ប្រទេសជប៉ុន ៖ កីឡាការិនីវាយសីជម្រើសជាតិថៃ Pitchamon Opatniputh ដែលកំពុងប្រកួតនៅក្នុងព្រឹត្តិការណ៍កីឡាអាស៊ី (Asian Games) ឆ្នាំ២០២៦ នៅក្នុងប្រទេសជប៉ុន ត្រូវបានបញ្ជាក់សាជាថ្មីថាមានលទ្ធផលតេស្តវិជ្ជមានសារធាតុហាមឃាត់ Furosemide បន្ទាប់ពីលទ្ធផលនៃការពិនិត្យសំណាក B (សំណាកទី២) របស់នាង បង្ហាញលទ្ធផលដូចគ្នាទៅនឹងសំណាក A។ នេះបើតាមការបញ្ជាក់ពីរដ្ឋមន្ត្រីក្រសួងទេសចរណ៍ និងកីឡាថៃ លោក Surasak Phancharoenworakul កាលពីថ្ងៃទី២៨ ខែកញ្ញា។
បើតាមចេញផ្សាយពីសារព័ត៌មានថៃ PBS World បានឱ្យដឹងថា កីឡាការិនីវ័យ១៩ឆ្នាំ Pitchamon ត្រូវបានព្យួរការប្រកួត បន្ទាប់ពីការធ្វើតេស្តប្រឆាំងនឹងសារធាតុហាមឃាត់លើសំណាកដំបូងរបស់នាង ដែលប្រមូលមុនការប្រកួតកាលពីថ្ងៃទី១៧ ខែកញ្ញា បានរកឃើញវិជ្ជមានសារធាតុ Furosemide ឬថ្នាំបញ្ចុះទឹកនោម ដើម្បីបញ្ចេញជាតិទឹកសម្រាប់ការសម្រកទម្ងន់បានលឿន។
ការរកឃើញនេះ ត្រូវបានប្រកាសដោយទីភ្នាក់ងារតេស្តសារធាតុហាមឃាត់អន្តរជាតិ ITA កាលពីថ្ងៃទី២១ ខែកញ្ញា ដែលធ្វើឱ្យនាងមិនមានសិទ្ធិគ្រប់គ្រាប់ចូលរួមប្រកួតក្នុងព្រឹត្តិការណ៍ Asian Games។ នេះជាករណីដំបូងបង្អស់ផងដែរ សម្រាប់ព្រឹត្តិការណ៍ដែលកំពុងដំណើរការនៅប្រទេសជប៉ុនមួយនេះ។
យ៉ាងណាមិញ នាងបានស្នើសុំឱ្យធ្វើតេស្តសំណាក B ដែលត្រូវបានបញ្ជូនទៅពិនិត្យកាលពីថ្ងៃទី២៤ ខែកញ្ញា។ ទោះយ៉ាងណាក៏ដោយ រដ្ឋមន្ត្រីកីឡាថៃ ដែលកំពុងស្ថិតនៅក្នុងទីក្រុងណាហ្គូយ៉ា សម្រាប់ព្រឹត្តិការណ៍ Asian Games ថ្លែងថា សំណាក B របស់នាងបានបង្ហាញលទ្ធផលដូចគ្នានឹងសំណាកដំបូង ពោលនៅតែវិជ្ជមានសារធាតុ Furosemide ពិតមែន។
លោក Surasak បានបន្តថា អាជ្ញាធរពាក់ព័ន្ធនឹងកំណត់ការពិន័យដែល Pitchamon អាចនឹងត្រូវប្រឈមមុខ។ ប៉ុន្តែទោះជាយ៉ាងណាក៏ដោយ នាងត្រូវតែដោះស្រាយរឿងនេះ តាមរយៈដំណើរការប្ដឹងឧទ្ធរណ៍។ ចំពោះរបៀបដែលសារធាតុនោះចូលទៅក្នុងរាងកាយរបស់នាង លោក Surasak បញ្ជាក់ថា អាចមកពីថ្នាំ ឬផលិតផលគ្រឿងសម្អាង ដែលស្លាកសញ្ញាវាមិនបានបញ្ជាក់ច្បាស់លាស់ពីសារធាតុហាមឃាត់ក្នុងគ្រឿងផ្សំនោះទេ។ លោកបន្ថែមថា នេះអាចមានន័យថា អត្តពលិករូបនេះ មិនបានដឹងខ្លួនថា សារធាតុហាមឃាត់បានចូលទៅក្នុងរាងកាយរបស់នាងឡើយ៕
ចែករំលែកព័តមាននេះ