អាជ្ញាធរខេត្តប្រកាសអាសន្នឱ្យពលរដ្ឋរស់នៅក្បែរមាត់អូរ និងដងស្ទឹងប៉ៃលិន ប្រុងប្រយ័ត្នខ្ពស់ ខណៈភ្លៀងបន្តធ្លាក់ខ្លាំង
- ប៉ៃលិន
ខេត្តប៉ៃលិន ៖ ចាប់តាំងពីយប់រហូតមកដល់រសៀលថ្ងៃទី២៤ ខែកញ្ញា ឆ្នាំ២០២៦នេះ មេឃខ្មៅអួរអាប់ធ្លាក់ភ្លៀងខ្លាំងឡើងៗ ធ្វើឱ្យកំពស់ទឹកស្ទឹងប៉ៃលិន ហក់ឡើងខ្ពស់គួរឱ្យព្រួយបារម្ភ ខណៈដែលលោកជំទាវ បាន ស្រីមុំ អភិបាលខេត្តប៉ៃលិន ក៏បានបង្ហោះសារនៅក្នុងបណ្តាញសង្គមហ្វេសប៊ុក ដើម្បីរម្លឹកឱ្យបងប្អូនប្រជាពលរដ្ឋ ដែលមានលំនៅឋាននៅក្បែរមាត់ស្ទឹង ឬដងអូរ ត្រូវតែត្រៀមវេចខ្ចប់របស់របរ ទ្រព្យសម្បត្តិផ្ទាល់ខ្លួន ឱ្យរួចជាស្រេច ត្រៀមជម្លៀសចេញទៅរកទីទួលសុវត្ថិភាព បើសិនជាភ្លៀងនៅបន្តធ្លាក់ខ្លាំងឥតឈប់បែបនេះ ហើយឈានដល់លិចលង់ក្នុងភូមិណាមួយក្បែរស្ទឹង ។
ប្រភពព័ត៌មានពីប្រជាពលរដ្ឋម្នាក់ ឈ្មោះ ម៉ៅ ភេទប្រុស រស់នៅក្នុងក្រុងប៉ៃលិន បានឱ្យដឹងថា ឈានចូលដល់ថ្ងៃទី២៤ ខែកញ្ញានេះ មេឃនៅតែបន្តធ្លាក់ភ្លៀងខ្លាំងចាប់តាំងពីយប់រហូតមកដល់ពេលនេះ មិនទាន់ឈប់នៅឡើយទេ ពោលគឺមេឃកាន់តែធ្លាក់ភ្លៀងខ្លាំងឡើងៗ ជាហេតុធ្វើឱ្យទឹកហូរត្របាញ់ចុះពីលើភ្នំខៀវ ឆ្ពោះទៅតាមអូរ និងស្ទឹង ដែលជាហេតុធ្វើឱ្យកំពស់ទឹកស្ទឹងនាពេលនេះហក់ឡើងខ្ពស់ខុសពីធម្មតា គឺគួរឱ្យព្រួយបារម្ភខ្លាំង ។ ពួកគាត់ក៏បានទទួលដំណឹងពីអាជ្ញាធរមូលដ្ឋាន ប្រកាសឱ្យអ្នកដែលរស់នៅក្បែរមាត់ស្ទឹង ដងអូរ ទាំងអស់ ត្រៀមរៀបចំទុកដាក់សម្ភារៈផ្ទះសម្បែងរបស់ខ្លួនឱ្យបានល្អ ជៀសវាងទឹកជំនន់ទឹកភ្លៀងហូរចូលទៅដល់ក្នុងផ្ទះអាចនឹងទាញនាំអណ្តែតទៅតាមទឹក ធ្វើឱ្យបាត់បង់ និងខូចខាតរបស់ទាំងនោះផងដែរ។
បើតាមប្រភពព័ត៌មានពីលោកជំទាវ បាន ស្រីមុំ អភិបាលនៃគណៈអភិបាលខេត្តប៉ៃលិន បានបង្ហោះសារនៅក្នុងបណ្តាញសង្គមហ្វេសប៊ុក ណែនាំដល់បងប្អូនប្រជាពលរដ្ឋទាំងអស់នៅទូទាំងខេត្តប៉ៃលិន ឱ្យមានការប្រុងប្រយ័ត្នខ្ពស់ចំពោះបញ្ហាជំនន់ទឹកភ្លៀងដែលកំពុងតែកើតមានឡើងនេះ ។
លោកជំទាវអភិបាលខេត្តបានឱ្យដឹងថា ជម្រាបជូនពុកម៉ែបងប្អូនប្រជាពលរដ្ឋមានទីលំនៅជិតមាត់អូរដងស្ទឹង សូមមេត្តាមានការប្រុងប្រយ័ត្ន រៀបចំទុកដាក់ទ្រព្យសម្បត្តិត្រៀមឱ្យរួចជាស្រេច ព្រោះកម្រិតទឹកស្ទឹងហាក់ឡើងខ្ពស់ អាកាសធាតុភ្លៀងនៅតាមជ្រលងភ្នំនៅតែបន្តធ្លាក់។ លោកជំទាវអភិបាលខេត្តបានបន្តទៀតថា ក្រុមការងារជួយសង្គ្រោះគ្រប់លំដាប់ថ្នាក់ប្រចាំការនៅមូលដ្ឋានកំពុងតាមដាន និងនៅជិតពុកម៉ែបងប្អូនគ្រប់វិនាទី ។
សូមបញ្ជាក់ផងដែរថា ភ្លៀងធ្លាក់ខ្លាំងអស់រយៈពេលប៉ុន្មានថ្ងៃនេះជាប់ៗគ្នា ហើយរហូតមកដល់វេលាម៉ោង១២ និង៥៥នាទីរសៀលថ្ងៃទី២៤ ខែកញ្ញ ឆ្នាំ២០២៦នេះ ភ្លៀងកាន់តែធ្លាក់ខ្លាំងឡើងៗ អាចនឹងមានការលិចតាមមាត់ស្ទឹងហៀរចូលលំនៅឋានប្រជាពលរដ្ឋផងដែរ ៕
ចែករំលែកព័តមាននេះ