ADផ្ទាំងផ្សព្វផ្សាយពាណិជ្ជកម្ម

Picture

អភិបាលខេត្ត ៖ ក្រុមវិស្វកម្មគ្រោងជួសជុលច្រាំងទន្លេដែលបា.ក់នៅស្រុកស្រីសន្ធរ នារដូវទឹក​ស្រក​

2 ខែ មុន
  • កំពង់ចាម

ខេត្តកំពង់ចាម​ ៖ ច្រាំង​ទន្លេ​ដែល​បាក់​មាន​ប្រវែង​សរុប​ចំនួន​១៣​គីឡូម៉ែត្រ​ បណ្ដាល​ឱ្យ​ប៉ះពាល់​ផ្ទះ​៧១​គ្រួសារ​ ក្នុង​នោះ​រុះរើ​៤២​ខ្នង​។​ ​នេះ​ជា​ប្រសាសន៍​លើក​ឡើង​ពី​សំណាក់​ឯកឧត្តម​អ៊ុ​ន ចាន់​ដា អភិបាលខេត្ត​ ក្នុងឱ្យ​កាស​ចែក​អំណោយ​របស់​សម្ដេច​បវរ​ធិ​បតី ជូន​ដល់​ពលរដ្ឋ​រង​គ្រោះ​ដោយ​បាក់​ច្រាំង​ទន្លេ​ច្រើន​គ្រួសារ​នា​ព្រឹក​ថ្ងៃ​ទី​១៩ ​ខែកញ្ញា ឆ្នាំ​២០២៦ ក្នុង​បរិវេណ​វិទ្យាល័យ​ឫស្សី​ស្រុក ស្រុក​ស្រី​សន្ធរ​។

ឯកឧត្តម​អភិបាលខេត្ត​មាន​ប្រសាសន៍​លើក​ឡើង​ថា​ ពេល​ដែល​មាន​គ្រោះ​មហន្តរាយ​កើតឡើង​នៅ​ទីណា​មួយ​គឺ​សម្ដេច​បវរ​ធិ​បតី​និង​ឯកឧត្តម​សន្តិ​បណ្ឌិត​នេ​ត សា​វឿ​ន ប្រធាន​ក្រុមការងារ​ចុះ​ជួយ​ខេត្តកំពង់ចាម​ តែងតែ​គិតគូរ​ និង​យកចិត្តទុកដាក់​ជួយ​អន្តរាគមន៍​ដល់​បងប្អូន​ប្រជាពលរដ្ឋ​គ្រប់ពេល​ ។​ ជាក់ស្ដែង ​នៅ​ពេល​នេះ​ពលរដ្ឋ​រង​គ្រោះ​ដោយ​បាក់​ច្រាំង​ទន្លេ​ចំនួន​២៣​គ្រួសារ​ គឺ​បាន​ទទួល​អំណោយ​សម្រាប់​យក​ទៅ​ដោះស្រាយ​ជីវភាព​គ្រួសារ​។

ឯកឧត្តម​អ៊ុ​ន ចាន់​ដា អភិបាលខេត្ត​​មាន​ប្រសាសន៍​បន្ត​ថា នៅ​ក្នុងស្រុក​ស្រី​សន្ធរ បាន​រង​ផល​ប៉ះពាល់​ចំនួន​ពីរ​លើក​ ក្នុង​នោះ​មាន​គ្រោះ​មហន្តរាយ​បាក់​ច្រាំង​ទន្លេ​នៅ​ឃុំ​កោះអណ្ដែត ឫស្សី​ស្រុក ព្រែក​ពោធិ៍ ហើយ​នៅ​ឃុំ​ខ្នារ​ស ស្វាយ​ពោធិ៍ បែរជា​ខ្វះ​ទឹក​ទៅ​វិញ​ធ្វើ​ឲ្យ​ដំណាំ​ស្រូវ​ប្រមាណ​៥០០​ហិ​កតា រង​ផល​ប៉ះពាល់​ដោយ​មានការ​អន្តរាគមន៍​តាម​រយៈ​ការ​បូមទឹក​តាម​ប្រព័ន្ធ​ធា​រា​សាស្ត្រ​គឺ​បាន​ស្រោចស្រព​ដំណាំ​ស្រូវ​ទាំងនោះ​បាន​ឡើង​វិញ​ គួប​ផ្សំ​នឹង​ភ្លៀង​ធ្លាក់​ផង​ដែរ​។ ជាក់ស្ដែង​នៅ​ឫស្សីស្រុក​ បាក់​ច្រាំង​ទន្លេ​ដោយសារ​តែ​កត្តា​ធម្មជាតិ​ ព្រោះ​កោះ​នៅ​កណ្ដាលទន្លេ​បាន​ដុះ​កាន់តែ​វែង​ ធ្វើ​ឲ្យ​ចរន្ត​ទឹកបាន​ហូរ​បុក​ចំ​ភូមិឋាន​របស់​ពលរដ្ឋ​ជា​ហេតុ​បណ្ដាល​ឲ្យ​បាក់​យ៉ាង​ដូច្នេះ​។

ចំពោះ​ទីតាំង​ដែល​បាន​បាក់​ច្រាំង ​ក្នុង​នោះ​មាននៅ​ឃុំ​កោះអណ្ដែត​ និង​ឫ​ស្សី​ស្រុក​ប្រវែង​១២០០​ម៉ែត្រ​ នឹង​ត្រូវ​ជួសជុល​ឆាប់​ៗ​ក្នុង​រដូវ​ទឹកសម្រក​ទៅ​វិញ​ដោយ​កងកម្លាំង​វិស្វកម្ម​។

លោកតា​អ៊ុ​ក ស៊ីនួន អាយុ​៧៩​ឆ្នាំ​ មេ​ភូមិ​ក្បាលកោះ បាន​លើក​ឡើង​ថា ផ្ទះ​របស់​គាត់​សង់​អំពី​ឈើ​មាន​ទំហំ​៦ម៉ែត្រ​ គុណ​១៣​ម៉ែត្រ ដោយ​សាងសង់​ជាង​៣០​ឆ្នាំ​មក​ហើយ ចំណែក​ច្រាំង​ទន្លេ​នៅ​ចម្ងាយ​ពី​ផ្ទះ​ជាង​៣០០​ម៉ែត្រ​ឯណោះ ​ស្ថិត​នៅ​ឃុំ​កោះអណ្ដែត ស្រុក​ស្រី​សន្ធរ តែ​គ្រោះ​ធម្មជាតិ​បាន​បាក់​មក​កៀក​ផ្ទះ​នៅ​ឆ្នាំ​២០២៦នេះ ​​ក៏​រុះរើ​ទៅ​នៅ​កន្លែង​ថ្មី​ចម្ងាយ​ពី​កន្លែង​ចាស់​៧០០ ម៉ែត្រ ។​លោកតា​មាន​អារម្មណ៍​សប្បាយ​រីករាយ​ពេល​ទទួល​បាន​អំណោយ​សម្ដេច​បវរ​ធិ​បតី នេះ​បង្ហាញ​ពី​ការ​យកចិត្តទុកដាក់​របស់​អាជ្ញាធរ​គ្រប់​លំដាប់ថ្នាក់​ ៕