ខេត្តស្វាយរៀង ៖ លោក ប៉េង ពោធិ៍សា អភិបាលខេត្តស្វាយរៀង បានផ្តល់បទសម្ភាសន៍ និងបទបង្ហាញយ៉ាងលម្អិតជូនដល់តំណាងអ្នកសារព័ត៌មានជាតិ និងអន្តរជាតិ អំពីវិធានការផ្លូវច្បាប់ កិច្ចប្រតិបត្តិការស្រាវជ្រាវ ការចុះឆែកឆេរ ក៏ដូចជាលទ្ធផលជាក់ស្តែង នៃការទប់ស្កាត់ និងបង្ក្រាបសកម្មភាពខុសច្បាប់នានា ដែលបានកើតឡើងនៅក្នុងទីតាំងកាស៊ីណូ Golden Galaxy ក៏ដូចជាទីតាំងនានាផ្សេងៗទៀត ក្នុងភូមិសាស្ត្រខេត្តស្វាយរៀង ក្រោយបង្ក្រាបបាន និងបន្តធ្វើសព្វថ្ងៃដោយគ្មានការលើកលែងឡើយ ។
ការផ្តល់កិច្ចសម្ភាសន៍ និងចុះពិនិត្យទីតាំងជាក់ស្តែង ដែលបានបង្ក្រាបរួចជូនអ្នកសារព័ត៌មាននាពេលនេះ គឺជាការបង្ហាញអំពីភាពស្មោះត្រង់ តម្លាភាព និងការប្តេជ្ញាចិត្តខ្ពស់របស់រដ្ឋបាលខេត្តស្វាយរៀង ក៏ដូចជារាជរដ្ឋាភិបាលកម្ពុជា ក្នុងការលុបបំបាត់បទល្មើសឆបោកតាមប្រព័ន្ធអនឡាញ ល្បែងស៊ីសងខុសច្បាប់ និងការជួញដូរមនុស្ស ដើម្បីធានានូវសន្តិសុខ សណ្តាប់ធ្នាប់សាធារណៈ និងលើកកម្ពស់មុខមាត់របស់ប្រទេសជាតិ នៅលើឆាកអន្តរជាតិ ។
កិច្ចសម្ភាសន៍នេះ ធ្វើឡើងនៅរសៀលថ្ងៃទី២១ ខែកញ្ញា ឆ្នាំ២០២៦ នៅកាស៊ីណូមួយទៀត ស្ថិតនៅក្នុងសង្កាត់បាវិយក្រុងបាវិត ខេត្ដស្វាយរៀង ។
ការចុះយកព័ត៌មាននេះ ធ្វើឡើងក្រោមការសម្របសម្រួលពីក្រសួងព័ត៌មាន ដោយមានការចូលរួមពីអភិបាលខេត្ត ព្រះរាជអាជ្ញា សមាជិកលេខាធិការដ្ឋាន នៃគណៈកម្មការចំពោះកិច្ចប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) និងមន្ត្រីសមត្ថកិច្ចពាក់ព័ន្ធជាច្រើនរូបទៀត។ អ្នកសារព័ត៌មាន បានចុះថតយករូបភាពនៅទីតាំងធ្លាប់ប្រព្រឹត្តបទល្មើសឆបោកតាមប្រព័ន្ធអនឡាញ (Online Scam) នាពេលនេះ មានគោលបំណងពិនិត្យមើលលទ្ធផល នៃការបង្ក្រាបនាពេលកន្លងមក ដើម្បីបង្ហាញការពិតថា កម្ពុជាលែងមានមណ្ឌលឆបោកតាមប្រព័ន្ធអនឡាញទ្រង់ទ្រាយធំទៀតហើយ ព្រមទាំងទទួលបានព័ត៌មានលម្អិតអំពីវិធានការច្បាប់ ដែលត្រូវអនុវត្តន៍បន្តបន្ទាប់ក្រោយការបង្ក្រាប ។
