ទីក្រុងតូក្យូ ៖ យោងតាមទិន្នន័យចុងក្រោយបង្អស់របស់ក្រសួងសុខាភិបាល ការងារ និងសុខុមាលភាពប្រទេសជប៉ុន បានបង្ហាញថា ចំនួនប្រជាជនមានអាយុចាប់ពី ១០០ ឆ្នាំឡើងទៅនៅក្នុងប្រទេសនេះ បានកើនលើសពី ១០ម៉ឺននាក់ជាលើកដំបូងបង្អស់ក្នុងប្រវត្តិសាស្ត្រ ដោយកើនឡើងដល់ ១០៧ ៦៧៧ នាក់ ក្នុងចំណោមនោះ ៨៨% គឺជាស្ត្រី។ នេះបើតាមការចេញផ្សាយពីកាសែត New York Post កាលពីថ្ងៃទី១៦ ខែកញ្ញា ឆ្នាំ២០២៦។
ទិន្នន័យទាំងនេះ ត្រូវបានប្រកាសឡើង ដើម្បីអបអរសាទរទិវាគោរពមនុស្សចាស់ នៅថ្ងៃទី ១៥ ខែកញ្ញា ឆ្នាំ២០២៦ ដែលជាពេលរដ្ឋាភិបាលជប៉ុនតែងផ្ដល់កិត្តិយសដល់មនុស្សចាស់មានអាយុចាប់ពី ១០០ ឆ្នាំឡើងទៅដែលមានសុខភាពល្អ និងសកម្មនៅក្នុងសង្គម តាមរយៈលិខិតអបអរសាទរពីនាយករដ្ឋមន្ត្រី លោកស្រី Sanae Takaichi និងជាមួយវត្ថុអនុស្សាវរីយ៍ពែងស្រាសាកេធ្វើពីប្រាក់មួយផងដែរ។
ខណៈពេលដែលចំនួនប្រជាជនវ័យចំណាស់បានកើនឡើង យុវជនជប៉ុនជាច្រើនបែរជាមិនមានសុទិដ្ឋិនិយមចំពោះអនាគតរបស់ពួកគេ។ បើតាមរបាយការណ៍វិទ្យាស្ថានជាតិស្រាវជ្រាវប្រជាសាស្ត្រ និងសន្តិសុខសង្គម បានបញ្ចេញលទ្ធផលនៃការអង្កេតមួយដែលបានបង្ហាញថា បុរស និងស្ត្រីនៅលីវអាយុចន្លោះពី ១៨ ដល់ ៣៤ ឆ្នាំ ជាង ២០% គ្មានបំណងរៀបការឡើយ ដោយក្នុងនោះជិតពាក់កណ្តាលលើកឡើងថា ពួកគេមើលមិនឃើញផលប្រយោជន៍ណាមួយពីអាពាហ៍ពិពាហ៍នោះទេ។
អ្នកជំនាញបានលើកឡើងថា ការធ្លាក់ចុះយ៉ាងគំហុកនៃចំនួនប្រជាជនជប៉ុន គឺជារឿងដែលមិនអាចជៀសរួចនោះទេ ដោយអត្រាបង្កកំណើតសរុបរបស់ប្រទេសនេះ បានធ្លាក់ចុះដល់កម្រិតទាបបំផុតជាប្រវត្តិសាស្ត្រគឺ ១,១៤ ក្នុងឆ្នាំ២០២៥។ ចំនួនប្រជាជនសរុបរបស់ប្រទេសជប៉ុន អំឡុងពេលធ្វើជំរឿនឆ្នាំ២០២០ មានចំនួន ១២៦ លាននាក់ ដែលក្នុងនោះជិត ៣០% អាយុចាប់ពី ៦៥ ឆ្នាំឡើងទៅ។ យោងតាមវិទ្យាស្ថានជាតិបានឱ្យដឹងថា ចំនួនប្រជាជនជប៉ុននឹងធ្លាក់ចុះមកត្រឹម ៨៧ លាននាក់ នៅត្រឹមឆ្នាំ ២០៧០ ដោយជិត ៤០% មានអាយុចាប់ពី ៦៥ ឆ្នាំឡើងទៅ៕
ចែករំលែកព័តមាននេះ