ព្រឹត្តិការណ៍ប្រណាំងទូកងឆ្នាំ២០២៦ អបអរសាទរពិធីបុណ្យភ្ជុំបិណ្ឌ ពលរដ្ឋចូលរួមទស្សនាជាង២ម៉ឺននាក់
- ព្រៃវែង
ខេត្តព្រៃវែង ៖ នៅថ្ងៃទី២៩ ខែកញ្ញា រដ្ឋបាលស្រុកពារាំង បានរៀបចំព្រឹត្តិការណ៍ប្រណាំងទូកងយ៉ាងអធិកអធម ដើម្បីអបអរសាទរពិធីបុណ្យភ្ជុំបិណ្ឌប្រពៃណីជាតិខ្មែរ លើកស្ទួយកីឡាប្រពៃណី អភិរក្សមរតកវប្បធម៌ជាតិ និងពង្រឹងស្មារតីសាមគ្គីភាពក្នុងសហគមន៍ ដោយមានថ្នាក់ដឹកនាំ មន្ត្រីរាជការ កីឡាករ និងប្រជាពលរដ្ឋចូលរួមសរុបប្រមាណ ២៣.៥៥១នាក់។
ព្រឹត្តិការណ៍នេះបានប្រារព្ធធ្វើឡើងនៅស្ទឹងស្នាយពល ស្ថិតក្នុងភូមិពារាំង ឃុំរាប ស្រុកពារាំង ខេត្តព្រៃវែង ក្រោមអធិបតីភាពឯកឧត្តម ហួត ឈាងអន អនុប្រធានក្រុមការងាររាជរដ្ឋាភិបាលចុះមូលដ្ឋានស្រុកពារាំង តំណាងដ៏ខ្ពង់ខ្ពស់ឯកឧត្តម វង្ស ពិសេន ប្រធានក្រុមការងាររាជរដ្ឋាភិបាលចុះមូលដ្ឋានស្រុកពារាំង។
លោក ចេម ប្រា អភិបាលនៃគណៈអភិបាលស្រុកពារាំង បានថ្លែងថា ការរៀបចំព្រឹត្តិការណ៍នេះមានគោលបំណងបន្តថែរក្សា និងលើកស្ទួយកីឡាប្រពៃណីដែលជាកេរដំណែលដ៏ល្អផូរផង់របស់ដូនតាខ្មែរ ព្រមទាំងលើកទឹកចិត្តឱ្យយុវជនចូលរួមលេងកីឡា ដើម្បីពង្រឹងសុខភាព បណ្តុះស្មារតីសាមគ្គីភាព និងជៀសឆ្ងាយពីអំពើអបាយមុខនានា។
លោក ចេម ប្រា បានបញ្ជាក់ថា កីឡាប្រណាំងទូកង មិនមែនគ្រាន់តែជាការប្រកួតប្រជែងដើម្បីដណ្តើមជ័យលាភីប៉ុណ្ណោះទេ ប៉ុន្តែថែមទាំងជាកីឡាដែលទាមទារឱ្យកីឡាករមានវិន័យ ភាពអត់ធ្មត់ ការសហការគ្នា និងស្មារតីទទួលខុសត្រូវខ្ពស់។ ជាពិសេស ការរួបរួមកម្លាំងចែវទូកឱ្យមានចង្វាក់ស្របគ្នា គឺជានិមិត្តរូបនៃសាមគ្គីភាព និងការឯកភាពគ្នាឆ្ពោះទៅរកគោលដៅរួម។ ម្យ៉ាងវិញទៀត ការរៀបចំព្រឹត្តិការណ៍កីឡាប្រពៃណីបែបនេះ ក៏អាចរួមចំណែកទាក់ទាញភ្ញៀវទេសចរ ជំរុញសកម្មភាពពាណិជ្ជកម្ម និងបង្កើនឱកាសរកប្រាក់ចំណូលជូនប្រជាពលរដ្ឋក្នុងមូលដ្ឋានផងដែរ។
ការប្រកួតប្រណាំងទូកងនៅស្រុកពារាំងនេះ គណៈកម្មការរៀបចំ បានបែងចែកជាពីរប្រភេទ គឺប្រភេទទូកងចំណុះ១២នាក់ និងប្រភេទទូកងចំណុះ២២នាក់ និងមានទូកចូលរួមប្រកួតសរុបចំនួន 46 ទូក។
យោងតាមលទ្ធផលនៃការប្រកួត ទូកងចំណុះ១២នាក់ ចំណាត់ថ្នាក់លេខ១ បានទៅលើទូកងពាក់ស្លាកលេខ០១៧ ឈ្មោះ «ឧត្តរមុនីសាគរមានជ័យបារមីស្ដេចនាគខ្មៅ»។
ចំណែកប្រភេទទូកងចំណុះ២២នាក់ ចំណាត់ថ្នាក់លេខ១ បានទៅលើទូកងពាក់ស្លាកលេខ០៣៦ ឈ្មោះ «អធិរាជវាលស្បូវ»។
គួរបញ្ជាក់ផងដែរថា នៅពេលខាងមុខ រដ្ឋបាលខេត្តព្រៃវែង និងរៀបចំព្រឹត្តិការណ៍ប្រណាំងទូកងថ្នាក់ខេត្តដ៏ធំមួយផងដែរ ដោយមានរយៈពេល 2 ថ្ងៃ គឺនៅថ្ងៃទី 24 និង 25 ខែតុលាខាងមុខ នៅចំណុចចុងប៉ម ខាងមុខសាលាខេត្តព្រៃវែង ព្រមទាំងមានរៀបចំកម្មវិធីកម្សាន្តសប្បាយៗជាច្រើនប្រភេទទៀត នៅពេលរាត្រី ដែលអាចឲ្យបងប្អូនប្រជាពលរដ្ឋទាំងក្នុងខេត្តនិងក្រៅខេត្តអាចអញ្ជើញចូលរួមលេងកម្សាន្តបានយ៉ាងសប្បាយរីករាយផងដែរ ៕
ចែករំលែកព័តមាននេះ