សុខភាព៖ យោងតាមការចុះផ្សាយពីប្រភពបរទេស ការផឹកទឹកមុនចូលគេងមិនមែនជារឿងដែលត្រូវហាមឃាត់ទាំងស្រុងទេ ប៉ុន្តែក៏មិនចាំបាច់ផឹកច្រើនដោយសារភ័យថា «ឈាមខាប់» ឬចង់ការពារគាំងបេះដូងដែរ។ សម្រាប់មនុស្សមានសុខភាពល្អ ប្រសិនបើស្រេកទឹក អាចផឹកទឹកបន្តិចបាន ប៉ុន្តែការផឹកច្រើនជិតពេលចូលគេងអាចធ្វើឱ្យនោមញឹកនៅពេលយប់ និងរំខានដល់ការគេង។

ការផឹកទឹកបន្តិចអាចជួយបំបាត់អារម្មណ៍ស្ងួតមាត់ ឬស្រេកទឹកនៅពេលយប់ ប៉ុន្តែ ​មិនមានន័យថាវាអាចការពារការកកឈាម ឬការពារគាំងបេះដូងដោយផ្ទាល់ឡើយ​។ ហានិភ័យជំងឺបេះដូងពាក់ព័ន្ធជាច្រើននឹងកត្តាដូចជា សម្ពាធឈាម ខ្លាញ់ក្នុងឈាម ការជក់បារី ទឹកនោមផ្អែម និងរបៀបរស់នៅជារួម។

ផ្ទុយទៅវិញ ប្រសិនបើផឹកទឹកច្រើនពេកជិតពេលចូលគេង វាអាចបង្កើនការនោមពេលយប់ ជាពិសេសនៅមនុស្សវ័យចំណាស់ ដែលអាចធ្វើឱ្យការគេងត្រូវបានរំខានជាបន្តបន្ទាប់។ ចំពោះអ្នកមាន ជំងឺខ្សោយបេះដូង ជំងឺតម្រងនោម ឬមានបញ្ហាហើម ការផឹកទឹកច្រើនដោយខ្លួនឯងអាចមិនសមស្រប ដូច្នេះគួរអនុវត្តតាមបរិមាណទឹកដែលវេជ្ជបណ្ឌិតបានណែនាំ។

សម្រាប់អ្នកដែលស្រេកទឹកមុនចូលគេង អាចផឹកទឹកស្អាតក្នុងបរិមាណតិចល្មម ហើយគួរជៀសវាងការផឹកច្រើនក្នុងពេលតែមួយ។ ក៏គួរចែកការផឹកទឹកឱ្យសមស្របពេញមួយថ្ងៃ ជំនួសឱ្យការផឹកច្រើននៅពេលយប់។ មិនគួរបង្ខំខ្លួនឱ្យផឹកទឹក ប្រសិនបើមិនស្រេក និងមិនគួរផឹកទឹកច្រើនហួសហេតុ ព្រោះអាចបង្កការរំខានដល់តុល្យភាពជាតិអំបិលក្នុងឈាម។

សរុបមក ផឹកទឹកមុនចូលគេងអាចធ្វើបាន ប្រសិនបើស្រេក ប៉ុន្តែគួរផឹកតិច និងកុំផឹកច្រើនជិតពេលគេង។ អ្វីដែលសំខាន់ជាងការផឹកទឹកមួយកែវនៅពេលយប់ គឺការរក្សារបៀបរស់នៅល្អ គ្រប់គ្រងសម្ពាធឈាម និងខ្លាញ់ក្នុងឈាម ព្រមទាំងផឹកទឹកឱ្យគ្រប់គ្រាន់តាមតម្រូវការរបស់រាងកាយពេញមួយថ្ងៃ​៕