ទីក្រុងព្យុងយ៉ាង៖ លោកស្រីគីមយូជុងដែលជាប្អូនស្រីរបស់លោកគីមជុងអ៊ុន និងជាស្ត្រីដែលមានឥទ្ធិពលជាងគេនៅកូរ៉េខាងជើងបានបញ្ចេញប្រតិកម្មតបទៅនឹងការបើកអង្គប្រជុំរបស់ទីភ្នាក់ងារអាតូមិចអន្តរជាតិ ហៅកាត់ថាអាយអេអ៊ីអេ (IAEA)។ យោងតាមការផ្សាយរបស់ទូរទស្សន៍រដ្ឋកូរ៉េខាងជើង ខេស៊ីអឹនអេ (KCNA) លោកស្រីគីមបានច្រានចោលការពិភាក្សាគ្នាស្ដីពីការកាត់រំសាយអាវុធនុយក្លេអ៊ែររបស់កូរ៉េខាងជើង។ លោកស្រីចាត់ទុកថានោះជាការពិភាក្សាគ្នាបែបឡប់ឡែតែប៉ុណ្ណោះ។
នៅក្នុងសេចក្ដីថ្លែងការណ៍របស់ខ្លួន លោកស្រីគីមបញ្ជាក់ជាថ្មីថាកូរ៉េខាងជើងប្រកាន់ជំហរយ៉ាងម៉ឺងម៉ាត់ថាខ្លួនបានក្លាយជារដ្ឋនុយក្លេអ៊ែរបាត់ទៅហើយ ហើយជំហរនេះមិនអាចប្រែក្រឡាស់ជាដាច់ខាតទោះនៅក្នុងកាលៈទេសៈណាក៏ដោយ។ លោកស្រីថ្លែងថាគ្មានវិធានការណាមួយអាចកែប្រែគោលជំហរនេះឡើយ។ ការលើកឡើងរបស់លោកស្រីគីមធ្វើឡើងនៅពេលដែលមានកិច្ចខិតខំប្រឹងប្រែងជាអន្តរជាតិដើម្បីដោះស្រាយបញ្ហានុយក្លេអ៊ែរ និងដើម្បីជំរុញឱ្យមានការកាត់រំសាយអាវុធនុយក្លេអ៊ែរ។
ទីភ្នាក់ងារថាមពលអាតូមិចអន្តរជាតិបើកកិច្ចប្រជុំរបស់ខ្លួនក្នុងគោលបំណងដោះស្រាយអ្វីដែលជាបញ្ហាកង្វល់របស់ប្រទេសនានាពាក់ព័ន្ធនឹងការអភិវឌ្ឍកាន់តែទំនើបឡើងៗនៃអាវុធនុយក្លេអ៊ែររបស់កូរ៉េខាងជើង។ ការប្រើប្រាស់ភាសាដ៏មុតស្រួចរបស់ប្អូនស្រីលោកគីមជុងអ៊ុននៅពេលនេះហាក់រំលេចឱ្យឃើញកាន់តែច្បាស់ថារបបដឹកនាំនៅទីក្រុងព្យុងយ៉ាងមិនទទួលយកការស្នើសុំសន្ទនាគ្នាណាមួយដែលអាចនឹងកែប្រែគោលជំហរជាយុទ្ធសាស្ត្រស្ដីពីបញ្ហានុយក្លេអ៊ែរនោះទេ។
គួរកត់សម្គាល់ថាថ្មីៗនេះប្រមុខដឹកនាំកូរ៉េខាងជើង លោកគីមជុងអ៊ុន ប្រកាសពង្រឹង និងពង្រីកទំនាក់ទំនងឥតព្រំដែនជាមួយរុស្ស៊ី។ លោកបានបញ្ជាក់អំពីជំហរនេះតាមរយៈការសរសេររៀបរាប់នៅក្នុងសារលិខិតមួយច្បាប់ផ្ញើជូនលោកពូទីនដើម្បីជាការឆ្លើយតបទៅលោកពូទីនដែលផ្ញើសារអបអរសាទរខួបទី៧៨ឆ្នាំនៃការបង្កើតរដ្ឋកូរ៉េសម័យទំនើប។ នៅក្នុងលិខិតនោះ លោកគីមអះអាងថារដ្ឋាភិបាលរបស់លោកមានឆន្ទៈយ៉ាងមោះមុតបំផុតក្នុងការពង្រីកកិច្ចសហប្រតិបត្តិការជាមួយរុស្ស៊ីនៅក្នុងទិដ្ឋភាពស៊ីជម្រៅគ្រប់ជ្រុងជ្រោយលើគ្រប់វិស័យដោយឈរលើគោលការណ៍មិត្តភាព ជួយយកអាសាគ្នាទៅវិញទៅមក និងទំនាក់ទំនងជាសម្ព័ន្ធភាពនឹងគ្នា៕ ប្រភព៖ Reuters
ចែករំលែកព័តមាននេះ