ពីព្រឹក! ចៅប្រាប់ថាទៅលេងសាលា រួចជិះកង់ទៅបាត់ លុះថ្ងៃត្រង់ ជីដូនទទួលដំណឺងអកុស.លពីអ្នកជិតខាង
- ភ្នំពេញ
រាជធានីភ្នំពេញ៖ ក្មេងប្រុសអាយុ១០ឆ្នាំម្នាក់ បានប្រាប់ជីដូនថាទៅលេងនៅសាលារៀនទេ ប៉ុន្តែក្រោយពេលចេញផុតពីផ្ទះ បែរជាទៅលេងទឹកប្រឡាយតាហោជាមួយមិត្តភក្ដិទៅវិញ ។ ខណៈនោះជាអកុសល ក៏បណ្ដាលឲ្យលង់ស្លាប់បាត់បង់ជីវិត ហើយជីដូននៅឯផ្ទះមិនបានដឹងភ្លាមៗនោះទេ រហូតដល់អ្នកជិតខាងទៅប្រាប់ ទើបគាត់បានដឹងនិងទៅមើលសពចៅប្រុស ។
ហេតុការណ៍នោះបានកើតឡើងកាលពីវេលាម៉ោង១២ថ្ងៃត្រង់ថ្ងៃទី០១ ខែតុលា ឆ្នាំ២០២៦ នៅក្នុងប្រឡាយតាហោ ស្ថិតនៅភូមិឆេះទេះកើត សង្កាត់ភ្លើងឆេះរទះ ខណ្ឌកំបូល រាជធានីភ្នំពេញ ។
ក្មេងប្រុសរងគ្រោះឈ្មោះពេជ្រ ចារ៉ាត់ អាយុ១០ឆ្នាំ ជាសិស្សថ្នាក់ទី៤ រៀននៅសាលាបឋមសិក្សាជន្លង់ម្លូរ មានម្ដាយជាស្រីមេម៉ាយរស់នៅនិងធ្វើការនៅឯខេត្តកំពត ។ បច្ចុប្បន្នក្មេងប្រុសខាងលើស្នាក់នៅផ្ទះជួលជាមួយជីដូននិងម្ដាយមីងនៅភូមិកើតហេតុខាងលើ និងមានស្រុកកំណើតនៅស្រុកកោះអណ្ដែត ខេត្តតាកែវ ។
ស្ត្រីជាជីដូនបាននិយាយថា នៅវេលាព្រឹកថ្ងៃកើតហេតុ ចៅប្រុសគាត់រូបនោះបានសុំគាត់ទៅលេងនៅសាលាបឋមសិក្សាជន្លង់ម្លូរហើយបន្ទាប់ពីគាត់អនុញ្ញាតឲ្យទៅ ចៅប្រុសក៏ជិះកង់ចេញពីផ្ទះទៅបាត់ទៅ ក្រោយមកគាត់ក៏មិនបានដឹងថាចៅប្រុសទៅលេងទឹកហើយលង់ស្លាប់បែបនេះដែរ ។ រហូតដល់វេលាម៉ោង១២ថ្ងៃត្រង់ ក៏ស្រាប់តែអ្នកជិតខាងដែលមានមុខរបរលក់កាហ្វេ បានទៅប្រាប់គាត់ថា ចៅប្រុសគាត់លង់ទឹកស្លាប់ហើយ ទើបគាត់ទៅមើល ក៏ឃើញក្មេងប្រុសដែលស្លាប់នោះគឺជាចៅគាត់ប្រាកដមែន ។
អ្នកភូមិបានប្រាប់ថា នៅវេលាម៉ោងកើតហេតុនោះ ក្មេងប្រុសរងគ្រោះនិងមិត្តភក្ដិ៤នាក់ទៀតបាននាំគ្នាទៅលេងទឹកប្រឡាយតាហោនោះ លុះក្រោយមកស្រាប់តែក្មេងដែលជាមិត្តភក្ដិ បាននាំគ្នារត់ទៅប្រាប់បុរសអ្នកបះកង់ម៉ូតូនិងកង់រថយន្ត ដែលស្ថិតនៅចម្ងាយប្រមាណជិត១០០ម៉ែត្រពីកន្លែងកើតហេតុ ។ ពេលនោះបង្កឲ្យមានការភ្ញាក់ផ្អើលដល់បុរសអ្នកប៉ះកង់ខាងលើ និងអ្នកផ្សងទៀតនាំគ្នាទៅជួយស្រង់ក្មេងប្រុសនោះឡើង ដើម្បីនាំយកទៅសង្គ្រោះ ប៉ុន្តែពេលស្រង់បានក្មេងប្រុសខាងលើបានស្លាប់បាត់ទៅហើយ ។
ក្រោយពេលកើតហេតុ កម្លាំងប៉ុស្តិ៍នគរបាលរដ្ឋបាលភ្លើងឆេះរទេះ និងនគរបាលខណ្ឌកំបូលបានចុះទៅពិនិត្យមើល រួចរាយការណ៍ជូនកម្លាំងការិយាល័យបច្ចេកទេសនិងវិទ្យាសាស្ត្រ នៃស្នងការដ្ឋាននគរបាលរាជធានីភ្នំពេញ ដើម្បីធ្វើការពិនិត្យកោសល្យវិច័យសាកសពក្មេងប្រុសនោះហើយ ៕
ចែករំលែកព័តមាននេះ