ប្រទេសអ៉ីស្រាអែល ៖ កាលពីថ្ងៃទី៣០ កញ្ញា អ្នកបើកយន្តហោះម្នាក់បានចាក់អ្នកបើកម្នាក់ទៀត ក្នុងយន្តហោះដឹកអ្នកដំណើរ១គ្រឿង ដែលហោះទៅកាន់អ៉ីស្រាអែល មុនពេលបណ្ដាអ្នកដំណើរសម្រុកចូលក្នុងកាប៊ីនយន្តហោះ ហើយប្រតាយប្រតប់គ្នាជាមួយអ្នកចាក់រូបនោះ ។
បណ្ដាសាក្សីរៀបរាប់ថា យន្តហោះចាប់ផ្ដើមបង្ខំចុះនាំឲ្យបណ្ដាអ្នកដំណើរស្រែកភ័យជ្រួលច្របល់ ។ យន្តហោះនោះ បន្ទាប់មកវិលមកមានលំនឹងវិញ ហើយចុះបន្ទាន់នៅអារ៉ាប៊ីសាអូឌីត ។ មូលហេតុនៃការចាក់នោះ ដែលនាំឲ្យអ៉ីស្រាអែលត្រៀមបណ្ដាយន្តហោះប្រយុទ្ធ ខ្លាចមានសកម្មភាពចាប់ពង្វាងយន្តហោះ នៅមិនទាន់ច្បាស់នៅឡើយ ។ នាយករដ្ឋមន្ត្រីអ៉ីស្រាអែលលោកបេនចាមីននេតាន់យ៉ាហ៊ូ ប្រកាសថា អារ៉ាប៊ីសាអូឌីតបានចាប់ខ្លួនអ្នកបើកដែលចាក់គេនោះ ដែលអត្តសញ្ញាណរបស់គេមិនត្រូវបានលាតត្រដាងនៅឡើយ ។
បណ្ដាអ្នកដំណើរដែលភ័យជ្រួលច្របល់នៃយន្តហោះរបស់ក្រុមហ៊ុនអាកាសចរណ៍ FLYDUBAI ភ្ជាប់ក្រុងឌូបៃ ទៅក្រុងតែលអាវីវ បានទៅដល់អ៉ីស្រាអែល នាយប់ថ្ងៃទី៣០ កញ្ញា នោះ តាមយន្តហោះ១គ្រឿងទៀត ក្រោមការទះដៃអបអរពីសំណាក់បណ្ដាអ្នករង់ចាំ ។
បណ្ដាអ្នកជំនាញការខាងអាកាសចរណ៍ មានការងឿងឆ្ងល់ដែលយន្តហោះនោះមិនផ្ទុះ ក្រោយការចុះដោយបង្ខំ ដោយផ្នែកមួយធំនៃចង្កូតយន្តហោះបានដាច់ពីកន្ទុយ ។ តាមវីដេអូមួយផ្សាយដោយទូរទស្សន៍ CHANNEL 12 គេឃើញអ្នកដំណើរម្នាក់លោកយ៉ានីល ហាយូន ដែលប្រតាយប្រតប់ជាមួយអ្នកចាក់ ពាក់អាវយឺតមួយប្រឡាក់ដោយឈាម ហើយចាប់ដៃដោយលោកនេតាន់យ៉ាហ៊ូ ដែលនិយាយថា ខ្ញុំនឹងជួបលោកទៀត ដោយលោកជាតោមួយ និងជាវីរបុរសមួយរូប ។
លោកយ៉ានីល ហាយូន រៀបរាប់ថា បន្ទាប់ពីអ្នកដំណើរម្នាក់បានឃើញអ្នកបើកយន្តហោះម្នាក់ចាក់អ្នកបើកម្នាក់ទៀត ដែលស្រែករកជំនួយ រូបគេនិងអ្នកដំណើរដទៃៗទៀតបាននាំគ្នាសម្រុកចូលក្នុងកាប៊ីន ហើយបានឃើញអ្នកចាក់់ប៉ុនប៉ងបំផ្លាញឧបករណ៍បញ្ជាយន្តហោះប៉ុនប៉ងឲ្យយន្តហោះធ្លាក់ ។ ក្រុមហ៊ុនអាកាសចរណ៍FLYDUBAIគូសបញ្ជាក់ថា យន្តហោះត្រូវបានធានាសន្តិសុខដោយក្រុមយានិកកំពុងបម្រើការដែលនាំយន្តហោះបកក្រោយ មកចុះចតបានដោយសុវត្តិភាពនៅអារ៉ាប៊ីសាអូឌីត។
អ្នកបើកយន្តហោះដែលគេចាក់របួស គឹអនុសេនីយឯកជនជាតិឥណ្ឌា លោកSMIT MACHCHHAR ដែលនាយករដ្ឋមន្ត្រី
អ៉ីស្រាអែលថា ជាបុរសដ៏សែនក្លាហានម្នាក់ ។ រូបគេទោះត្រូវគេចាក់ហើយរបួសធ្ងន់នៅតែអាចការពារខ្លួន និងតស៊ីទប់ទល់ នាំទៅដល់ការជួយសង្គ្រោះអាយុជីវិតមនុស្ស១៧៤នាក់ ដែលក្នុងនោះមានបណ្ដាជនជាតិអ៉ីស្រាអែល និងជនជាតិបរទេស
ផ្សេងៗ៕
ចែករំលែកព័តមាននេះ