ឃាត់ខ្លួនជនសង្ស័យ៤នាក់ ដកហូតគ្រឿងញៀ.នជិត១គីឡូក្រាម
- កំពង់ស្ពឺ
ខេត្តកំពង់ស្ពឺ ៖ ក្រុមជនសង្ស័យជាមុខសញ្ញាចែកចាយ និងជួញដូរគ្រឿងញៀនចំនួន៤នាក់ ត្រូវបានកម្លាំងនគរបាលខេត្តកំពង់ស្ពឺ ធ្វើការសហការពន្លាតដែនសមត្ថកិច្ចឃាត់ខ្លួនបានបន្តបន្ទាប់គ្នា ដកហូតវត្ថុតាងគ្រឿងញៀនជិតមួយគីឡូក្រាម។
ការសហការឃាត់ខ្លួនជនសង្ស័យជាមុខសញ្ញាចែកចាយនិងជួញដូរគ្រឿងញៀនខុសច្បាប់ចំនួន៤នាក់ បានធ្វើឡើង៖ ដោយបានការបញ្ជាដឹកនាំដ៏ខ្ពង់ខ្ពស់ពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ ផែនការងារប្រឆាំងគ្រឿងញៀន ដឹកនាំផ្ទាល់ពីលោកវរសេនីយ៍ឯក ហ៊ាង ឈាងលី ស្នងការរង កាលពីថៃ្ងទី២៨ ខែកញ្ញា ឆ្នាំ២០២៦កន្លងទៅ នៅចំណុចក្នុងភូមិត្រពាំងខ្យង ឃុំទួលអំពិល ស្រុកបសេដ្ឋ ខេត្តកំពង់ស្ពឺ កម្លាំងនគរបាលបានសហការអធិការដ្ឋាននគរបាលស្រុកបសេដ្ឋ និងអធិការដ្ឋាននគរបាលស្រុកសំរោងទង ស្រាវជ្រាវពន្លាតសមត្ថកិច្ចនិងឈានទៅធ្វើការឃាត់ខ្លួនបានមុខសញ្ញាពាក់ព័ន្ធការជួញដូរគ្រឿងញៀន ចំនួន៤នាក់។
នគរបាលខេត្តកំពង់ស្ពឺបាននិយាយឱ្យដឹងថា ជនសង្ស័យដែលឃាត់ខ្លួនបាន ទី១-ឈ្មោះ ហន សុខា ហៅ ភក្តី ហៅ ដី ភេទប្រុស អាយុ៣២ឆ្នាំមុខរបរមិនពិតប្រាកដ រស់នៅក្នុងភូមិត្រពាំងជម្រៅ ឃុំទួលអំពិល ស្រុកបសេដ្ឋ ខេត្តកំពង់ស្ពឺ ដកហូតបានម្សៅក្រាមពណ៌សថ្លាសង្ស័យជាគ្រឿងញៀន ១កញ្ចប់ធំ , ទូរស័ព្ទដៃ ១គ្រឿង, ម៉ូតូ ១គ្រឿង។
ផ្អែកតាមចម្លើយរបស់ឈ្មោះ ហន សុខា ហៅ ភក្តី ហៅ ដី និងបានការសម្របសម្រួលនីតិវិធីពី តំណាងអយ្យការអមសាលាដំបូងខេត្ដកំពង់ស្ពឺ សមត្ថកិច្ចឈានទៅឆែកឆេរផ្ទះឈ្មោះ ឌិន រុន ភេទប្រុស អាយុ៣៤ឆ្នាំ រស់នៅក្នុងភូមិអង្គខ្ជាយ ឃុំព្រៃវិហារ ស្រុកគងពិសី (គេចខ្លួន) និងបានឃេីញបក្ខពួកចំនួន២នាក់។ ជនសង្ស័យដែលឃាត់ខ្លួនទី២-ឈ្មោះ យ៉ង កុយ ភេទប្រុស អាយុ៣០ឆ្នាំមុខរបរមិនពិតប្រាកដ រស់នៅក្នុងភូមិត្រពាំងឃ្លោក ឃុំខ្វាវ ស្រុកសំរោង ខេត្តតាកែវ ដកហូតវត្ថុតាង ទូរស័ព្ទដៃ១គ្រឿង ម៉ូតូ១គ្រឿង និងទី៣-ឈ្មោះ ណុប គីមលៀង ភេទប្រុស អាយុ២៤ឆ្នាំ រស់នៅក្នុងភូមិអង្គុញ ឃុំខ្វាវ ស្រុកសំរោង ខេត្តតាកែវ។
នគរបាលខេត្តកំពង់ស្ពឺ បានបន្តឱ្យដឹងទៀតថា បន្ទាប់ពីឃាត់ខ្លួនជនសង្ស័យចំនួន៣នាក់ខាងលើសមត្ថកិច្ចបន្ដសហការពន្លាតដែនសមត្ថកិច្ចដោយបានសហការជាមួយកំលាំងស្នងការដ្ឋាននគរបាលរាជធានីភ្នំពេញ ធ្វើការស្រាវជ្រាវឈានទៅឃាត់ខ្លួនជនសង្ស័យ ឈ្មោះ អ៊ុន លាប ភេទប្រុស អាយុ២៦ឆ្នាំ មុខរបរមិនពិតប្រាកដ រស់នៅក្នុងភូមិ១២ សង្កាត់វាលវង់ ខណ្ឌ៧មករា រាជធានីភ្នំពេញ ដកហូតបានម្សៅក្រាមពណ៌សថ្លាសង្ស័យជាគ្រឿងញៀន ១កញ្ចប់, និងទូរស័ព្ទដៃ១គ្រឿង។
ប្រតិបត្ដិការខាងលេីសមត្ថកិច្ចនគរបាលបានឃាត់ខ្លួនជនសង្ស័យ សរុបចំនួន៤នាក់ ធ្វើការដកហូត វត្ថុតាងម្សៅក្រាមពណ៌សថ្លាសង្ស័យជាគ្រឿងញៀនចំនួន២កញ្ចប់( កញ្ចប់ធំចំនួន១ និងកញ្ចប់តូចចំនួន១ កញ្ចប់) ទម្ងន់ ៩៩៨,៩១ក្រាម (ជិត១គីឡូក្រាម) ទូរស័ព្ទដៃចំនួន៣គ្រឿង ,និងម៉ូតូចំនួន២គ្រឿងផងដែរ។
បច្ចុប្បន្នក្រុមជនសង្ស័យរួមជាមួយនឹងភស្ដុតាង ជាសារធាតុញៀន នគរបាលបានកសាងសំណុំរឿង បញ្ជូនទៅអយ្យការអមសាលាដំបូងខេត្ដកំពង់ស្ពឺ ដើម្បីចាត់ការបន្តតាមផ្លូវច្បាប់៕
ចែករំលែកព័តមាននេះ