រត់គេចខ្លួនម្នាក់ ឃាត់ខ្លួនបានម្នាក់ សង្ស័យពាក់ព័ន្ធការស្លា.ប់នារីបុគ្គលិកលក់រថយន្ត ក្នុងបន្ទប់ជួលមួយកន្លែង នៅខណ្ឌទួលគោក
- ភ្នំពេញ
រាជធានីភ្នំពេញ ៖ នារីជាបុគ្គលិកលក់រថយន្តម្នាក់បានស្លាប់បាត់បង់ជីវិត បន្ទាប់ពីជួបជុំគ្នាផឹកស្រវឹងនិងប្រើប្រាស់គ្រឿងញៀនហើយគេសង្ស័យថាមិត្តភក្តិប្រុសស្រីចំនួនពីរនាក់វាយ រហូតដល់ស្លាប់បាត់បង់ជីវិត ។ ទោះបីជាយ៉ាងណា ជនសង្ស័យម្នាក់ដែលត្រូវឃាត់ខ្លួនបានសារភាពថា ខ្លួនវាយដើម្បីសង្គ្រោះនារីរងគ្រោះ។
ហេតុការណ៍នេះបង្កឲ្យមានការភ្ញាក់ផ្អើលនៅវេលាម៉ោង០៥ ព្រឹក ថ្ងៃទី១៦ ខែកញ្ញា ឆ្នាំ២០២៦ នៅចំណុចបន្ទប់ជួលមួយកន្លែង ស្ថិតនៅផ្ទះលេខ២៤១ ជាន់ទី២ ផ្លូវលេខ១៤៦ ភូមិ១១ សង្កាត់ទឹកល្អក់២ ខណ្ឌទួលគោក រាជធានីភ្នំពេញ។
ជនរងគ្រោះដែលបានស្លាប់បាត់បង់ជីវិតឈ្មោះ កឹម ម៉ារ៉ា ភេទស្រី អាយុ៣២ឆ្នាំ មុខរបរបុគ្គលិកលក់រថយន្ត ទីលំនៅផ្ទះលេខ៦៥ ផ្លូវលេខ១៤៦ ភូមិ៧ សង្កាត់ផ្សារដេប៉ូ២ ខណ្ឌទួលគោក រាជធានីភ្នំពេញ។
ចំណែកជនសង្ស័យទាំង២នាក់ ក្នុងនោះ ១-ឈ្មោះ ស៊ន គីមអៃ ភេទប្រុស អាយុ៣២ឆ្នាំ មុខរបរអ្នកទិញលក់រថយន្ត ទីលំនៅផ្ទះលេខ១០១ ផ្លូវ០៩A ភូមិព្រៃកីខ សង្កាត់ពងទឹក ខណ្ឌដង្កោ រាជធានីភ្នំពេញ ត្រូវបានសមត្ថកិច្ចឃាត់ខ្លួន។
២. ឈ្មោះ ថាន ស្រីពី ភេទស្រី អាយុ២៦ឆ្នាំ ទីលំនៅភូមិក្រវាក់ដែក ឃុំឈូក ស្រុកក្រូចឆ្មារ ខេត្តត្បូងឃ្មុំ ស្នាក់នៅបន្ទប់ជួលកើតហេតុខាងលើ បានគេចខ្លួនបាត់ ។
តាមប្រភពព័ត៌មានបានអោយដឹងថា នៅមុនពេលកើតហេតុ មានការភ្ញាក់ផ្អើល បន្ទាប់ពីជនសង្ស័យបានទាក់ទងហៅរថយន្តសាម៉ុយ ដើម្បីនាំនារីជនរងគ្រោះបញ្ជូនទៅកាន់មន្ទីរពេទ្យដែរ តែក្រុមគ្រូពេទ្យបានអះអាងថា នាងស្លាប់បាត់ទៅហើយ។ ភ្លាមៗនោះជនសង្ស័យដែលជាមិត្តភក្តិ និងជាម្ចាស់បន្ទប់បានគេចខ្លួនបាត់ នៅសល់ដែលបុរសម្នាក់ដែលជាសង្សារមិត្តភក្តិរបស់ជនរងគ្រោះត្រូវបានសមត្ថកិច្ចនាំខ្លួនទៅសាកសួរ។
