ជំនាញរដ្ឋបាលជលផលស្ទឹងត្រែង សហការជាមួយក្រុមអភិរក្ស ចុះបង្ក្រា.បបទល្មើសនេសាទ រុះរើរបាំង និងលែងកូនត្រីចូលធម្មជាតិវិញ
- ស្ទឹងត្រែង
ខេត្តស្ទឹងត្រែង៖ មន្ត្រីជំនាញរដ្ឋបាលជលផលខេត្តស្ទឹងត្រែងសហការជាមួយក្រុមអភិរក្សត្រីមេពូជស្រុកសៀម
បូក បានចុះល្បាត ទប់ស្កាត់ និងបង្ក្រាបបទល្មើស នេសាទខុសច្បាប់យ៉ាងសកម្ម ដោយបានរុះរើវត្ថុតាងខុស
ច្បាប់ជាច្រើន និងបានដោះលែងកូនត្រីធម្មជាតិចូលទៅក្នុងដែនទឹកវិញ ដើម្បីការពារ និងអភិរក្សជីវចម្រុះក្នុងតំបន់។
ប្រតិបត្តិការបង្ក្រាបនេះ ដឹកនាំផ្ទាល់ដោយ លោកសៅ ពិសិដ្ឋ នាយផ្នែករដ្ឋបាលជលផលសេកុង សហការជាមួយមន្ត្រីខណ្ឌរដ្ឋបាលជលផលស្ទឹងត្រែង និងក្រុមអភិរក្សត្រីមេពូជស្រុកសៀមបូក ដោយបានចុះអនុវត្តនៅចំណុចអូរសាឃូន ភូមិហាងខូបាន សង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង។
ជាលទ្ធផលនៃការចុះល្បាតទប់ស្កាត់ និងបង្ក្រាបបទល្មើសជលផលនេះ កម្លាំងសមត្ថកិច្ចជំនាញបានសម្រេចវត្ថុតាង និងសកម្មភាពល្មើសរួមមានការ រុះរើ និងបំផ្លាញចោល របាំងបិទអូរចំនួន ២កន្លែង។ដកហូតលូស្បៃមុងចំនួន ៣មាត់ ដែលមានប្រវែងសរុប ៤៥ម៉ែត្រ និងបង្គោលចំនួន ៣០ដើម។ទូកស្មាច់ចំនួន ១គ្រឿង និងបានប្រលែងកូនត្រីចម្រុះចំនួន ៣០គីឡូក្រាម ចូលក្នុងដែនទឹកធម្មជាតិវិញភ្លាមៗ ដើម្បីធានាការកើនឡើងនៃវារីសាស្ត្រក្នុងតំបន់។
មន្ត្រីជំនាញបានបញ្ជាក់យ៉ាងមុតមាំថា ការចុះបង្ក្រាបបទល្មើសជលផលនេះ គឺជាវិធានការក្តៅនិងជាបន្តបន្ទាប់ដើម្បីការពារធនធានធម្មជាតិ និងធានាបាននូវនិរន្តរភាពនៃស្តុកត្រីទឹកសាប។ ការអភិរក្សត្រីមេពូជ និងការទប់ស្កាត់រាល់សកម្មភាពនេសាទខុសច្បាប់ គឺជាកិច្ចការអាទិភាពដ៏សំខាន់បំផុតដើម្បីការពារកុំឱ្យមានការបំផ្លិចបំផ្លាញពូជត្រីពីសំណាក់ជនខិលខូចមួយចំនួន។ សមត្ថកិច្ចជំនាញប្តេជ្ញាចិត្តយ៉ាងមុតមាំក្នុងការ លុបបំបាត់រាល់បទល្មើសនេសាទខុសច្បាប់ ទាំងអស់នៅក្នុងភូមិសាស្ត្រទទួលខុសត្រូវរបស់ខ្លួន ដើម្បីធានាសន្តិសុខស្បៀង និងតុល្យភាពអេកូឡូស៊ី។
មន្ត្រីជំនាញក៏បានលើកឡើងអំពីទោសទណ្ឌចំពោះការប្រព្រឹត្តបទល្មើសនេសាទខុសច្បាប់ដោយ យោងតាម ច្បាប់ស្តីពីជលផល របស់ព្រះរាជាណាចក្រកម្ពុជា ការប្រព្រឹត្តបទល្មើសនេសាទខុសច្បាប់ ដូចជាការប្រើប្រាស់របាំងបិទអូរ លូស្បៃមុង ឧបករណ៍ឆក់ ឬឧបករណ៍ហាមឃាត់ផ្សេងៗក្នុងរដូវបិទនេសាទ គឺជាអំពើល្មើសច្បាប់ដែលត្រូវប្រឈមមុខនឹងការផ្តន្ទាទោសយ៉ាងធ្ងន់ធ្ងរ។ ជនល្មើសដែលហ៊ានល្មើសនឹងច្បាប់ជលផល និងត្រូវទទួលទណ្ឌកម្មផ្លូវច្បាប់រួមមានការ
ពិន័យជាប្រាក់យ៉ាងច្រើនតាមកំណត់របស់ច្បាប់។
ការរឹបអូស និងបំផ្លាញចោលរាល់វត្ថុតាង និងមធ្យោបាយប្រព្រឹត្តបទល្មើស។ការផ្ដន្ទាទោសដាក់ពន្ធនាគារទៅតាមកម្រិតធ្ងន់ធ្ងរនៃបទល្មើសដែលបានប្រព្រឹត្ត។
អាជ្ញាធរមានសមត្ថកិច្ចសូមអំពាវនាវដល់ប្រជាពលរដ្ឋទាំងអស់ សូមចូលរួមសហការជាមួយសមត្ថកិច្ចដោយបញ្ឈប់រាល់ការនេសាទខុសច្បាប់ និងជួយរាយការណ៍ជាបន្ទាន់នៅពេលបានឃើញសកម្មភាពល្មើស ដើម្បីរួមចំណែកការពារបេតិកភណ្ឌធម្មជាតិដ៏មានតម្លៃរបស់យើងទាំងអស់គ្នា៕
ចែករំលែកព័តមាននេះ