ក្នុងឱកាសនោះ លោកអភិបាលខេត្តស្វាយរៀង បានថ្លែងប្រាប់អ្នកសារព័ត៌មានឱ្យដឹងថា កាស៊ីណូ «Golden Galaxy» ដែលអ្នកសារព័ត៌មានមកពិនិត្យមើលនេះ ស្ថិតនៅសង្កាត់បាវិត ក្រុងបាវិត ខេត្តស្វាយរៀង ហើយម្ចាស់ទីតាំងជាជនជាតិចិន ឈ្មោះ ហុង ស៊ីងជឺ និងមានជនជាតិវៀតណាម ២នាក់ បានជួលបន្តដើម្បីរៀបចំប្រព្រឹត្តបទល្មើស Online Scams គឺឈ្មោះ ឡេ វ៉ាន់ង្វៀន និងឈ្មោះ ង្វៀន វ៉ាន់វិញ ។
លោកអភិបាលខេត្ត បានបញ្ជាក់ថា ក្នុងប្រតិបត្តិការបង្ក្រាបបទល្មើសនេះ អាជ្ញាធរមានសមត្ថកិច្ចបានរកឃើញអ្នកចូលរួមប្រព្រឹត្តបទល្មើសចំនួន ២៤៤នាក់ ដោយមាន ៤សញ្ជាតិ រួមមាន ៖ កូរ៉េ វៀតណាម ចិន និងកម្ពុជា ក្នុងនោះជនជាតិវៀតណាម មានចំនួនច្រើនជាងគេ រហូតដល់ ១៨២នាក់ ។
លោកបន្ដថា ក្នុងប្រតិបត្តិការបង្ក្រាបនេះ សមត្ថកិច្ចបានឃាត់ខ្លួន និងឃុំខ្លួនមេខ្លោងចំនួន ៣នាក់។ ចំពោះជនជាប់សង្ស័យផ្សេងទៀត សមកិច្ចបានរៀបចំនីតិវិធី បញ្ជូនទៅអគ្គនាយកដ្ឋានអន្តោប្រវេសន៍ ដើម្បីធ្វើមាតុភូមិនិវត្តន៍តាមច្បាប់ជាធរមាន។
លោកអភិបាលខេត្ដ បានលើកឡើងថា ទីតាំងនេះ ប្រព្រឹត្តបទល្មើស Online Scams ក្រោមរូបភាពក្លែងបន្លំជាមន្ត្រី ដើម្បីអូសទាញមនុស្សឱ្យឆ្លងដែនទៅធ្វើការនៅតាមគោលដៅរបស់ខ្លួន ។
លោកបានថ្លែងបញ្ជាក់ថា ៖ «ការក្លែងបន្លំជាមន្ត្រីហ្នឹង គឺបើទិសដៅគាត់បោកទៅប្រទេសណា គាត់បន្លំជាមន្ត្រីប្រទេសហ្នឹង។ បើថាចិន គាត់បន្លំជាមន្ត្រីចិន បើថា វៀតណាម គាត់បន្លំជាមន្ត្រីវៀតណាម។ មិនមែនទាំងអស់ទេ អ្នកខ្លះគាត់យកទីតាំងប្រទេសកម្ពុជា ប៉ុន្តែគាត់បោកបន្តទៅប្រទេសផ្សេង ដោយសារគាត់មានសាខារបស់គាត់នៅទីនោះ» ។
ជាមួយគ្នានេះ លោក ប៉េង ពោធិ៍សា បានបញ្ជាក់បន្ថែមថា ប្រតិបត្តិការចុះបង្ក្រាបត្រូវបានគ្រោងធ្វើតាំងពីមុនថ្ងៃទី៧ ខែមេសា ឆ្នាំ២០២៦ មកម្ល៉េះ បន្ទាប់ពីមានការសង្ស័យថា មានបង្កប់សកម្មភាព Online Scams ប៉ុន្តែត្រូវបានខកខានទៅវិញ ដោយសារម្ចាស់អគារអះអាងថា បានបិទ ដើម្បីជួសជុលសំណង់ឡើងវិញ។ ប៉ុន្តែរូបភាព នៃការជួសជុលនេះ ជាការភូតកុហក ដោយយកការដ្ឋានជួសជុលមកបិទបាំងអំពើឆបោកតែប៉ុណ្ណោះ ។
