ប្រទេសជប៉ុន ៖ កីឡាការិនីកីឡាវាយសីជម្រើសជាតិថៃ Pitchamon Opatniputh ត្រូវបានផ្អាកសកម្មភាពជាបណ្តោះអាសន្នពីការប្រកួតព្រឹត្តិការណ៍កីឡាទ្វីបអាស៊ី (Asian Games) ឆ្នាំ ២០២៦ នៅប្រទេសជប៉ុន ដែលកំពុងដំណើរការ បន្ទាប់ពីនាងត្រូវបានទីភ្នាក់ងារតេស្តសារធាតុហាមឃាត់អន្តរជាតិ ហៅកាត់ថា ITA រកឃើញលទ្ធផលវិជ្ជមាន សារធាតុហាមឃាត់ Furosemide ឬថ្នាំបញ្ចុះទឹកនោម។ នេះបើតាមការចេញផ្សាយប្រភពពីទីភ្នាក់ងារសារព័ត៌មាន AFP និង Xinhua។
ITA កាលពីថ្ងៃទី២១ ខែកញ្ញា ឆ្នាំ២០២៦ បានឱ្យដឹងថា គំរូតេស្តដែលប្រមូលបានពីកីឡាការិនី Opatniputh នៅមុនការប្រកួតកីឡាអាស៊ីក្នុងទីក្រុងណាហ្គូយ៉ា (Nagoya) កាលពីថ្ងៃទី១៧ ខែកញ្ញា បានបង្ហាញលទ្ធផលវិជ្ជមាននៃសារធាតុ Furosemide។ ដ្បិតសារធាតុនេះ ត្រូវបានចុះក្នុងបញ្ជីដោយទីភ្នាក់ងារប្រឆាំងសារធាតុហាមឃាត់ពិភពលោក ហៅកាត់ថា WADA ដែលត្រូវបានហាមឃាត់គ្រប់ពេលទាំងអស់ ស្ថិតនៅក្នុងប្រភេទថ្នាំបញ្ចុះទឹកនោម ដើម្បីបញ្ចេញជាតិទឹកសម្រាប់ការសម្រកទម្ងន់យ៉ាងឆាប់រហ័ស។
ITA បានបញ្ជាក់ថា អត្តពលិកវ័យ១៩ឆ្នាំរូបនេះ ត្រូវបានហាមឃាត់មិនឱ្យចូលរួមប្រកួត ហ្វឹកហាត់ ធ្វើជាគ្រូបង្វឹក ឬសកម្មភាពណាមួយ អំឡុងពេលកីឡាអាស៊ីឆ្នាំ២០២៦។ ជាការកត់សម្គាល់ Pitchamon អាចប្តឹងតវ៉ាចំពោះការផ្អាកជាបណ្តោះអាសន្ននេះទៅកាន់តុលាការអាជ្ញាកណ្តាលកីឡា ហៅកាត់ថា CAS ក៏ដូចជាសិទ្ធិស្នើសុំឱ្យមានការវិភាគលើសំណាកគំរូទីពីរផងដែរ។
គួរបញ្ជាក់ថា នេះគឺជាករណីប្រើប្រាស់សារធាតុហាមឃាត់ដំបូងគេបង្អស់ ដែលត្រូវបានរកឃើញនៅក្នុងព្រឹត្តិការណ៍កីឡាអាស៊ីឆ្នាំ ២០២៦ ដែលពិធីបើកធ្វើឡើងកាលពីថ្ងៃទី១៩ ខែកញ្ញា និងគ្រោងបិទនៅថ្ងៃទី៤ ខែតុលា ខាងមុខ។
យុវតី Opatniputh ដែលបច្ចុប្បន្នឈរនៅចំណាត់ថ្នាក់លេខ ១៨ ពិភពលោក និងត្រូវបានគេចាត់ទុកជាតារាកំពុងរះក្នុងប្រទេសកំណើតរបស់ខ្លួននោះ ត្រូវជួបប្រកួតជាមួយអត្តពលិកចិន នៅថ្ងៃទី២២ ខែកញ្ញា ក្នុងវិញ្ញាសាប្រកួតជាក្រុម។ ប៉ុន្តែទោះយ៉ាងណាក៏ដោយ ថ្ងៃដំបូងនៃការប្រកួតពេញលេញលើវិញ្ញាសាវាយសីនៃព្រឹត្តិការណ៍កីឡាអាស៊ីឆ្នាំ២០២៦ គឺបានចាប់ផ្តើមតាំងពីថ្ងៃទី២០ ខែកញ្ញាមកម្ល៉េះ៕
ចែករំលែកព័តមាននេះ