ទីក្រុងហុងកុង ៖ កីឡាករ ស៊ិន កក្កដា ម្ចាស់គ្រាប់បាល់ជ័យជម្នះ សម្រាប់ក្រុមបាល់ទាត់ជម្រើសជាតិកម្ពុជា នៅក្នុងការប្រកួតបើកឆាកពានរង្វាន់ថ្មី FIFA ASEAN Cup កម្រិតទី២ ឆ្នាំ២០២៦ បានប្រាប់សហព័ន្ធបាល់ទាត់ពិភពលោក (FIFA) ថា បើមានឱកាសរូបគេចង់ប្តូរអាវជាមួយកីឡាករឆ្នើម Lamine Yamal។
ខ្សែបម្រើ ស៊ិន កក្កដា បានស៊ុតគ្រាប់បាល់ជ័យជម្នះ នៅចុងម៉ោង ពោលនាទី ៩០+៤ ជូនក្រុមគោព្រៃកម្ពុជាលើមីយ៉ាន់ម៉ា ដោយលទ្ធផល ១-០ ការប្រកួតបើកឆាកពានរង្វាន់ FIFA ASEAN Cup កម្រិតទី២ កាលពីថ្ងៃទី២៧ ខែកញ្ញា ឆ្នាំ២០២៦ ដែលធ្វើឡើងនៅទីក្រុងហុងកុង។
ក្រោយចប់ការប្រកួត ក្រុមការងារផ្សព្វផ្សាយ FIFA បានសម្ភាសន៍ខ្សែបម្រើកម្ពុជារូបនេះ ដោយបានបង្ហាញក្តីសុបិនមួយ ដែលជាក្តីសុបិនហួសឆ្ងាយពីត្រឹមភាពជោគជ័យក្នុងពានរង្វាន់ FIFA ASEAN Cup ដែលកំពុងប្រព្រឹត្តទៅនេះ។ កក្កដា បានពន្យល់ប្រាប់ FIFA ថា ប្រសិនបើកម្ពុជាអាចបន្តដំណើរឆ្ពោះទៅមុខប្រកបដោយភាពលេចធ្លោដូចពេលនេះ នោះការប្រកួតពានរង្វាន់ FIFA World Cup លើកក្រោយ (ឆ្នាំ ២០៣០) ក៏អាចទៅរួច ហើយនៅពេលដែលគោលដៅនោះត្រូវបានសម្រេច នោះនៅសល់គោលដៅចុងក្រោយមួយទៀតប៉ុណ្ណោះ សម្រាប់កីឡាកររូបនេះ។
ស៊ិន កក្កដា បាននិយាយថា «ប្រសិនបើខ្ញុំគិតពីអ្នកដែលខ្ញុំចង់ប្តូរអាវជាមួយនៅឆ្នាំ ២០៣០ នោះច្បាស់ជា Lamine Yamal ហើយ! ពិតណាស់ យើងមិនដឹងថាអាចទៅដល់ព្រឹត្តិការណ៍ World Cup ឆ្នាំ ២០៣០ ឬយ៉ាងណានោះទេ ប៉ុន្តែក្នុងនាមជាកីឡាករម្នាក់ វាគឺជាអ្វីដែលខ្ញុំប្រាថ្នាចង់សម្រេចឱ្យបានខ្លាំងបំផុត និងឱ្យបានឆាប់តាមដែលអាចធ្វើទៅបាន។ យើងមានបំណងប្រាថ្នាមួយជាមួយគ្រូបង្វឹករបស់យើង ក្នុងការនាំកម្ពុជាទៅកាន់ព្រឹត្តិការណ៍ World Cup ហើយខ្ញុំនឹងធ្វើគ្រប់យ៉ាងតាមដែលអាចធ្វើទៅបាន ដើម្បីជួយក្រុមឱ្យសម្រេចបាននូវគោលដៅនោះ»។
គួរបញ្ជាក់ថា ជ័យជម្នះលើមីយ៉ាន់ម៉ា កាលពីថ្ងៃទី២៧ ខែកញ្ញា កម្ពុជាមានឱកាសខ្ពស់បន្តឡើងទៅវគ្គផ្តាច់ព្រ័ត្រពានរង្វាន់ FIFA ASEAN Cup កម្រិតទី២ ដោយក្រុមរបស់លោក Koji Gyotoku ត្រូវការត្រឹមស្មើការប្រកួតបន្ទាប់ជាមួយទីម័រខាងកើត នាថ្ងៃទី៣០ ខែកញ្ញា ឆ្នាំ ២០២៦។ ដ្បិតកម្ពុជាកំពុងឈរនៅកំពូលតារាងពូល B ខណៈដែលមីយ៉ាន់ម៉ាក៏មាន៣ពិន្ទុដែរ ប៉ុន្តែអស់ប្រកួតសន្សំពិន្ទុហើយ៕ ប្រភព ៖ FIFA
ចែករំលែកព័តមាននេះ