អាជ្ញាធរខេត្តមណ្ឌលគិរី ចុះត្រួតពិនិត្យ និងណែនាំឱ្យបញ្ឈប់សកម្មភាពល្បែ.ងស៊ីសងអនឡាញខុសច្បាប់ ៣ទីតាំង នៅតាមព្រំដែន
- មណ្ឌលគិរី
ខេត្តមណ្ឌលគិរី ៖ អាជ្ញាធរខេត្តមណ្ឌលគិរី ដឹកនាំដោយលោក ងិន សុវិមាន អភិបាលរងខេត្តបានចុះត្រួតពិនិត្យ ណែនាំ និងឲ្យបញ្ឈប់ការលេងល្បែងអនឡាញខុសច្បាប់គ្រប់ប្រភេទ (Gambling Online និង Betting Online) ស្ថិតនៅតំបន់ជាប់ព្រំដែន ក្នុងភូមិសាស្ត្រខេត្តមណ្ឌលគិរី សរុបចំនួន ០៣ទីតាំង កាលពីថ្ងៃទី២៤ ខែកញ្ញា ឆ្នាំ២០២៦។
សេចក្តីរាយការណ៍បានឱ្យដឹងថា លទ្ធផលនៃការចុះត្រួតពិនិត្យនេះរួមមាន ទីតាំងទី១ ស្ថិតនៅជិតច្រកទ្វារព្រំដែនទ្វេភាគីដាក់ដាំ ស្រុកអូររាំង (ក្រុមហ៊ុន រីសត អហ្វ មណ្ឌលគិរី អេនធើធេនមិន កូអិលធីឌី)។ តាមការបញ្ជាក់ពីអ្នកតំណាងឈ្មោះ ផន ភារក្ស (ភេទប្រុស សញ្ជាតិខ្មែរ) បានឲ្យដឹងថា ទីតាំងនេះបានផ្អាកសកម្មភាព និងបិទទ្វារប្រមាណជាង ៣ខែមកហើយ។
ទីតាំងទី២ ស្ថិតនៅក្បែរទីតាំងទី១ ដោយត្រូវបានបិទទ្វារ និងចាក់សោច្រកផ្លូវចូល ព្រមទាំងគ្មានអ្នកតំណាង ឬបុគ្គលិកប្រចាំការនោះទេ ជាហេតុធ្វើឲ្យក្រុមការងារមិនអាចចូលទៅពិនិត្យខាងក្នុងបានឡើយ។ទីតាំងទី៣ ស្ថិតនៅតំបន់ព្រំដែនច្រកទ្វារទ្វេភាគីណាមលៀ ស្រុកពេជ្រាដា។
លោក ងិន សុវិមាន អភិបាលរងខេត្តមណ្ឌលគិរី បានមានប្រសាសន៍ថា រដ្ឋបាលខេត្ត និងអាជ្ញាធរមានសមត្ថកិច្ចមិនបណ្តែតបណ្តោយឲ្យមានការបើកអាជីវកម្មល្បែងស៊ីសង ឬល្បែងអនឡាញខុសច្បាប់ណាមួយកើតឡើងនៅក្នុងភូមិសាស្ត្រខេត្តឡើយ ដើម្បីធានារក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពជូនប្រជាពលរដ្ឋ។
លោកអភិបាលរងខេត្ត ក៏បានណែនាំយ៉ាងម៉ឺងម៉ាត់ដល់តំណាងក្រុមហ៊ុនដែលពុំទាន់មានច្បាប់ ត្រូវផ្អាករាល់សកម្មភាពទាំងឡាយណាដែលផ្ទុយនឹងច្បាប់ ហើយត្រូវប្រញាប់ប្រញាល់រៀបចំឯកសារស្នើសុំអាជ្ញាប័ណ្ណប្រកបអាជីវកម្មកាស៊ីណូឲ្យបានត្រឹមត្រូវ ពីគណៈ កម្មការគ្រប់គ្រងល្បែងពាណិជ្ជកម្មកម្ពុជា (គ.ល.ក) ជាមុនសិន ទើបអាចធ្វើអាជីវកម្មបានស្របតាមច្បាប់ជាធរមាន៕
ចែករំលែកព័តមាននេះ