ខេត្តប៉ៃលិន ៖ គេសង្កេតឃើញរមណីយដ្ឋានកសិ-ទេសចរណ៍មួយកន្លែង ស្ថិតនៅតំបន់អូរទុរេន ក្នុងសង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ដែលជាតំបន់មួយ មានទេសភាពស្រស់ស្អាតគួរឱ្យចង់គយគន់ ខណៈដែលភ្ញៀវទេសចរភាគច្រើន ហាក់ដូចជាមើលរំលង ហើយអ្នកខ្លះមិនធ្លាប់បានទៅលេងទីនោះឡើយ ក៏មានភ្ញៀវទេសចរភាគច្រើន ក៏មិនធ្លាប់ស្គាល់ទៅទីនោះដែរ។ រមណីយដ្ឋានអូរទុរេន ស្ថិតនៅភាគខាងលិចឈាងខាងត្បូង នៃក្រុងប៉ៃលិន ខេត្តប៉ៃលិន ដែលមានចំងាយពីទីរួមខេត្តប៉ៃលិន ប្រមាណ១០ទៅ១៥គីឡូម៉ែត្រ ជាប់នឹងទឹកដីស្រុកសំឡូត ខេត្តបាត់ដំបង ហើយក៏ជាប់ជាមួយនឹងព្រំដែនរវាងប្រទេសកម្ពុជា និងប្រទេសថៃ ផងដែរ។ មិនត្រឹមតែទេសភាពស្រស់បំព្រងប៉ុណ្ណោះទេ រមណីយដ្ឋានមួយនេះ ត្រូវបានម្ចាស់ដាំដំណាំជាច្រើនប្រភេទដូចជាដំណាំក្រូចពោធិ៍សាត់ ដំណាំទុរេន ដំណាំសាវម៉ាវ ដំណាំចេក ស្វាយកែវរមៀត និងដំណាំផ្សេងៗ ជាច្រើនដើមទៀត ។
បើតាមការរៀបរាប់ពីម្ចាស់រមណីយដ្ឋានខាងលើ ឈ្មោះ កែ សារ៉េត ភេទប្រុស បានឱ្យដឹងថា កាលដែលលោកចូលទៅដល់កន្លែងនោះជាលើកដំបូង គឺមានចិត្តស្រឡាញ់ធម្មជាតិនៅតំបន់នោះអស់ពីបេះដូងតែម្តង ទើបក្រោយមក លោកក៏បានពិភាក្សាជាមួយប្រពន្ធ ដោយរៀបចំគម្រោងសុំច្បាប់រដ្ឋាភិបាល ដើម្បីបង្កើតកន្លែងទេសចរ ដែលអាចទាក់ទាញទាំងភ្ញៀវទេសចរបរទេស និងភ្ញៀវទេសចរជាតិឱ្យចូលទៅលេងកាន់តែច្រើន ព្រោះកន្លែងនោះមានសភាពស្ងប់ស្ងាត់ និងស្រស់ស្អាត ហើយថែមទាំងមានទឹកអូរថ្លាឈ្វេងនៅលើផ្ទាំងថ្មឥតដាច់ ពេលភ្ញៀវចុះងូតទឹកអូរលេង ធ្វើឱ្យត្រជាក់កាយសប្បាយចិត្ត បំបាត់នូវទុក្ខកង្វល់ថែមទៀត ។
លោកបានបន្តទៀតថា លោកក៏បានរៀបចំកន្លែងទទួលភ្ញៀវស្នាក់នៅជាបន្ទប់ៗ ដោយមានរបៀបរៀបរយ គឺមានផ្ទះសំណាក់ រីហ្សតជាដើម ។ ហើយមិនត្រឹមតែប៉ុណ្ណោះ ពេលដែលលោកបើកកន្លែងរមណីយដ្ឋាននេះ ធ្វើឱ្យប្រជាពលរដ្ឋមួយចំនួនមានការងារធ្វើប្រចាំថ្ងៃ ។ ក្រៅពីកន្លែងស្នាក់នៅ និងកន្លែងបោះតង់ ដ៏ធំទូលាយ លោកក៏បានដាំដំណាំស្ទើរគ្រប់ប្រភេទនៅជុំវិញរមណីយដ្ឋាន ដោយប្រើជីធម្មជាតិ ខណៈដែលភ្ញៀវទិញផ្លែឈើទាំងនោះយកទៅបរិភោគ គឺមិនប៉ះពាល់សល់សុខភាពឡើយ ។
លោកស្រី រ៉េត សុម៉ាលី ត្រូវជាប្រពន្ធម្ចាស់រមណីយដ្ឋានខាងលើ ក៏បានរៀបរាប់ឱ្យដឹងដែរថា ពួកគាត់ទាំងពីរនាក់ប្តីប្រពន្ធ គឺមានចិត្តស្រឡាញ់វិស័យទេសចរខ្លាំងបំផុត ដោយមានការរៀបចំរមណីយដ្ឋានបណ្តើរ ក៏ជួលកម្មករឱ្យដាំដំណាំហូបផ្លែស្ទើរគ្រប់មុខជាបណ្តើរៗ ដើម្បីងាយស្រួលពេលភ្ញៀវទេសចរចូលទៅលេងម្តងៗ គឺមានទាំងកន្លែងលេង កន្លែងស្នាក់នៅ និងមានផ្លែឈើទទួលទានជួបជុំគ្រួសារផងដែរ ។ លើសពីនេះ ការដែលគាត់នាំគ្នាគិតគូរបង្កើតរមណីយដ្ឋានធម្មជាតិនេះឡើង គឺក្នុងគោលបំណងធ្វើឱ្យភ្ញៀវទេសចរ និងប្រជាពលរដ្ឋមានចិត្តសប្បាយរីករាយបំបាត់ស្ត្រេស ភាពតានតឹង ហើយក៏ធ្វើឱ្យខ្លួនឯងមានការសប្បាយក្នុងចិត្តផងដែរ ។ ពួកគាត់ក៏សុំឱ្យប្រជាពលរដ្ឋទាំងអស់ ដែលមិនធ្លាប់ទៅលេងកន្លែងរបស់ខ្លួន អាចធ្វើដំណើរទៅលេងម្តងឱ្យស្គាល់ ដើម្បីងាយស្រួលថ្ងៃក្រោយនាំបងប្អូនមិត្តភក្តិទៅលេងថែមទៀតដែរ ៕
ចែករំលែកព័តមាននេះ