្ថាន និងអាជ្ញាធរមានសមត្ថកិច្ច ដោយចៀសវាងការធ្វើបាប ទាក់ចាប់ ឬបរបាញ់សត្វព្រៃ ហើយប្រសិនបើតជួបប្រទះករណីសត្វព្រៃជួបគ្រោះថ្នាក់ ឬមានការរំខានណាមួយ សូមរាយការណ៍មកមន្ត្រីជំនាញជាបន្ទាន់ ដើម្បីរួមគ្នារក្សាការពារជីវចម្រុះនៅក្នុងខេត្តមណ្ឌលគិរីឱ្យបានគង់វង្សសម្រាប់កូនចៅជំនាន់ក្រោយ៕
ចែករំលែកព័តមាននេះ