យុវតីម្នាក់មានជំងឺវិបល្លា.ស ត្រូវម្តាយចុះចា.លតាំងពីតូច នៅជាមួយឪពុកដើររើសអេតចាយ រស់ក្រោមដំបូលតង់ធ្លុះធ្លាយ ជីវភាពទីទាល់ក្រ
- ព្រះសីហនុ
ខេត្តព្រះសីហនុ ៖ ព្រះគ្រូឆន្ទវិសសិទ្ធិ មាសសុផល ព្រះរាជាគណៈថ្នាក់កិត្តិយសជាព្រះបាឡាត់គណខេត្តព្រះសីហនុ និងជាចៅអធិការវត្តអូរត្រេះ ដែលមានទីតាំងស្ថិតនៅក្នុងភូមិ៦ សង្កាត់លេខ៤ ក្រុងព្រះសីហនុ ខេត្តព្រះសីហនុ កាលពីរសៀលថ្ងៃទី២៥ ខែ កញ្ញា ឆ្នាំ ២០២៦កន្លងមកថ្មីៗនេះ បានប្រគល់គ្រឿងឧបភោគបរិភោគនិងភេសជ្ជៈ រួមជាមួយថវិកាមួយចំនួនដែលទទួលបានពីការធ្វើទានរបស់ពុទ្ធបរស័ទជិតឆ្ងាយនៅក្នុងគ្រាកន្លងមក ត្រូវបានព្រះតេជគុណប្រគល់ជូនលោក រស់ ភីណា សហការីអ្នកយកព័ត៌មានកាសែតកោះសន្តិភាព ប្រចាំខេត្តព្រះសីហនុ ដើម្បីយកទៅប្រគល់ជូនយុវតីឈ្មោះយ៉ុន ផៃយ៉ាណា អាយុ១៧ឆ្នាំ មានជំងឺវិប្បល្លាសប្រចាំកាយ ត្រូវម្តាយចុះចោលចាប់តាំងពីអាយុបានបីខួបមកម្លេះ រស់នៅជាមួយឪពុកឈ្មោះកែវ ចន្ទី អាយុ៤៥ ឆ្នាំ ប្រកបរបររើសអេតចាយ ស្នាក់នៅក្រោមដំបូលតង់ធ្លុះធ្លាយ ដោយសុំដីឡូតិ៍ទំនេររបស់គេស្នាក់នៅបណ្តោះអាសន្ន ស្ថិតក្នុងក្រុម០២ ភូមិ០២ សង្កាត់លេខ០១ ក្រុងព្រះសីហនុ ខេត្តព្រះសីហនុ។
តាមការឱ្យដឹងពីបងប្អូនប្រជាពលរដ្ឋដែលមានលំនៅឋានក្បែរផ្ទះយុវតីកំព្រាម្តាយហើយមានជម្ងឺវិបល្លាស បានឲ្យដឹងថាគ្រួសារយុវតីយ៉ុន ផៃយ៉ាណា ដែលមានជម្ងឺប្រចាំកាយនេះ មានឪពុកប្រកបរបរជាអ្នកដើររើសអេតចាយ ដើម្បីដោះស្រាយជីវភាពប្រចាំថ្ងៃ រកព្រឹកខ្វះល្ងាច កូនស្រីមានជំងឺវិបល្លាសជាច្រើនឆ្នាំកន្លងមក មិនមានថវិការសម្រាប់យកកូនទៅពិគ្រោះជាមួយគ្រូពេទ្យដើម្បីព្យាបាល ហេតុនេះហើយទើបប្រពន្ធគេចុះចោលទុកឲ្យកូនស្រីនិងឪពុករស់នៅកណ្តោចកណ្តែងទ្រាំតាមយថាកម្មក្រោមមដំបូលតង់ដែលលេចមុខលេចក្រោយស្ទើររកកន្លែងសម្រាកមិនបាន.។ មានពេលខ្លះភ្លៀងធ្លាក់មកខ្លាំងឡើងអង្គុយទាំងពីរនាក់ឪពុកនិងកូនទំរាំភ្លៀងរាំង ទើបសម្រាកបានបន្តទៀតជីវិតពោរពេញដោយក្តីវេទនាយ៉ាងខ្លាំង ។
