ទីក្រុងយេរូសាឡឹម៖ ថ្ងៃនេះ អុីស្រាអែលលេងឈុតធំតែម្ដងដោយប្រល័យបានមេធំម្នាក់របស់ក្រុមហាម៉ាស់។ មន្ត្រីរដ្ឋាភិបាលអុីស្រាអែល និងប៉ាឡេស្ទីនសុទ្ធតែអះអាងដូចៗគ្នាថាអុីស្រាអែលបើកប្រតិបត្តិការវាយប្រហារតាមយន្តហោះចម្បាំងពីអាកាសសម្លាប់ប្រធានសាខាក្រុមហាម៉ាស់នៅជ្រោយហ្កាហ្សាខាងជើង លោកអុីស អាល់ឌីន អាល់បេក (Izz al-Din Al-Beik)។ នាយករដ្ឋមន្ត្រីអុីស្រាអែល លោកណឺតាន់យ៉ាហ៊ូ និងរដ្ឋមន្ត្រីការពារជាតិរបស់លោកគឺលោកអុីស្រាអែល ខាត់ (Israel Katz) ថ្លែងថាយោធាអុីស្រាអែលកំណត់គោលដៅដឹងថាលោកបេកស្ថិតនៅទីកន្លែងណា ហើយក៏បាញ់ផ្តក់ចំល្អណាស់ គ្មានខុសអ្វីបន្តិចទេ។ លោកទាំង២អះអាងថាមេហាម៉ាស់រូបនេះចូលរួមច្រើនណាស់នៅក្នុងការរៀបចំផែនការវាយប្រហារទៅលើអុីស្រាអែល និងការជ្រើសរើសយុទ្ធជនសម្រាប់ប្រយុទ្ធនៅក្នុងសមរភូមិ។
នៅថ្ងៃនេះដដែល ក្រុមហាម៉ាស់ចេញសេចក្ដីប្រកាសមួយដើម្បីបញ្ជាក់ថាលោកបេកពិតជាបានទទួលអនិច្ចកម្មហើយនៅក្នុងការវាយប្រហាររបស់អុីស្រាអែល។ ក្រុមគ្រូពេទ្យបញ្ជាក់បន្ថែមថាការវាយប្រហារនោះត្រូវចំអគារអាផាតមឹនមួយកន្លែងនៅទីក្រុងហ្កាហ្សាកាលពីពេលព្រឹកព្រហាម។ ការវាយប្រហារនោះធ្វើឱ្យមនុស្សម្នាក់ទៀតរងរបួស។ ប៉ុន្តែដោយសារមុខរបួសធ្ងន់ធ្ងរពេក គាត់ក៏បានស្លាប់ដែរទៅ។ នេះបើយោងតាមការបញ្ជាក់ពីមន្ត្រីសុខាភិបាលប៉ាឡេស្ទីន។ អុីស្រាអែលអះអាងថាក្រុមហាម៉ាស់មិនដូចការសន្យាពួកគេថាកាត់រំសាយអាវុធនោះឡើយ។ ផ្ទុយទៅវិញ ពួកគេបំពាក់អាវុធឡើងវិញយ៉ាងសកម្ម និងបើកប្រតិបត្តិការវាយប្រហារ។ ដូច្នេះ អុីស្រាអែលចាត់ទុកថានេះជាការរំលោភបទឈប់បាញ់ដែលព្រមព្រៀងគ្នាកាលពីខែតុលាឆ្នាំមុន។
អុីស្រាអែលសំអាងលើហេតុផលនេះក៏បង្កើនការវាយប្រហារលើក្រុមហាម៉ាស់កាន់តែខ្លាំងឡើងៗនារយៈពេលប៉ុន្មានសប្ដាហ៍ចុងក្រោយនេះ។ យោធាអុីស្រាអែលថ្លែងថានៅក្នុងខែកញ្ញានេះ ខ្លួនសម្លាប់ក្រុមហាម៉ាស់យ៉ាងតិចម្ភៃនាក់។ ក្នុងនោះ អ្នកស្លាប់ខ្លះជាមេបញ្ជាការជាន់ខ្ពស់របស់ហាម៉ាស់, ខ្លះជាអ្នកចូលរួមរៀបចំផែនការវាយប្រហារអុីស្រាអែលកាលពីថ្ងៃទី៧ ខែតុលា ឆ្នាំ២០២៣ និងខ្លះទៀតជាអ្នកចាប់ជនជាតិអុីស្រាអែលធ្វើជាចំណាប់ខ្មាំង។ ក្រុមហាម៉ាស់បដិសេធថាខ្លួនគ្មានបានវាយប្រហារអុីស្រាអែល ឬកសាងកម្លាំងទ័ពរបស់ខ្លួនឡើងវិញនោះទេ។ ហាម៉ាស់ចោទប្រកាន់ថាអុីស្រាអែលជាអ្នកធ្វើឱ្យចុះខ្សោយកិច្ចព្រមព្រៀងនៅតំបន់ហ្កាហ្សា។
សូមជម្រាបថាបទឈប់បាញ់ដែលសម្របសម្រួលដោយអាមេរិក និងដែលព្រមព្រៀងគ្នាកាលពីឆ្នាំមុននោះក៏មាននិយាយអំពីការកសាងតំបន់ហ្កាហ្សាឡើងវិញផងដែរ។ ប៉ុន្តែបទឈប់បាញ់នេះហាក់ដូចជាអនុវត្តមិនសូវបានពេញលេញប៉ុន្មានទេដោយហេតុថាក្រុមហាម៉ាស់មិនព្រមទម្លាក់អាវុធចុះ ចំណែកអុីស្រាអែលមិនព្រមដកកងទ័ពពីហ្កាហ្សា។ ភាគីម្ខាងៗទាមទារឱ្យម្ខាងទៀតអនុវត្តមុនទើបខ្លួនអនុវត្តតាមក្រោយ។ ឧទាហរណ៍ ហាម៉ាស់ថាទាល់តែអុីស្រាអែលដកទ័ពសិនទើបខ្លួនទម្លាក់អាវុធ ចំណែកអុីស្រាអែលថាទាល់តែហាម៉ាស់ទម្លាក់អាវុធសិនទើបខ្លួនដកទ័ព។ ចំណុចដែលហាម៉ាស់មិនទម្លាក់អាវុធនេះជាអ្វីដែលអុីស្រាអែលយកធ្វើជាភាពសមហេតុផលដែលខ្លួនត្រូវតែបន្តយុទ្ធនាការវាយប្រហារតាមអាកាស៕ ប្រភព៖ Reuters
ចែករំលែកព័តមាននេះ