រថយន្តវេអងដឹកជន្លង់ម្រេច អត់ប៉ាស្ព័រសង្ស័យលោតឆត្រទៅវៀតណាម
- ត្បូងឃ្មុំ
ខេត្តត្បូងឃ្មុំ ៖ រថយន្តជាច្រើនបានបើកបរតាមដងផ្លូវជាតិលេខ ៧ ក្នុងនោះមានប្រភេទវេអងទ្រុងវែងៗគ្មាននរណាម្នាក់ដឹងថានៅលើនោះមានផ្ទុកអ្វីឡើយ សង្ស័យសុទ្ធតែអត់ប៉ាស្ព័រ និងលោតឆត្រទៅវៀតណាម ។ តែចៃដន្យមានរថយន្តមួយគ្រឿងបានដឹកឈើប្រភេទជន្លង់ម្រេចពេញ សង្ស័យបម្រុងបើកឆ្លងដែនទៅវៀតណាមតាមច្រកកូនជ្រូក ក្នុងទឹកដីស្រុកពញាក្រែក ត្រូវបានកម្លាំងសមត្ថកិច្ចឃើញឃាត់ ក្រោយមកមេឃក៏បានភ្លៀងធ្លាក់បែកភក់ ចំណែកអ្នកបើកបររថយន្តវិញបានបិទទ្វាររថយន្តរត់បាត់ ។
លោកហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ខេត្តត្បូងឃ្មុំ បានឱ្យដឹងតាមទូរស័ព្ទនារសៀលថ្ងៃទី ២១ កញ្ញា ឆ្នាំ ២០២៦ ថា រូបលោកពុំទាន់ទទួលបានរបាយការណ៍ណាមួយពីខណ្ឌរដ្ឋបាលព្រៃឈើនៅឡើយ ។ ហើយរថយន្តដែលបានដឹកជន្លង់ម្រេចនេះគោលដៅចេញមកពីប្រភព និងគោលដៅទៅកាន់កន្លែងណាមួយ នៅមិនទាន់ដឹង ដោយសាររូបលោកជាប់បំពេញបេសកកម្មការងារ ។
ប្រភពពីសមត្ថកិច្ចវិញបានឲ្យដឹងថា រថយន្តប្រភេទវេអងដឹកជន្លង់ម្រេចនេះគោលដៅឆ្ពោះទៅកាន់ខេត្តស្វាយរៀង តែបានបើកខុសគោលដៅមកកាន់ខេត្តត្បូងឃ្មុំ ទើបត្រូវបានកម្លាំងនគរបាលសេដ្ឋកិច្ចសហការជាមួយរដ្ឋបាលព្រៃឈើឃាត់ ហើយបាននាំមកដាក់នៅរដ្ឋបាលព្រៃឈើមេមត់ ដើម្បីបំពេញតាមនីតិវិធី ។
តាមប្រភពពីក្រុមបងប្អូនអ្នកសារព័ត៌មាននៅក្នុងខេត្តត្បូងឃ្មុំ បានលើកឡើងថា ក្នុងរយៈពេលប៉ុន្មានថ្ងៃនេះ ពួកគាត់បានផ្សព្វផ្សាយពីសកម្មភាពរថយន្តដឹកជន្លង់ម្រេចតាមរថយន្តធំៗ ហើយបានរយៈពេល ២ថ្ងៃក្រោយមក ស្រាប់តែមានកម្លាំងរបស់រដ្ឋបាលព្រៃឈើស្ទាក់ឃាត់រថយន្តដឹកជន្លង់ម្រេចមួយគ្រឿង ដែលមានបរិមាណប្រមាណ ៦០០០ ទៅ ៧០០០ដើម សុទ្ធតែកូនឈើកាប់ពីក្នុងព្រៃ គឺកាប់តាមចិត្ត ។
ពេលដែលកម្លាំងសមត្ថកិច្ចឃាត់រថយន្តនោះ គឺមិនមានឯកសារដឹកឈើអ្វីនោះទេ តែក្រោយមកបានលេចឮថា មានច្បាប់ដឹកជញ្ជូនទៅវិញ មិនដឹងគេឆ្ពិនភ្នែក ឬក្រូមេបែបណាទេ ។ រថយន្តមួយគ្រឿងនេះអាចមានទម្ងន់ខ្ទង់រយតោន កត្តានេះហើយដែលធ្វើឱ្យផ្លូវខូចខ្ទេចខ្ទី តែបានបើកឆ្លងកាត់ស្នាក់ការថ្លឹងរថយន្តនៅក្នុងភូមិសាស្ត្រស្រុកស្នួល ខេត្តក្រចេះ បានដោយរលូន ។
នគរបាលមួយរូបនៅស្នងការដ្ឋាននគរបាលខេត្តត្បូងឃ្មុំ បានប្រាប់ថា មូលហេតុដែលកម្លាំងនគរបាលសេដ្ឋកិច្ចសហការជាមួយរដ្ឋបាលព្រៃឈើឃាត់រថយន្តដឹកជន្លង់ម្រេចមួយគ្រឿងនេះ រថយន្តបានបើកខុសគោលដៅបម្រុងឆ្លងចូលទៅប្រទេសវៀតណាម ។
លោក សួរ ដាវី នាយខណ្ឌរដ្ឋបាលព្រៃឈើត្បូងឃ្មុំ ត្រូវបានភ្នាក់ងារសារព័ត៌មានខលទៅច្រើនលើកតែមិនលើកទូរស័ព្ទដើម្បីសុំការបំភ្លឺទេ ។
មកដល់ពេលនេះ គេពុំទាន់ដឹងថា ឈើជន្លង់ម្រេចពេញមួយរថយន្តវេរអងនោះជាកម្មសិទ្ធិរបស់បុគ្គលណាមួយនៅឡើយទេ ។ ចំពោះទំហំទឹកប្រាក់ឈើមួយរថយន្តនេះអាចចូលដល់ខ្ទង់ម៉ឺនដុល្លារឯណោះ ។
ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