ខេត្តត្បូងឃ្មុំ ៖ ប្រជាពលរដ្ឋ ក៏ដូចជាអាជ្ញាធរ មានការព្រួយបារម្ភពីរឿងគម្រោងដេញថ្លៃផ្លូវ២ខ្សែ ដែលមានទឹកប្រាក់ជាង៥០០លានរៀល ត្រូវបានដាក់ឲ្យដេញថ្លៃនៅសាលាស្រុកតំបែរ ​នៅ​ព្រឹកថ្ងៃទី១៥ កញ្ញា ឆ្នាំ២០២៦ ។ ជាមួយនោះ ប្រធានការិ​យាល័យផែនការ និងវិនិយោគខេត្តព្រមានក្រុមហ៊ុន ដែលដេញថ្លៃបានត្រូវប្រើដែក​ទំហំ៨លីតាមស្តង់ដារបច្ចេក​ទេស បើពុំនោះទេនឹងមានបញ្ហា ។

សូមបញ្ជាក់ថា ចំពោះលទ្ធផលនៃការដេញថ្លៃផ្លូវចំនួន២ខ្សែ ក្នុងនោះមាន ៖ ១-នៅឃុំចុងជាច ផ្លូវបេតុងប្រវែង៤០០​ម៉ែត្រ តម្លៃប៉ាន់ស្មានជាង២៦៣លានរៀល ដោយមានក្រុមហ៊ុនចំនួន១៣ បានចូលរួមប្រកួតប្រជែងដេញបានលើក្រុមហ៊ុន ហ៊ន់ សោ​ភ័ណ្ឌ ក្នុងតម្លៃ៨៤លានរៀល ។ ២-ផ្លូវដីមួយខ្សែប្រវែង៣០៩៨ម៉ែត្រ មានលូមុខកាត់ផ្លូវ៣កន្លែង នៅឃុំត្រពាំងព្រីងតម្លៃដាក់ឲ្យដេញថ្លៃជាង២៦៩​លានរៀល ដោយមានក្រុមហ៊ុនចំនួន១១ ចូលរួមប្រកួតប្រជែង ដេញបានលើក្រុមហ៊ុនឡេង ស៊ាងហុង ក្នុងតម្លៃជាង​៥៩លានរៀល ។

លោកសឺង សេរីវ៉ាន់ឌី ប្រធានការិយាល័យផែនការ និងវិនិយោគខេត្តមានប្រសាសន៍ឲ្យដឹងថា តាមការពិនិត្យឯកសារក្រុមហ៊ុនដែលបានដាក់ពាក្យចូលរួមដេញថ្លៃ គឺមានក្រុមហ៊ុនខ្លះបំពេញ​ឯកសារមិនបានត្រឹមត្រូវ សូមកុំឱ្យមានបែបនេះបន្តទៀត ។ ការប្រកួតប្រជែងដេញថ្លៃ គឺគណៈកម្មការចង់បានក្រុមហ៊ុនមួយ​ដែលដេញបានធ្វើផ្លូវ មានគុណភាពតាមស្តង់ដារបច្ចេក​ទេស ហើយទទួលបានប្រាក់ចំណេញ ។ តែបើការដេញចុះច្រើនទៅហើយនោះ​និងធ្វើឱ្យ​ផ្លូវពិតជាមិនមានគុណភាពឡើយ ។

លោកប្រធានរូបនេះបានបន្តថា ​តាម​ដែលរូបលោកដឹងមានក្រុមហ៊ុនមួយបានដេញថ្លៃផ្លូវបេតុងនៅឃុំមួយនោះក្នុងខេត្តត្បូងឃ្មុំ ពេលដែលស្ថាបនាផ្លូវមិនត្រូវស្តង់ដា ហើយក្រុមហ៊ុននោះបានធ្វើតបន្ថែមទៀត ដែលរឹតតែធ្វើឲ្យផ្លូវកាន់តែអន់ចំពោះមុខ និងមានវិធានការដល់​ក្រុមហ៊ុនមួយនោះមិនឲ្យរួចខ្លួនបានទេ ។ ក្រុមហ៊ុនឡេង ស៊ាងហុង ដេញថ្លៃផ្លូវដីមួយខ្សែបាននៅឃុំត្រពាំងព្រីង ដោយដេញចុះថោកច្រើនបានអះអាងថា រូបលោកនិងស្ថាបនាផ្លូវតាមបទដ្ឋានបច្ចេកទេសសៀវភៅប៊ីប មិនឲ្យខុសត្រង់ណាមួយនោះទេ គឺមានគុណភាព ។

គេរង់ចាំមើលពេលខាងមុខក្រុមហ៊ុនទាំងពីរ ដែលដេញថ្លៃផ្លូវចុះច្រើនបែបនេះ តើគុណភាពផ្លូវ ពិតជាធ្វើតាមស្តង់ដារបច្ចេក​ទេសមែនដែរឬទេ?​ ដូចអត់សង្ឃឹម​ និងដូចអត់ជឿទេ ព្រោះតាមធម្មតា​ វាមិនដែល​គេសុខចិត្ត​រកស៊ី​ខាតទេ…មែនទេ?