ទីក្រុងព្យុងយ៉ាង ៖ លោកស្រី គីម យ៉ូជុង (Kim Yo Jong) ប្អូនស្រីដ៏មានអំណាចរបស់មេដឹកនាំកូរ៉េខាងជើង លោក គីម ជុងអ៊ុន (Kim Jong Un) នៅថ្ងៃទី១៧ ខែកញ្ញា ឆ្នាំ២០២៦ បានថ្លែងថា ប្រទេសកូរ៉េខាងជើងត្រូវតែមានអាវុធនុយក្លេអ៊ែរជាដាច់ខាត ហើយលោកស្រីថែមទាំងហៅអ្នកដែលសង្ឃឹមចង់ឱ្យប្រទេសនេះ លុបបំបាត់អាវុធនុយក្លេអ៊ែរថាជាមនុស្សល្ងង់ទៀតផង។ នេះបើតាមការចេញផ្សាយពី Channel News Asia (CNA)។
កូរ៉េខាងជើងបានចែងក្នុងច្បាប់ជាផ្លូវការនូវស្ថានភាពរបស់ខ្លួន គឺជាប្រទេសមានអាវុធនុយក្លេអ៊ែរ ដោយថ្នាក់ដឹកនាំបានប្រកាសថា ច្បាប់អាវុធនុយក្លេអ៊ែររបស់ប្រទេសនេះ គឺជាអចិន្ត្រៃយ៍ និងមិនអាចកែប្រែបានឡើយ។
លោកស្រី គីម យ៉ូជុង បានលើកឡើងនៅក្នុងសេចក្តីថ្លែងការណ៍មួយ ចេញផ្សាយដោយទីភ្នាក់ងារសារព័ត៌មានរដ្ឋកូរ៉េខាងជើង (KCNA) ថា «ជំហររបស់កូរ៉េខាងជើងក្នុងនាម ប្រទេសមានអាវុធនុយក្លេអ៊ែរ គឺដាច់ខាត ដែលមិនអាចកែប្រែបានដោយអ្វីទាំងអស់។ ឃ្លាំងអាវុធនុយក្លេអ៊ែររបស់ទីក្រុងព្យុងយ៉ាង រួមចំណែកយ៉ាងសំខាន់ក្នុងការទប់ស្កាត់សកម្មភាពដ៏ឃោរឃៅរបស់ពួកជនពាលអន្តរជាតិ»។
លោកស្រីបន្តថា «ការលើកឡើងបែបល្ងង់ខ្លៅដែលធ្លាប់តែឮអំពីកិច្ចខិតខំប្រឹងប្រែងលុបបំបាត់អាវុធនុយក្លេអ៊ែរកូរ៉េខាងជើង ត្រូវបានគេរំពឹងថានឹងកើតមានឡើង។ ប្រសិនបើពួកគេជឿថាវាអាចទៅរួចមែននោះ ពួកគេនឹងគ្រាន់តែបានឮពាក្យសម្តីរបស់ពួកមនុស្សល្ងង់តែប៉ុណ្ណោះ»។
គួរបញ្ជាក់ថា ឃ្លាំងអាវុធនុយក្លេអ៊ែររបស់ប្រទេសកូរ៉េខាងជើងបានពង្រីកកាន់តែធំឡើង ចាប់តាំងពីកិច្ចប្រជុំកំពូលលើកទី ២ រវាងលោកប្រធានាធិបតី គីម ជុងអ៊ុន និងលោកប្រធានាធិបតី ដូណាល់ ត្រាំ (Donald Trump) បានបរាជ័យក្នុងឆ្នាំ២០១៩ ជុំវិញបញ្ហាដែលថា តើកូរ៉េខាងជើងនឹងទទួលបានអ្វីមកវិញ សម្រាប់ជំហានទៅរកការលុបបំបាត់អាវុធនុយក្លេអ៊ែរ៕
ចែករំលែកព័តមាននេះ