កងកម្លាំងសឹករងកំពង់ឆ្នាំង និងកងពលតូចលេខ៧០ ធ្វើលំហាត់សង្គ្រោះប្រជាពលរដ្ឋ ក្នុងពេលមានគ្រោះទឹកជំនន់
- កំពង់ឆ្នាំង
ខេត្តកំពង់ឆ្នាំង ៖ កងកម្លាំងប្រតិបត្តិការសឹករងកំពង់ឆ្នាំង សហការជាមួយ កងពលតូចលេខ៧០ នៅព្រឹកថ្ងៃទី ១ខែតុលាឆ្នាំ ២០២៦ បានសហការគ្នាធ្វើលំហាត់សមយុទ្ធសង្គ្រោះប្រជាពលរដ្ឋ ទៅលើផ្ទៃទឹក ដើម្បីពង្រឹងសមត្ថភាពសង្គ្រោះបន្ទាន់ក្នុងហេតុការណ៍ណាមួយកើតឡើងគ្រាដែលទឹកជំនន់កំពុងតែជន់ឡើង។
លោក អ៊ុ សុភា មេបញ្ជាការតំបន់ប្រតិបត្តិការសឹករងកំពង់ឆ្នាំង មានប្រសាសន៍ថា ដោយសារស្ថានភាពទឹកទន្លេ មានជំនន់ដោយទឹកភ្លៀង ពិបាកប៉ាន់ស្មាន ដែលអាចបង្កគ្រោះថ្នាក់ដល់ប្រជាពលរដ្ឋគ្រប់ពេលវេលា និងមួយវិញទៀតដើម្បីពង្រឹងលើសមត្ថភាពកងកម្លាំងសង្គ្រោះ របស់អង្គភាព ថ្ងៃនេះ កងកម្លាំងប្រតិបត្តិការសឹករងកំពង់ឆ្នាំង សហការជាមួយកងពលតូចលេខ ៧០ សរុបប្រមាណជាង ១០០ នាក់ បានធ្វើលំហាត់សមយុទ្ធសង្គ្រោះប្រជាពលរដ្ឋរងគ្រោះដោយទឹកជំនន់ ។
ក្នុងកិច្ចប្រតិបត្តិការនេះ បានប្រើប្រាស់រថយន្តដឹកកងកម្លាំងចំនួន ៦គ្រឿង រថយន្តសង្គ្រោះបន្ទាន់២គ្រឿង កាណូត ប៉ាឡាស្មាច់ ២៥ គ្រឿង ធ្វើសមយុទ្ធនៅចំណុចចុងកោះទន្លេផ្សារក្រោម ដែលជាលទ្ធផល គឺល្អប្រសើរ។
លោកមេបញ្ជាការតំបន់ប្រតិបត្តិការសឹករងបានបញ្ជាក់ទៀតថា ក្រោយធ្វើសមយុទ្ធ រួចហើយ ក៏បាននាំយកអំណោយដ៍ថ្លៃថ្លារបស់សម្ដេចមហាបវរអធិបតី ហ៊ុន ម៉ាណែត និងលោកជំទាវ ពេជ្រ ច័ន្ទមុន្នី ឧបត្ថម្ភដល់ប្រជាពលរដ្ឋដែលបានចូលរួមធ្វើលំហាត់សមយុទ្ធ ដោយបានឧបត្ថម្ភ សរុបមាន អង្ករចំនួន១៧៥គីឡូក្រាម មី ៧ កេស ត្រីខ ៧ យូរ ទឹកសុទ្ឋ៧យួរ និងងថវិកាមួយចំនួន ៕
ចែករំលែកព័តមាននេះ