ខេត្តប៉ៃលិន ៖ រហូតមកដល់ថ្ងៃទី២៥ ខែកញ្ញា ឆ្នាំ២០២៥នេះ មន្ទីរជំនាញធនធានទឹក និងឧត្តុនិយមខេត្តប៉ៃលិន បានសហការជាមួយនឹងរដ្ឋបាលស្រុកសាលាក្រៅ ដឹកនាំកម្លាំងសមត្ថកិច្ចចម្រុះបន្តចុះពិនិត្យមើលស្ថានភាពទឹកជំនន់ ដែលកំពុងតែជន់ឡើងខ្លាំងនៅតាមដងស្ទឹង រួចហូរចូលទៅតាមភូមិមួយចំនួន ស្ថិតនៅក្នុងឃុំស្ទឹងត្រង់ ស្រុកសាលាក្រៅ ខេត្តប៉ៃលិន ដើម្បីជួយជន្លៀសប្រជាពលរដ្ឋទទួលរងការលិចលង់ឱ្យប្រញាប់ទៅរកទីទួលសុវត្ថិភាព ។
ប្រភពព័ត៌មានបានឱ្យដឹងថា ដោយសារតែភ្លៀងធ្លាក់ជោកជាំអស់រយៈពេលច្រើនថ្ងៃជាប់ៗគ្នា ធ្វើឱ្យទឹកអូរ និងទឹកស្ទឹងហក់ឡើងយ៉ាងឆាប់រហ័ស រហូតដល់ហូរចូលទៅក្នុងភូមិរបស់ប្រជាពលរដ្ឋដែលស្ថិតនៅកន្លែងដីទំនាប ទើបលោក ង៉ា លីហុង ប្រធានមន្ទីរធនធានទឹក និងឧតុនិយមខេត្តប៉ៃលិន ដឹកនាំក្រុមការងារ ដោយសហការជាមួយលោក សៀ សុខុម អភិបាលស្រុក ដោយមានការចូលរួមពីប្រធានក្រុមប្រឹក្សាស្រុកសាលាក្រៅ លោកមេឃុំ ដឹកនាំកម្លាំងសត្ថកិច្ចចម្រុះ ចុះពិនិត្យស្ថានភាពទឹកជំនន់ ក្នុងឃុំសាលាក្រៅ និងឃុំស្ទឹងត្រង់ ស្រុកសាលាក្រៅ ជាពិសេសនៅតាមតំបន់ដីទំនាប តាមដងស្ទឹងកុយ និងអូរនានាផងដែរ ។
សូមបញ្ជាក់ផងដែរថា កាលពីថ្ងៃទី២៤ ខែកញ្ញា ឆ្នាំ២០២៦ ភ្លៀងធ្លាក់ក្នុងកម្រិតច្រើន គ្របដណ្តប់ទូទាំងខេត្ត បានបណ្តាលឱ្យមានជំនន់តាមដងស្ទឹង និងដងអូរជាច្រើនទូទាំងខេត្ត ពិសេសស្រុកសាលាក្រៅ ដែលស្ថិតនៅផ្នែកខាងក្រោមមានទឹកហក់ឡើងយ៉ាងខ្លាំង កើតទៅជាជំនន់ បានប៉ះពាល់លំនៅដ្ឋានរបស់ប្រជាពលរដ្ឋ ក៏ដូចជាជន់លិចផ្លូវមួយចំនួនក្នុងរយៈពេលខ្លី បណ្តាលឱ្យហូរដាច់ខូចជាអន្លើរ ។
ប្រភពព័ត៌មាន បានបន្តទៀតថា នៅវេលាម៉ោង០៨និង០០នាទីព្រឹក ថ្ងៃទី២៥ ខែកញ្ញា ឆ្នាំ២០២៦ មានករណីភ្លៀង និងលាយឡំដោយខ្យល់កន្ត្រាក់ បណ្តាលឱ្យផ្ទះប្រជាពលរដ្ឋ រងផលប៉ះពាល់ដោយសារជំនន់ទឹកភ្លៀង មានចំនួន២៥ខ្នងផ្ទះ ស្មើនឹង២ឃុំ ស្ថិតក្នុងឃុំស្ទឹងត្រង់ និងឃុំសាលាក្រៅ ។ ទី១- ឃុំស្ទឹងត្រង់ ទទួលរងផលប៉ះពាល់ ចំនួន១៦ខ្នងផ្ទះ នៅចំណុចវត្តផ្ទះស្បូវ ភូមិផ្ទះស្បូវ ឃុំស្ទឹងត្រង់ ស្រុកសាលាក្រៅ ទី២- ឃុំសាលាក្រៅ ទទួលរងផលប៉ះពាល់ចំនួន១៩ខ្នងផ្ទះ – ស្ថិតនៅចំណុចជិតស្ពានឆ្លងទៅភូមិស្រែអន្ទាក់ ភូមិភ្នំកុយ មានប្រជាពលរដ្ឋ ដែលជាប់នៅក្នុងទឹកជំនន់ចំនួន២គ្រួសារ ស្មើនឹងមនុស្សចំនួន៥នាក់ ស្រីចំនួន៣នាក់ ។
ប្រភពដដែលបញ្ជាក់ថា កម្លាំងនៃអធិការដ្ឋាននគរបាលស្រុកសាលាក្រៅ និងកម្លាំងប៉ុស្តិ៍នគរបាលរដ្ឋបាលសាលាក្រៅ សហការជាមួយកម្លាំងគណៈបញ្ជាការឯកភាពស្រុក និងកម្លាំងនៃស្នងការដ្ឋាននគរបាលខេត្តប៉ៃលិន និងកងកម្លាំងកងរាជអាវុធហត្ថស្រុក បានធ្វើការសង្គ្រោះបងប្អូនប្រជាពលរដ្ឋ ដែលនៅជាប់ក្នុងទឹកជំនន់បានមកដល់ទីទួលមានសុវត្ថិភាព ។
បច្ចុប្បន្នកម្លាំង នៃអធិការដ្ឋាននគរបាលស្រុកសាលាក្រៅ និងកម្លាំងប៉ុស្តិ៍នគរបាលរដ្ឋបាលទាំង៤ កំពុងចុះតាមដានទឹកបន្តផងដែរ ខណៈដែលផ្ទៃមេឃនៅជាមានភ្លៀងធ្លាក់ រីឯអាកាសធាតុក៏អាប់អួរ ពោលគឺគ្មានពន្លឺព្រះអាទិត្យពេញ ១ថ្ងៃ តែម្តង ៕
ចែករំលែកព័តមាននេះ