ខេត្តសៀមរាប ៖ មន្ដ្រីជាន់ខ្ពស់អាជ្ញាធរអប្សរាថ្លែងឱ្យដឹងថា រយៈពេល៧ខែក្នុងឆ្នាំ២០១១ នេះភ្ញៀវទេសចរអន្ដរជាតិទិញសំបុត្រចូលទស្សនារមណីយដ្ឋានប្រវត្ដិសាស្ដ្រអង្គរមានចំនួនកើនឡើងជិត២៦ ភាគរយបើធៀបទៅនឹងរយៈពេលដូចគ្នាកាលពីឆ្នាំទៅមិញ ដោយផ្តល់ចំណូលប្រមាណជាង២៤លានដុល្លារអាមេរិក។
លោកម៉ី ម៉ារាឌី អគ្គនាយករងអាជ្ញាធរអប្សរា ទទួលបន្ទុកនាយកដ្ឋានអភិវឌ្ឍទេសចរណ៍អង្គរ នៃអគ្គនាយកដ្ឋានអាជា្ញធរអប្សរាមានប្រសាសន៍ថា នៅក្នុងរយៈពេល៧ខែ ក្នុងឆាំ្ន ២០១១នេះ ចំនួនភ្ញៀវទេសចរអន្ដរជាតិទិញសំបុត្រចូលទស្សនាតំបន់អង្គរមានចំនួន ៨១៥.០៨៤នាក់ កើនឡើង២៥,៨៩ភាគរយ បើប្រៀបធៀបទៅនឹងរយៈពេល៧ខែ ដូចគ្នាក្នុងឆ្នាំ២០១០ កន្លងទៅ ដែលមានចំនួនប្រជាង២សែននាក់ ប៉ុណ្ណោះដោយផ្តល់ចំណូលដុលប្រមាណជាង២៤លានដុល្លារអាមេរិក។
លោកបន្ថែមថា តាមធម្មតាចំពោះការលក់សំបុត្រ រដ្ឋាភិបាលផ្ដល់សិទ្ធិទៅឱ្យក្រុមហ៊ុនសុខារបស់អ្នកឧកញ៉ាសុខ គង់ ដែលក្នុងនោះសំបុត្រត្រូវចែកជាបីប្រភេទ និងតម្លៃរបស់វាក៏ផ្សេងៗគ្នាដែរ គឺសំបុត្រតម្លៃ២០ ដុល្លារ សម្រាប់រយៈពេលមួយថ្ងៃ សំបុត្រតម្លៃ៤០ដុល្លារ សម្រាប់រយៈពេល៣ថ្ងៃ និងសំបុត្រតម្លៃ៦០ដុល្លារសម្រាប់រយៈពេល៧ថ្ងៃ ហើយភ្ញៀវភាគច្រើនគេទិញសំបុត្រសម្រាប់មួយថ្លៃ ។
លោកបញ្ជាក់ថា កន្លងមកតែងតែមានការលើកឡើងបែបចោទប្រកាន់ពីអ្នកនយោបាយមួយចំនួនទាក់ទិនទៅ នឹងចំណូលបានមកពីការលក់សំបុត្រចូលទស្សនាអង្គរថា មានចំនួនលើសពីនេះរាប់សិបដង គឺដោយសារតែពួកអ្នកទាំងនោះគណនាតាមរបៀបយកចំនួនភ្ញៀវទេសចរអន្ដរជាតិ ទាំងអស់ ដែលចូលមកកាន់ខេត្ដសៀម រាប ទៅគុណជាមួយសំបុត្រដែលមានតម្លៃខ្ពស់បំផុត ដែលការគិត បែបហ្នឹងជាចេតនាកេងចំណេញផ្នែកនយោបាយទាំងស្រុង។
អគ្គនាយកអាជ្ញាធរអប្សរាលោកប៊ុន ណារិទ្ធ ដែលគ្រប់គ្រងរមណីយដ្ឋានវប្បធម៌ប្រវត្ដិសាស្ដ្រ អង្គរមានប្រសាសន៍បកស្រាយនៅក្នុងកម្មវិធីសមធម៌ប្រចាំសបា្ដហ៍ របស់អគ្គនាយកដ្ឋានទូរទស្សន៍ជាតិកម្ពុជាតិថា ចំណូលដែលបានមកពីការលក់សំបុត្រទាំងអស់ត្រូវបានរាជរដ្ឋាភិបាលបែងចែកទៅតាមកិច្ចសន្យាវនិយោគដោយក្នុងនោះចំណូល១៥ភាគរយ ត្រូវរំលែកទៅឱ្យមូលនិធិអភិវឌ្ឍតំបន់អង្គរ ដែលគ្រប់គ្រងដោយរាជរដ្ឋាភិបាលសម្រាប់រៀបចំហេដ្ឋារចនាសម្ពន្ធ័ស្ពាន ផ្លូវ ឬក៏រៀបបណ្ដាញអគ្គិសនី គឺនិយាយរួមសម្រាប់អភិវឌ្ឍក្នុងតំបន់អង្គរផ្ទាល់។
លោកបន្ថែមទៀតថា «យើងមានការប្រយ័ត្នប្រយែងខ្ពស់បំផុតចំពោះសំបុត្រចូលទស្សនាអង្គរ គឺយើងមានគណៈកម្មការអន្ដរក្រសួងមួយគ្រប់គ្រងបោះពុម្ពត្រឹមត្រូវមុន នឹងប្រគល់ឱ្យខាងអាជ្ញាធរអប្សរា ហើយបន្ដទៅឱ្យក្រុមហ៊ុនសុខាលក់ទៅឱ្យភ្ញៀវទេសចរ។
បណ្ណ័ចូលទស្សនានោះមានលេខរៀងតជាប់គ្នាហូរហែ។ យើងទទួលយកមកប៉ុន្មាន ក្បាលត្រូវប្រគល់ទៅឱ្យក្រុមហ៊ុនសុខា យកទៅលក់ឱ្យភ្ញៀវ បើក្នុងករណីសល់ យើងយកមកពិនិត្យផ្ទៀងផ្ទាត់លេខវិញ គឺត្រូវពិនិត្យយ៉ាងយកចិត្ដទុកដាក់បំផុតមិនឱ្យមានការភ្លាំងភ្លាត់ឡើយ»។
យោងទៅតាមរបាយការណ៍ ប្រាំខែដើមឆ្នាំ ២០១១ របស់មន្ទីរទេសចរណ៍ខេត្ដសៀមរាបបង្ហាញឱ្យដឹងថា ចំនួនភ្ញៀវទេសចរអន្ដរជាតិចូលមកកាន់ទឹកដីប្រវត្ដិសាស្ដ្រខេត្ដសៀមរាបដ៏ល្បីល្បាញរបស់ព្រះរាជាណាចក្រកម្ពុជាក្នុងរយៈកាលប្រាំខែដើមឆ្នាំនេះ សរុបមានចំនួន១.៤៤៣.២០៣នាក់ ប៉ុន្ដែភ្ញៀវទេសចរមួយចំនួនមិនបានទិញសំបុត្រចូលទស្សនាអង្គរទេគ្រាន់តែធ្វើដំណើរឆ្លងកាត់។ ចំណែកភ្ញៀវគណៈប្រតិភូ ឬក៏អ្នកសិក្សាស្រាវជ្រាវជាដើមមិនតម្រូវឱ្យយកលុយទេសម្រាប់ចូលក្នុងតំបន់អង្គរ ដូច្នេះហើយបានជាតួលេខរវាងស្ថានប័នទាំងពីរនេះមានការខុសគ្នា៕
ចែករំលែកព័តមាននេះ