អភិបាលខេត្តអញ្ជើញនាំយកអំណោយមនុស្សធម៌ជូនប្រជាពលរដ្ឋរងគ្រោះដោយសារទឹកជំនន់ចំនួន៨២គ្រួសារ
- តាកែវ
ខេត្តតាកែវ ៖ កាលពីរសៀលថ្ងៃទី១៨ ខែកញ្ញា ឆ្នាំ២០២៦ លោក វ៉ី សំណាង ប្រធានគណៈកម្មាធិការសាខាកាកបាទក្រហមកម្ពុជាខេត្តតាកែវ បានអញ្ជើញសួរសុខទុក្ខ និងនាំយកអំណោយមនុស្សធម៌របស់សាខាកាកបាទក្រហមកម្ពុជាខេត្តតាកែវ ទៅប្រគល់ជូនប្រជាពលរដ្ឋចំនួន៨២គ្រួសារ ដែលបានរងគ្រោះដោយសារទឹកជំនន់ទន្លេមេគង្គ មកពីឃុំចំនួនបី ក្នុងស្រុកអង្គរបូរី ខេត្តតាកែវ ។
លោក កង អាណាន់ អភិបាលស្រុកអង្គរបូរីបានអោយដឹងថា ចំពោះជនរងគ្រោះដោយសារទឹកជំនន់ទន្លេមេគង្គទាំង៨២គ្រួសារនោះ គឺមកពីឃុំចំនួន៣ក្នុងស្រុក គឺឃុំគោកធ្លក ឃុំព្រែផ្គាំ ឃុំអង្គរបូរី ។ លោក វ៉ី សំណាង ប្រធានគណៈកម្មាធិការសាខា បានពាំនាំនូវប្រសាសន៍ផ្តាំផ្ញើសួរសុខទុក្ខដោយក្តីនឹករលឹក និងអាណិតអាសូរជាពន់ពេកពីសំណាក់លោក បណ្ឌិត ជា វ៉ាន់ដេត ប្រធាន កិត្តិយសសាខាកាកបាទក្រហមកម្ពុជា ខេត្តតាកែវ ជាពិសេសពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្តេចតែងតែយកចិត្តទុកដាក់គិតគូរ និងតាមដានយ៉ាងយកចិត្តទុកដាក់បំផុតអំពីសុខទុក្ខ និងជីវភាពរស់នៅរបស់ប្រជាពលរដ្ឋរងគ្រោះ និងងាយរងគ្រោះគ្រប់ប្រភេទនៅគ្រប់ទិសទី ដោយមិនប្រកាន់និន្នាការនយោបាយ ពូជសាសន៍ ឬសាសនាឡើយ ទីណាមានការលំបាក ទីនោះមានកាកបាទក្រហមកម្ពុជា ។
លោកប្រធានគណៈកម្មាធិការសាខា ក៏បានសម្តែងនូវការសោកស្តាយយ៉ាងខ្លាំង ជាមួយគ្រួសាររងគ្រោះទាំងអស់ ជាពិសេសគ្រួសារដែលត្រូវរលំផ្ទះមួយខ្នង ដោយសារជំនន់ទឹកភ្លៀង និងទឹកទន្លេមេគង្គឡើងខ្លាំងនាពេលនេះ លោកអភិបាលខេត្តក៏បានផ្តាំផ្ញើឱ្យបងប្អូនប្រជាពលរដ្ឋទាំងអស់ បន្តប្រុងប្រយ័ត្នខ្ពស់ចំពោះសុវត្ថិភាព ថែរក្សាសុខភាព អនាម័យ និងប្រយ័ត្នប្រយែងកូនចៅតូចៗពីគ្រោះ ថ្នាក់លង់ទឹក ឬសត្វអាសិរពិសផ្សេងៗ ។
លោកកង អាណាន់ អភិបាលស្រុកអង្គរបូរីបានបញ្ជាក់ថា ចំពោះអំណោយមនុស្សធម៌ដែលបានផ្តល់ជូនប្រជាពលរដ្ឋរងគ្រោះទាំង៨២គ្រួសារ ក្នុងមួយគ្រួសារៗទទួលបាន ៖ អង្ករ២៥គីឡូក្រាម, មី១កេស, ត្រីខ១យួរ, ប្រេងឆា១លីត្រ, ទឹកត្រី៣ដប និងទឹកស៊ីអ៊ីវ៣ដប, នំ១កញ្ចប់ សម្ភារប្រើប្រាស់កន្ទេល១, មុង១, ភួយ១, សារុង១, ក្រម៉ា១ និងថវិកាចំនួន២០ម៉ឺនរៀល ។
ដោយឡែក សម្រាប់គ្រួសារប្រជាពលរដ្ឋដែលរងគ្រោះធ្ងន់ធ្ងរ បណ្តាលឱ្យរលំផ្ទះចំនួន១ខ្នង ទទួលបានការឧបត្ថម្ភបន្ថែមនូវ តង់ធំមួយ និងថវិកាចំនួន២០ម៉ឺនរៀលបន្ថែមទៀត (សរុបថវិកា ២២០,០០០ រៀល) ដើម្បីជួយសម្រួលទុក្ខធុរៈផងដែរ ៕
ចែករំលែកព័តមាននេះ