អភិបាលខេត្តមណ្ឌលគិរី ចុះពិនិត្យ និងជំរុញការស្ថាបនាផ្លូវបេតុងអាមេ ១ ៥០០ម៉ែត្រ ក្នុងក្រុងសែនមនោរម្យ
- មណ្ឌលគិរី
ខេត្តមណ្ឌលគិរី៖ ប្រជាពលរដ្ឋរស់នៅក្នុងភូមិដោះក្រមុំ និងភូមិឡៅកា បានសម្តែងនូវក្តីសប្បាយរីករាយ និងថ្លែងអំណរគុណយ៉ាងជ្រាលជ្រៅចំពោះអាជ្ញាធរខេត្តមណ្ឌលគិរី ដែលបានយកចិត្តទុកដាក់ស្ថាបនាផ្លូវបេតុងអាមេថ្មីមួយខ្សែនេះឡើង។
ប្រជាពលរដ្ឋបានលើកឡើងថា កន្លងមក ផ្លូវមួយខ្សែនេះជួបការលំបាកខ្លាំងក្នុងការធ្វើដំណើរ ជាពិសេសនៅរដូវវស្សាមានភក់ជ្រាំ និងរដូវប្រាំងមានដីហុយ ប៉ុន្តែនៅពេលផ្លូវបេតុងនេះស្ថាបនារួចរាល់ វានឹងជួយសម្រួលដល់ការធ្វើដំណើរប្រចាំថ្ងៃ ការដឹកជញ្ជូនកសិផល និងការធ្វើដំណើររបស់សិស្សានុសិស្សទៅសិក្សាបានយ៉ាងងាយស្រួល និងសុវត្ថិភាព។
ស្របពេលជាមួយគ្នានេះដែរ នាព្រឹកថ្ងៃទី៣០ ខែកញ្ញា ឆ្នាំ២០២៦ ឯកឧត្តម គង់ គឹមនី អភិបាលខេត្តមណ្ឌលគិរី បានដឹកនាំអាជ្ញាធរខេត្ត និងមន្ត្រីជំនាញ ចុះពិនិត្យដោយផ្ទាល់នូវសកម្មភាពស្ថាបនាផ្លូវបេតុងអាមេថ្មីនេះ ដែលមានប្រវែង ១ ៥០០ ម៉ែត្រ ភ្ជាប់ចាប់ពីចំណុចកែងផ្លូវបំបែកវិមានឯករាជ្យ ស្ថិតក្នុងភូមិដោះក្រមុំ ឆ្ពោះទៅកាន់ភូមិឡៅកា សង្កាត់សុខដុម ក្រុងសែនមនោរម្យ។
ក្នុងឱកាសចុះពិនិត្យនោះ ឯកឧត្តមអភិបាលខេត្ត បានណែនាំ និងជំរុញយ៉ាងម៉ឺងម៉ាត់ដល់ក្រុមហ៊ុនទទួលការម៉ៅការសាងសង់ ត្រូវប្រកាន់ខ្ជាប់នូវបទដ្ឋានបច្ចេកទេស និងគុណភាពសំណង់ជាចម្បង ដើម្បីឱ្យផ្លូវបេតុងនេះមានភាពរឹងមាំ មាំទាំ និងអាចប្រើប្រាស់បានយូរអង្វែង។ត្រូវរៀបចំការដ្ឋាន និងផ្លូវវាងបណ្តោះអាសន្នឱ្យបានល្អប្រសើរ ដើម្បីសម្រួលដល់ការធ្វើដំណើរ និងការប្រកបអាជីវកម្មប្រចាំថ្ងៃរបស់ប្រជាពលរដ្ឋឱ្យជៀសផុតពីការកកស្ទះ ឬគ្រោះថ្នាក់ផ្សេងៗអំឡុងពេលសាងសង់។ត្រូវដាក់ស្លាកសញ្ញាសុវត្ថិភាព ស្លាកសញ្ញាព្រមាន និងភ្លើងបំភ្លឺនាពេលយប់នៅតំបន់ការដ្ឋានសាងសង់ ដើម្បីការពារសុវត្ថិភាពរបស់អ្នកធ្វើដំណើរឆ្លងកាត់។
គម្រោងស្ថាបនាផ្លូវបេតុងថ្មីនេះ នឹងចូលរួមចំណែកយ៉ាងសំខាន់ក្នុងការលើកកម្ពស់មុខមាត់ និងហេដ្ឋារចនាសម្ព័ន្ធរូបវន្តក្នុងក្រុងសែនមនោរម្យ សម្រួលដល់ការដឹកជញ្ជូន និងការធ្វើដំណើររបស់ប្រជាពលរដ្ឋក្នុងមូលដ្ឋាន ព្រមទាំងជួយសម្រួលដល់ការធ្វើដំណើររបស់ភ្ញៀវទេសចរជាតិ និងអន្តរជាតិដែលមកកម្សាន្តក្នុងខេត្តមណ្ឌលគិរីផងដែរ៕
ចែករំលែកព័តមាននេះ