លោកអះអាងថា ៖ «គាត់ជួសជុលបណ្តើរ គាត់លួចបើក និងលួចប្រព្រឹត្តបណ្តើរ ដែលយើងអត់ដឹង។ គាត់យករូបភាពនេះមកបំភាន់ភ្នែកអាជ្ញាធរ។ ប៉ុន្តែ ដោយសារយើងសង្ស័យខ្លាំង ហើយមានភ្នាក់ងារស៊ើបការណ៍របស់យើងបោះដៃមកថា គឺមាន ទើបកម្លាំងចុះមកទាំងកំពុងតែជួសជុលតែម្តង។ ហើយក៏រកឃើញមាននៅអគារកាស៊ីណូនេះ នៅជាន់ទី៧ និងអគារនៅខាងក្រោយនេះទៀត។ ពេលចុះបង្ក្រាប កម្លាំងសមត្ថកិច្ចរកឃើញមាន Laptop ទូរស័ព្ទដៃ និងទង់ជាតិ នៃជាតិសាសន៍ ដើម្បីឆបោកជាដើម» ។
លោកអភិបាលខេត្ដបាន បានឱ្យដឹងទៀតថា មកទល់ពេលនេះ ទីតាំងឆបោក (scam compound) លែងមានទៀតហើយ។ ប៉ុន្តែឧក្រិដ្ឋជនកំពុងតែបត់បែន និងសម្របខ្លួនទៅតាមវិធានការរបស់សមត្ថកិច្ច ដោយបំបែក និងលាក់កម្លាំងនៅតាមកន្លែងតូចៗ ដូចជាផ្ទះជួល បន្ទប់ជួល តាមរទេះ ឬរថយន្តជាដើម ។
សូមជម្រាបជូនថា ក្នុងខេត្តស្វាយរៀង មានកាស៊ីណូសរុប ២៨ទីតាំង ហើយកាស៊ីណូ ដែលឈានទៅដល់ការបង្ក្រាប និងត្រូវបានដកអាជ្ញាប័ណ្ណ មានចំនួន ០៣ទីតាំង ក្នុងនោះនៅក្រុងបាវិតចំនួន ០២ទីតាំង និងនៅស្រុកចន្ទ្រា ចំនួន ០១ទីតាំង។ ចំពោះនៅក្រុងបាវិត មានកាស៊ីណូមួយទៀត កំពុងស្ថិតក្នុងនីតិវិធីតុលាការ ដើម្បីដកអាជ្ញាប័ណ្ណ ដែលចំនួនការស៊ីណូត្រូវដកអាជ្ញាប័ណ្ណសរុបកើនឡើងដល់ ០៤ទីតាំង ។
គិតចាប់តាំងពីខែកក្កដា ឆ្នាំ២០២៥ ដល់ដំណាច់ខែសីហា ឆ្នាំ២០២៦ សមត្ថកិច្ចកម្ពុជាបានបង្ក្រាបទីតាំងបទល្មើស Online Scam ចំនួន ៦៦៣ទីតាំង ដោយក្នុងចំណោមនោះ បានបិទ និងគ្រប់គ្រងមណ្ឌលឆបោកចំនួន ៨៦ទីតាំង(scam compounds) ដើម្បីឈានទៅរឹបអូសតាមនីតិវិធីច្បាប់យ៉ាងម៉ឺងម៉ាត់ ។ ទន្ទឹមគ្នានេះ ថវិកាជាង ៣០០លានដុល្លារអាម៉េរិក នៅក្នុងគណនីធនាគារ ក៏ត្រូវបានបង្កក រួមទាំងទ្រព្យសម្បត្តិផ្សេងទៀត ដែលកំពុងបន្តនីតិវិធីបង្កក និងធ្វើការវាយតម្លៃជាបន្តបន្ទាប់ ៕
ចែករំលែកព័តមាននេះ