ចំពោះគ្រឿងឧប្បភោគបរិភោគដែលបានយកមកប្រគល់ជូនរួមមានដូចជា ១-អង្ករ០១បាវ មានទម្ងន់២៥គីឡូក្រាម, មីជាតិ១កេសនិង៥កញ្ចប់ ទឹកស៊ីអ៊ីវ ទឹកត្រី ប្រេងឆា ទឹកប្រេងខ្យង ទឹកផ្លែឈើ ទឹកបរិសុទ្ធ០១កេសនិងថវិកាមួយចំនួនផងដែរ ។
ព្រះតេជគុណបានមានសង្ឃដីការបញ្ជាក់ឲ្យដឹងបន្ថែមទៀតថា ដោយមើលឃើញអំពីស្ថានភាពមានជម្ងឺប្រចាំកាយធ្លាក់ខ្លួនពិការភាពផ្នែកវិបល្លាសកំព្រាម្តាយ ថែមទាំងលំបាកខ្វះខាតនៅក្នុងជីវភាពគ្រួសារ យើងត្រូវតែជួយសម្រួលការលំបាក ដោយបរិច្ចាគទានជួយដល់សាធុជនដោយមិនប្រកាន់ពូជសាសន៍ ពណ៌សម្បុរ ឬនិន្នាការនយោបាយអ្វីឡើយ ហើយបើទោះបីជាការផ្តល់អំណោយជាគ្រឿងឧប្បភោគបរិភោគនិងភេសជ្ជៈ និងថវិកានាពេលនេះ មានចំនួនបន្តិចបន្តួចក្តី តែអាចជួយសម្រួលដល់ជីវភាពខ្វះខាតប្រចាំថ្ងៃបានមួយរយៈ និងជាការចែករំលែក (ជួយគ្នានៅក្នុងគ្រាក្រ និងគ្រាដ៍លំបាកខាងលើនេះ) ។
ឪពុកយុវតីខាងលើបានលើកដៃទាំងទ្វេសំពះថ្លែងអំណរគុណចំពោះព្រះតេជគុណព្រះគ្រូ ឆន្ទវិសិទ្ធិ មាស សុផល ព្រះរាជាគណៈថ្នាក់កិត្តិយសជាព្រះបាឡាត់គណ ខេត្តព្រះសីហនុនិងជាចៅអធិការវត្តអូរត្រេះ ដែលមានទឹកប្រទ័យអាណិតអាសូរដល់ជនទីទ័លក្រដូចរូបគាត់និងសូមប្រគេនពរជូនដល់ព្រះអង្គ សូមទទួលបានព្រះសុខភាពល្អព្រះកាយមាំមួនដើម្បីបន្តដឹកនាំវិស័យពុទ្ធចក្រឲ្យកាន់តែរីកចម្រើនបន្ថែមទៀត។
គួររំលឹកឡើងវិញថានេះជាសកម្មភាពអំណោយសប្បុរសធម៌របស់ព្រះតេជគុណព្រះគ្រូ ឆន្ទវិសិទ្ធិ មាស សុផល ព្រះរាជាគណៈថ្នាក់កិត្តិយសជាព្រះបាឡាត់គណ ខេត្តព្រះសីហនុនិងជាចៅអធិការវត្តអូរត្រេះលើកទី៥ ដែលអ្នកយកព័ត៌មានយើងបានពាំនាំយកមកចែកជូនដល់ជនទីទ័លក្រនៅក្នុងក្រុងព្រះសីហនុ ដែលជាសកម្មភាពចូលរួមចំណែកមនុស្សធម៌ជាមួយប្រមុខរាជរដ្ឋាភិបាលយើង៕
ចែករំលែកព័តមាននេះ