ប៉ុស្តិ៍នគរបាលច្រកទ្វារអន្តរជាតិភ្នំដិន ដាក់ចេញផែនការ ៨ ចំណុច ដើម្បីពង្រឹងប្រសិទ្ធភាពការងារអន្តោប្រវេសន៍ និងសន្តិសុខព្រំដែន
- តាកែវ
ខេត្តតាកែវ ៖ នៅថ្ងៃទី២៨ ខែកញ្ញា ឆ្នាំ២០២៦នេះ លោកវរសេនីយ៍ឯក ឈួន សុវណ្ណនរា នាយប៉ុស្តិ៍ បានដឹកនាំបើកកិច្ចប្រជុំត្រួតពិនិត្យ ពង្រឹងការងារជំនាញអន្តោប្រវេសន៍ និងសួរសុខទុក្ខកងកម្លាំង នៅប៉ុស្តិ៍នគរបាលច្រកទ្វារព្រំដែនអន្តរជាតិភ្នំដិន។
លោកវរសេនីយ៍ឯកឈួន សុវណ្ណនរា នាយប៉ុស្តិ៍ច្រកទ្វារព្រំដែនអន្តរជាតិភ្នំដិន បានអោយដឹងថាកិច្ចប្រជុំនេះក៏បានផ្សព្វផ្សាយអំពីខ្លឹមសារ និងដាក់ផែនការសំខាន់ៗមួយចំនួន៨ចំនុចខាងក្រោម៖
ទី១-ផ្សព្វផ្សាយដល់កងកម្លាំងនូវប្រកាសលេខ ៨៧៣ ប្រ.ក ស្តីពីបទវិន័យនគរបាលជាតិកម្ពុជា
ទី២-ផ្សព្វផ្សាយសេចក្តីណែនាំលេខ ០០២ ស.ណ.ន/អ.អ ស្តីពីការពង្រឹងប្រសិទ្ធភាពនៃការគ្រប់គ្រងមន្ត្រីនគរបាលអន្តោប្រវេសន៍ នៃអគ្គនាយកដ្ឋានអន្តោប្រវេសន៍
ទី៣-ផ្សព្វផ្សាយគោលការណ៍ណែនាំលេខ ០០៣ ស.ណ.ន/អ.អ ស្តីពីនីតិវិធីសម្រាប់មន្ត្រីប៉ុស្តិ៍នគរបាល ច្រកទ្វារអន្តរជាតិ និងច្រកទ្វារព្រំដែនអន្តរជាតិ អនុវត្តចំពោះអ្នកដំណើរចូល-ចេញឆ្លងកាត់ ព្រះរាជាណាចក្រកម្ពុជា
ទី៤-ត្រូវមានសាមគ្គីភាពផ្ទៃក្នុង រក្សាការស្ងាត់អង្គភាព គោរពបទបញ្ជារបស់អង្គភាព មិនត្រូវរើសអើងប្រកាន់បក្ខពួកក្នុងអង្គភាព
ទី៥-ទទួលខុសត្រូវចំពោះតួនាទីភារកិច្ចរបស់ខ្លួន ត្រូវមានភាពស្មោះត្រង់ចំពោះជាតិ សាសនា ព្រះមហាក្សត្រ និងរាជរដ្ឋាភិបាលស្របច្បាប់
ទី៦-បន្ដយកចិត្តទុកដាក់ត្រួតពិនិត្យស្រី្តជនជាតិខ្មែរអាយុចាប់ពី១៨-៣៥ឆ្នាំ ជៀសវាងចាញ់បោកមេខ្យល់ទៅធ្វើការងារនៅក្រៅប្រទេស(ករណីជួញដូរ)
ទី៧-ហាមដាច់ខាតអនុវត្តផ្ទុយពីច្បាប់អន្តោប្រវេសន៍ ក៏ដូចជាសៀវភៅគោលជំនាញអន្តោប្រវេសន៍
ទី៨-គោលដៅស្លាបឆ្វេង ស្លាបស្តាំ បង្កើនការត្រួតពិនិត្យ២៤/២៤ ក្នុងការទប់ស្កាត់ទំនិញរត់គេចពន្ធខុសច្បាប់ ក៏ដូចជាការឆ្លងកាត់ព្រំដែនខុសច្បាប់ ក្នុងមូលដ្ឋានរបស់ប៉ុស្តិ៍គ្រប់គ្រង ៕
ចែករំលែកព័តមាននេះ