ទីក្រុងវ៉ាស៊ីនតោន៖ លោកដូណាល់ត្រាំបញ្ជាក់ថាលោកនឹងមិនទាន់វាយប្រហារអុីរ៉ង់ជាថ្មីទេ ហើយត្រូវរង់ចាំដល់បោះឆ្នោតសភានាខែវិច្ឆិកាខាងមុខនេះត្រូវបានរៀបចំរួចរាល់ជាមុនសិន។ លោកអះអាងថាប្រទេសទាំង២កំពុងចរចាគ្នាប្រកបដោយផ្លែផ្កាដើម្បីបញ្ចប់សង្គ្រាម។ លោកបង្ហោះសារនៅលើបណ្ដាញសង្គមថាយើងកំពុងពិភាក្សាគ្នាប្រកបដោយផ្លែផ្កា។ យើងនឹងមិនវាយប្រហារអុីរ៉ង់ទេមុនការបោះឆ្នោតពាក់កណ្ដាលអាណត្តិនាថ្ងៃទី៣ ខែវិច្ឆិកា។
សង្គ្រាមដែលចាប់ផ្ដើមតាំងពីថ្ងៃទី២៨ ខែកុម្ភៈនៅពេលអាមេរិក និងអុីស្រាអែលវាយប្រហារអុីរ៉ង់នោះបានធ្វើឱ្យប្រជាប្រិយភាពរបស់លោកដូណាល់ត្រាំនៅប្រទេសអាមេរិកធ្លាក់ចុះយ៉ាងខ្លាំង ហើយបានដាក់បន្ទុកយ៉ាងខ្លាំងទៅលើក្រុមសមាជិកគណបក្សសាធារណរដ្ឋជាមួយគ្នា។ ពួកគេកំពុងខិតខំធ្វើយ៉ាងណារក្សាសំឡេងភាគច្រើនដាច់ខាតនៅក្នុងរដ្ឋសភា និងព្រឹទ្ធសភាដដែល។ ប៉ុន្តែមិនទាន់ដឹងថាអាចទៅរួច ឬអត់។
ពលរដ្ឋអាមេរិកាំង៦០% ក្នុងនោះ២៥%នៅក្នុងចំណោមអ្នកគាំទ្រគណបក្សសាធារណរដ្ឋផងដែរ បង្ហាញថាពួកគេមិនគាំទ្រចំណាត់ការរបស់លោកត្រាំនៅក្នុងសង្គ្រាមអុីរ៉ង់នោះទេ។ នេះបើយោងតាមលទ្ធផលស្ទង់មតិដែលធ្វើឡើងដោយទីភ្នាក់ងារព័ត៌មានរ៉យទ័រ។ សង្គ្រាមអុីរ៉ង់ធ្វើឱ្យតម្លៃសាំងឡើងថ្លៃខ្ពស់ហួសពីការស្មាន។ ពលរដ្ឋអាមេរិកាំងដែលជាម្ចាស់ឆ្នោតប្រាប់ថាអ្វីដែលពួកគេយកចិត្តទុកដាក់បំផុតគឺថ្លៃចំណាយលើជីវភាពរស់នៅប្រចាំថ្ងៃ។ លោកត្រាំតែងតែនិយាយជាច្រើនលើកច្រើនសាហើយថាតម្លៃប្រេងឆៅនឹងធ្លាក់ចុះក្រោយការបោះឆ្នោតសភានៅអាមេរិក។ ទោះជាយ៉ាងណាក្ដី លោកពុំដែលបង្ហាញផែនការជាក់លាក់ថានឹងបិទបញ្ចប់សង្គ្រាមនេះដោយវិធីណាទេ។
អុីរ៉ង់ និងអាមេរិកបានប្រគល់សំណើសន្តិភាពឱ្យគ្នាទៅវិញទៅមកកាលពីប៉ុន្មានសប្ដាហ៍ចុងក្រោយនេះដើម្បីបញ្ចប់សង្គ្រាម និងបើកច្រកសមុទ្រហ័រម៉ូសឡើងវិញ។ ប៉ុន្តែលោកត្រាំប្រកាសច្រានចោលលក្ខខណ្ឌរបស់អុីរ៉ង់។ សារព័ត៌មានរបស់រដ្ឋអុីរ៉ង់ផ្សាយកាលពីថ្ងៃព្រហស្បតិ៍ថារដ្ឋាភិបាលទីក្រុងតេអេរ៉ង់នឹងមិនបោះបង់ចោលការចម្រាញ់សារធាតុអ៊ុយរ៉ាញ៉ូមទេ ហើយក៏មិនប្រគល់សារធាតុអ៊ុយរ៉ាញ៉ូមដែលចម្រាញ់រួចហើយទៅឱ្យអ្នកដទៃដែរ។ ការថ្លែងដូច្នេះបន្ទាប់ពីអនុប្រធានាធិបតីអាមេរិក លោកជេឌីវេនថ្លែងប្រាប់ទីភ្នាក់ងារព័ត៌មានរ៉យទ័រថាអុីរ៉ង់ត្រូវតែកាត់បន្ថយឱ្យបានច្រើននូវការចម្រាញ់សារធាតុវិទ្យុសកម្ម៕ ប្រភព៖ Reuters
ចែករំលែកព័តមាននេះ