តាមព័ត៌មានបានឲ្យដឹងទៀតថា នៅវេលាយប់ថ្ងៃទី១៥ ខែកញ្ញា ឆ្នាំ២០២៦ ជនរងគ្រោះរួមនិងមិត្តភក្កិបានជួបជុំគ្នាផឹកនៅកន្លែងលក់រថយន្តមួយកន្លែង លុះនៅវេលាម៉ោង៣ និង៤១នាទី ឈានចូលព្រឹកថ្ងៃទី១៦ ខែកញ្ញា ឆ្នាំ២០២៦ ជនរងគ្រោះ និងមិត្តភក្តិ២នាក់ទៀតដែលជាជនសង្ស័យបាននាំគ្នាទៅបន្ទប់កន្លែងកើតហេតុប្រើប្រាស់គ្រឿងញៀនស្រាប់តែព្រឹកឡើងមានការភ្ញាក់ផ្អើល បន្ទាប់ពីជនរងគ្រោះមិនស្រួលខ្លួនហើយហៅរថយន្តបំរុងបញ្ជូនទៅសង្គ្រោះដែរ តែនាងបានស្លាប់បាត់ទៅហើយ។
តាមឪពុកបង្កើតជនរងគ្រោះបានឲ្យដឹងថា នៅវេលាម៉ោងប្រហែល៦ល្ងាច ថ្ងៃទី១៥ ខែកញ្ញា ឆ្នាំ២០២៦ កូនស្រី បានទូរស័ព្ទហៅគាត់ មកផឹកស៊ីនៅកន្លែងលក់រថយន្តនៅក្បែរផ្ទះ ដោយបានអង្គុយផឹកជាមួយកូនស្រី និងមិត្តភក្តិកូនស្រី២នាក់ទៀត ឈ្មោះ ស៊ន គីមអៃ ភេទប្រុស និងឈ្មោះ ថាន ស្រីពី ភេទស្រី (ជនសង្ស័យ) ស្រាប់តែនៅព្រឹកថ្ងៃទី១៦ ខែកញ្ញា ឆ្នាំ២០២៦ ឈ្មោះ ស៊ន គីមអៃ បានទូរស័ព្ទមកប្រាប់ថាកូនស្រីបានស្លាប់ នៅក្នុងបន្ទប់ជួល។
តាមជនសង្ស័យដែលត្រូវឃាត់ខ្លួនបានសារភាពប្រាប់សមត្ថកិច្ចថា បន្ទាប់ពីប្រើប្រាស់គ្រឿងញៀន ជនរងគ្រោះបានសន្លប់ស្ដូកស្ដឹង ហើយខ្លួនបានវាយ និងទះ ដើម្បីសង្គ្រោះ រួចទាក់ទងហៅរថយន្តសង្គ្រោះដែរ តែជនរងគ្រោះបានស្លាប់បាត់ទៅហើយ។
បន្ទាប់ពីមានការភ្ញាក់ផ្អើលជុំវិញករណីខាងលើ នគរបាលជំនាញក៏បានចុះទៅត្រួតពិនិត្យសាកសពនិងកន្លែងកើតហេតុរកឃើញកញ្ចប់ថ្នាំនិងកែវ ដែលជនរងគ្រោះប្រើប្រាស់ថ្នាំញៀន។
តាមការត្រួតពិនិត្យសាកសព មានស្នាមជាំហើមនិងពោរមុខ និងថ្ពាល់ទាំងសងខាង ភ្នែកទាំងសងខាងជាំហើម។
បន្ទាប់ពីធ្វើការត្រួតពិនិត្យ លោកវេជ្ជបណ្ឌិត ជាង រ៉េន គ្រូពេទ្យកោសល្យវិច្ច័យអមតុលាការរាជធានីភ្នំពេញសន្និដ្ឋានថា ជនរងគ្រោះស្លាប់ដោយប៉ះទង្គិចក្បាលធ្ងន់ធ្ងរ វាយផ្ទៃមុខ ហើយជនរងគ្រោះបានប្រើប្រាស់សារធាតុញៀនប្រភេទK និងអេស្ដាស៊ី ។
បច្ចុប្បន្ន សពជនរងគ្រោះត្រូវបានសមត្ថកិច្ចប្រគល់ទៅឲ្យក្រុមគ្រួសារយកទៅតម្កល់ទុកនៅឈាបនដ្ឋានវត្តទឹកថ្លាដើម្បីធ្វើបុណ្យតាមប្រពៃណី៕
ចែករំលែកព័តមាននេះ