ប្រទេសចិន ៖ ប្រទេសចិនបានបើកសម្ពោធព្រែកជីកដ៏ធំមួយ នៅថ្ងៃទី១៦ ខែកញ្ញា ឆ្នាំ២០២៦ ដោយផ្តល់ឱ្យតំបន់ភាគនិរតីដែលគ្មានច្រកសមុទ្ររបស់ខ្លួន នូវផ្លូវកាត់ទៅកាន់ឆ្នេរសមុទ្រ និងទីផ្សារសកល ជាពិសេសបណ្តាប្រទេសអាស៊ាន ដែលជាដៃគូពាណិជ្ជកម្មធំបំផុតរបស់ខ្លួន។
យោងតាមប្រភពពីទីភ្នាក់ងារសារព័ត៌មានចិន ស៊ិនហួ (Xinhua) បានឱ្យដឹងថា ព្រែកជីកភីងលូ (Pinglu) ដែលមានប្រវែង ១៣៤ គីឡូម៉ែត្រ បានចាយពេលសាងសង់អស់៤ឆ្នាំ ដោយតភ្ជាប់ទីក្រុងណាននីង (Nanning) ដែលជាតំបន់ផលិតកម្មភាគខាងត្បូងតំបន់ស្វយ័តក្វាងស៊ី (Guangxi) ទៅកាន់ឈូងសមុទ្រតុងកឹង (Gulf of Tonkin) ដែលស្ថិតនៅចន្លោះប្រទេសចិន និងវៀតណាម។
កាលពីមុន ទំនិញពីភាគនិរតីនៃប្រទេសចិន ត្រូវបានដឹកជញ្ជូនទៅកាន់ទីក្រុងក្វាងចូវ (Guangzhou) ដើម្បីទៅដល់សមុទ្រ ប៉ុន្តែសម្រាប់ព្រែកជីកថ្មីនេះ នឹងជួយកាត់បន្ថយចម្ងាយដឹកជញ្ជូនជាង ៥៦០ គីឡូម៉ែត្រ។ ព្រែកជីកនេះ ក៏នឹងជួយកាត់បន្ថយថ្លៃដឹកជញ្ជូនពី ១៨ ទៅ ៣០ % និងបង្កើតការសន្សំសំចៃប្រចាំឆ្នាំបានច្រើនជាង ៥ ពាន់លានយន់ ឬប្រមាណ ៧៤៥ លានដុល្លារអាមេរិក នៅក្នុងវិស័យនេះផងដែរ។
ព្រែកជីកនេះ លាតសន្ធឹងតាមបណ្តោយច្រករបៀងពាណិជ្ជកម្មផ្លូវគោក-ផ្លូវទឹកអន្តរជាតិថ្មី ដែលជាផ្លូវពាណិជ្ជកម្មយុទ្ធសាស្ត្រតភ្ជាប់តំបន់ដីគោកចិនជាមួយអាស៊ាន និងទីផ្សារអន្តរជាតិផ្សេងទៀត។ វាក៏ជាគម្រោងព្រែកជីកតភ្ជាប់ពីទន្លេទៅសមុទ្រដំបូងគេបង្អស់ ដែលត្រូវបានគ្រោងទុក និងសម្របសម្រួលនៅកម្រិតថ្នាក់ជាតិ ចាប់តាំងពីការបង្កើតសាធារណរដ្ឋប្រជាមានិតចិនក្នុងឆ្នាំ ១៩៤៩ មក។
ស៊ិនហួបានបន្តថា ផ្នែកភាគច្រើននៃការងារសាងសង់ព្រែកជីកនេះ រួមមានការបូមពង្រីក ការជីកឱ្យជ្រៅបន្ថែម និងកែសម្រួលផ្លូវទឹកមានស្រាប់ ខណៈមានផ្នែកតូចមួយប៉ុណ្ណោះដែលត្រូវបានជីកកកាយថ្មី។ គម្រោងនេះបានចាប់ផ្តើមក្នុងខែសីហា ឆ្នាំ២០២២ ដោយចំណាយថវិកាសរុបអស់ ៧២,៧ ពាន់លានយន់ ឬប្រមាណ ១០,៧៥ ពាន់លានដុល្លារអាមេរិក៕
ចែករំលែកព័តមាននេះ