កាន់បិណ្ឌវេនទី២! អគ្គិភ័យឆេះសាលាឆាន់ ផ្អើលទាំងយប់
- ព្រៃវែង
ខេត្តព្រៃវែង ៖ ព្រះសង្ឃជាច្រើនអង្គ និងគណៈកម្មការអាចារ្យវត្តរាប់សិបនាក់ បានផ្អើលរត់ជាន់ជើងគ្នាទាំងកណ្ដាលយប់ ដោយសារតែមានអគ្គីភ័យឆាបឆេះនៅលើសាលាឆាន់។
អគ្គីភ័យនេះបានកើតឡើងនៅវេលាម៉ោង 11 និង 20 នាទីយប់ ថ្ងៃទី 28 កញ្ញា នៅលើសាលាឆាន់ ក្នុងទីអារាមវត្តមុន្នីរតនារាម ហៅ វត្តតាកែវ ស្ថិតក្នុងភូមិតាកែវ ឃុំពាមមន្ទា ស្រុកកំពង់ត្របែក ខេត្តព្រៃវែង។
សាលាឆាន់នេះមានទំហំបណ្ដោយ ៣៨ ម៉ែត្រនិងទទឹង ២០ម៉ែត្រ សង់អំពីបេតុងប្រក់ស័ង្កសី ត្រូវបានអណ្ដាតភ្លើងឆាបឆេះនៅចំកណ្ដាលត្រង់ចំណុចបល្ល័ង្កព្រះ ហើយភ្លាមៗត្រូវបានគេដឹងទាន់ និងធ្វើការពន្លត់បានភ្លាមៗ មិនបានបណ្ដាលឱ្យឆេះរាលដាលធ្ងន់ធ្ងរនោះទេ។
សមត្ថកិច្ចបានឲ្យដឹងថា យោងតាមការពិនិត្យជាក់ស្ដែងនៅកន្លែងកើតហេតុ រួមនឹងការបំភ្លឺរបស់ព្រះសង្ឃ និងតាអាចារ្យ បានបញ្ជាក់ថាអគ្គីភ័យនេះឆាបឆេះឡើង ដោយសារភ្លើងទានដែលដុតនៅមុខបល្ល័ង្កព្រះ ដោយគេដុតចោល គ្មានអ្នកនៅមើល ធ្វើឲ្យភ្លើងឆាបឆេះវាំងនននៅខាងលើព្រះកេសពុទ្ធបដិមា បង្កជាអគ្គិភ័យតែម្ដង។
សមត្ថកិច្ចបានបញ្ជាក់ថា ក្រោយកើតមានអគ្គិភ័យខាងលើភ្លាម ក៏មានព្រះសង្ឃនៅក្នុងវត្តបានភ្ញាក់ពីសិង ហើយឃើញអណ្ដាតភ្លើងកំពុងឆេះនៅលើសាលាឆាន់ ក៏ស្រែកផ្អើលឆោឡោឡើង ផ្អើលព្រះសង្ឃនិងតាអាចារ្យ នាំគ្នារត់ចែកជើងគ្នាយកទឹកមកបាញ់ពន្លត់ អស់រយៈពេលជាងមួយម៉ោងទើបភ្លើងរលត់ជាស្ថាពរ។
អគ្គិភ័យនេះបានបណ្ដាលឲ្យខូចខាតសម្ភារ:មួយចំនួនដូចជា វាំងននតាំងលម្អកន្លែងពុទ្ធរូប កម្រាលព្រំ កន្ទេល និងឆេះដំបូលសាលាឆាន់អស់ទំហំ 4 ម៉ែត្រការ៉េ តែមិនបានបណ្ដាលឲ្យព្រះសង្ឃ ឬតាអាចារ្យណាម្នាក់រងរបួសនោះឡើយ ៕
ចែករំលែកព័តមាននេះ