ខេត្តស្វាយរៀង៖ មានករណីគ្រោះថ្នាក់ចរាចរណ៍មួយ បានកើតឡើង បង្កដោយអ្នកបើកបររថយន្តបើកបរក្នុងល្បឿនលឿន នៅតំបន់ទីប្រជុំជន រេចង្កូតទៅបុកបង្កាន់ដៃស្ពានប្រសូតិ លាន់ដូចរន្ទះ បណ្តាលឱ្យបាក់បង្កាន់ដៃស្ពានអស់ពាក់កណ្តាល ហើយធ្លាក់ក្បាលរថយន្តទៅក្នុងព្រែក កៀបជាប់ទ្រុងនៅលើស្ពានមួយកំណាត់ បង្កឱ្យមានការភ្ញាក់ផ្អើលយ៉ាងខ្លាំងដល់អ្នកធ្វើដំណើរតាមដងផ្លូវ និងប្រជាពលរដ្ឋនៅផ្សារប្រសូតិ មកចោមរោមមើល។ សំណាងល្អ ហេតុការណ៍នេះ មិនបានបង្កឱ្យមានគ្រោះថ្នាក់ដល់អ្នកធ្វើដំណើរផ្សេងទៀតឡើយ ចំណែកឯអ្នកបើកបររងរបួសស្រាល ។
ករណីរថយន្តប្រភេទវ៉េអង បើកបុកបង្កាន់ដៃស្ពានប្រសូតិខាងលើនេះ បានកើតឡើងនៅវេលាម៉ោង០៤និង១០នាទីរសៀលថ្ងៃទី១៥ ខែកញ្ញា ឆ្នាំ២០២៦ នៅលើកំណាត់ផ្លូវជាតិលេខ១ ចំណុចស្ពានប្រសូតិ ស្ថិតក្នុងភូមិសម្ភ័រ ឃុំសំបួរ ស្រុកស្វាយទាប ខេត្តស្វាយរៀង ។
តាមប្រភពព័ត៌មានពីអ្នកឃើញហេតុការណ៍ផ្ទាល់ភ្នែក បានឱ្យដឹងថា មុនពេលកើតហេតុ គេបានឃើញរថយន្តប្រភេទវ៉េអង ១គ្រឿង ពាក់ស្លាកលេខ 4A-1841 បើកបរពីទិសខាងកើតទៅទិសខាងលិចក្នុងល្បឿនយ៉ាងលឿន។ លុះមកដល់ពាក់កណ្តាលស្ពានប្រសូតិ រថយន្តក៏បានរេចង្កូតមកខាងស្តាំដៃ រួចបុកបុកបង្កាន់ដៃស្ពានតែម្តង ។
ចំណែកអ្នកបើកបរវិញ បានរៀបរាប់ប្រាប់សមត្ថកិច្ចថា រូបគេងងុយដេក ហើយបានងោកមួយភាំង ទើបជ្រុលរេចង្កូតទៅបុកបង្កាន់ដៃស្ពានបែបនេះ។ នេះជាសំណាងល្អហើយដែលជ្រុលទៅបុកបង្កាន់ដៃស្ពាន បើសិនជាជ្រុលរេចង្កូតចូលទៅក្នុងផ្សារប្រសូតិវិញ មិនដឹងជាមានរឿងអ្វីកើតឡើងនោះឡើយ ។
ក្រោយកើតហេតុ សមត្ថកិច្ចបានទំនាក់ទំនងហៅរថយន្តស្ទូច មកស្ទូចយករថយន្តបង្កចេញពីលើស្ពាន ដើម្បីសម្រួលចរាចរណ៍ឱ្យមានការធ្វើដំណើរឡើងវិញ ព្រមទាំងនាំយករថយន្តទៅដោះស្រាយតាមនីតិវិធីច្បាប់ ។
សមត្ថកិច្ច បានធ្វើការសន្និដ្ឋានថា មូលហេតុនៃគ្រោះថ្នាក់នេះ គឺបណ្តាលមកពីការបើកបរក្នុងល្បឿនលឿននៅតំបន់ទីប្រជុំជន និងខ្វះការប្រុងប្រយ័ត្ន។
គួររំលឹកផងដែរថា នៅក្នុងសប្តាហ៍នេះ ខេត្តស្វាយរៀងមានករណីរថយន្តបើកបរលឿនជ្រុលបុកចូលផ្ទះប្រជាពលរដ្ឋចំនួន ២ករណី និងបុកបង្កាន់ដៃស្ពានចំនួន ១ ករណី ៖
ករណីទី១៖ រថយន្តម៉ាក Highlander បើកបុកចូលផ្ទះ រួចក្រឡាប់ទើរលើដំបូលផ្ទះប្រជាពលរដ្ឋ នៅភូមិព្រៃផ្តៅ សង្កាត់ច្រកម្ទេស ក្រុងបាវិត។
ករណីទី២៖ រថយន្តក្រុងដឹកទាហាន រេចង្កូតបុកចូលផ្ទះប្រជាពលរដ្ឋ នៅផ្សារជីភូ ក្រុងបាវិត ។
ករណីទី៣៖ រថយន្តប្រភេទវ៉េអង បើកបុកបង្កាន់ដៃស្ពានប្រសូតិ ស្រុកស្វាយទាប នេះតែម្តង ៕
ចែករំលែកព័តមាននេះ