១២ឆ្នាំចុងក្រោយ! ទីម័រខាងកើត មិនធ្លាប់ឈ្នះ កម្ពុជាឡើយ មុនជួបគ្នានៅរសៀលនេះ
- ភ្នំពេញ
ទីក្រុងហុងកុង ៖ ក្រុមបាល់ទាត់ជម្រើសជាតិកម្ពុជា នៅថ្ងៃទី៣០ ខែកញ្ញា វេលាម៉ោង ៤រសៀល (ម៉ោងនៅកម្ពុជា) នឹងត្រូវប្រកួតតទល់ជាមួយទីម័រខាងកើត សម្រាប់ជំនួបចុងក្រោយ ក្នុងពូល B កម្រិត ២ (Division 2) ពានរង្វាន់ FIFA Asian Cup ឆ្នាំ២០២៦ នៅឯកីឡដ្ឋាន Kai Tak នាទីក្រុងហុងកុង។
សម្រាប់ជំនួបរសៀលនេះ កម្ពុជាមានភាគរយខ្ពស់ ដោយត្រូវការត្រឹមស្មើទីម័រខាងកើតប៉ុណ្ណោះ ដើម្បីបានកៅអីវគ្គផ្ដាច់ព្រ័ត្រ។ ដ្បិត១២ឆ្នាំចុងក្រោយ ទីម័រខាងកើតមិនធ្លាប់ឈ្នះកម្ពុជាឡើយ គិតចាប់តាំងពីឆ្នាំ ២០១៤ រហូតមកទល់នេះ ក្រុមទាំងពីរធ្លាប់ជួបគ្នា ៧ លើកមកហើយ ពោលចាញ់ ៦ និងស្មើ ១។
ក្រឡេកទៅប្រវត្តិជួបគ្នាសរុបចំនួន ១១ លើក កម្ពុជាឈ្នះ ៨ លើក ទីម័រខាងកើតឈ្នះ ១ លើក និងស្មើគ្នា ២ លើក។ ការជួបគ្នាចុងក្រោយនៅ ASEAN Hyundai Cup 2026 កាលពីខែសីហាកន្លងទៅ កម្ពុជាបានយកឈ្នះដោយលទ្ធផល ៣-០ នៅពហុកីឡដ្ឋានជាតិមរតកតេជោ។
គួរបញ្ជាក់ថា នៅក្នុងកម្រិត ២ នៃពានរង្វាន់ថ្មីថ្មោង FIFA Asian Cup ឆ្នាំ២០២៦ ដែលប្រព្រឹត្តទៅនៅទីក្រុងហុងកុងនោះ ពូល A ម្ចាស់ផ្ទះហុងកុងកំពុងឈរកំពូលតារាង មាន៣ពិន្ទុស្មើឡាវ ចំណែកព្រុយណេគ្មានពិន្ទុរាប់។ ឡាវឆ្លងកាត់ ២ ប្រកួតរួចហើយ ដោយឈ្នះ ១ និង ចាញ់ ១។ រីឯហុងកុង ត្រូវប៉ះព្រុយណេប្រកួតចុងក្រោយ នៅម៉ោង៧យប់នេះ ដណ្តើមកៅអីវគ្គផ្តាច់ព្រ័ត្រ។
មិនខុសគ្នា នៅក្នុងពូល B កម្ពុជាកំពុងឈរកំពូលតារាង មាន៣ពិន្ទុដូចគ្នានឹងមីយ៉ាន់ម៉ា រីឯទីម័រខាងកើត គ្មានពិន្ទុរាប់។ មីយ៉ាន់ម៉ាឆ្លងកាត់ ២ ប្រកួតរួចហើយ ឈ្នះ ១ និងចាញ់ ១។ ចំណែកកម្ពុជា ត្រូវតទល់នឹងទីម័រខាងកើត នៅប្រកួតចុងក្រោយ សម្រាប់កៅអីវគ្គផ្តាច់ព្រ័ត្រ៕ រូបភាព ៖ សហព័ន្ធកីឡាបាល់ទាត់កម្ពុជា
ចែករំលែកព័តមាននេះ