ខេត្តរតនគិរី ៖ អ្នកប្រកបរបរដឹកជញ្ជូនឈើតាមម៉ូតូ ដើម្បីបានកម្រៃចិញ្ចឹមជីវិតគ្រួសារដែល​មានជីវភាពខ្វះខាតផងនោះ ពេលនេះស្រាប់តែជួបគ្រោះអកុសលក្នុងស្ថានភាពផ្លូវកោង ហើយរអិលក៏ដួលម៉ូតូត្រូវឈើសង្កត់ពីលើ បណ្តាលឱ្យស្លាប់ភ្លាម​មួយរំពេច ។

ហេតុការណ៍គ្រោះថ្នាក់ចរាចរណ៍ម៉ូតូកែច្នៃមួយគ្រឿងដឹកគល់ឈើយ៉ាងធំ ហើយសង្កត់បណ្ដាល​ឱ្យស្លាប់បាត់បង់ជីវិតភ្លាមៗនោះ បានកើតឡើងនៅវេលាម៉ោង៩ និង១៥នាទីព្រឹកនៅថ្ងៃទី​១៤​ កញ្ញា ឆ្នាំ​២០២៦ ស្ថិតត្រង់ចំណុចផ្លូវលំស្ថិតក្នុងភូមិ​ឡុំ ឃុំ​ប៉ក់ញ៉ែ ស្រុក​អូរយ៉ាដាវ ខេត្ត​រតនគិរី។

តាមប្រភពបានឱ្យដឹងថា ជនរងគ្រោះដែលស្លាប់ឈ្មោះ គ្លាន ពោល ភេទប្រុស អាយុ២៨ឆ្នាំ ជនជាតិ​ចារាយ រស់នៅភូមិសោមត្រក ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី ។ ហើយជនរងគ្រោះមានប្រពន្ធឈ្មោះ សេវ ផត អាយុ២៧ឆ្នាំ ជនជាតិ​ចារាយ មានកូនក្នុងបន្ទុកពីរនាក់ ទាំងនៅក្នុងផ្ទៃម្នាក់ទៀតផងដែរ ។

តាមប្រភពពីប្រជាពលរដ្ឋរស់នៅក្បែរកន្លែងកើតហេតុបានឱ្យដឹងថា ករណីគ្រោះថ្នាក់ចរា​ចរណ៍ដឹកគល់ឈើ ហើយដួលម៉ូតូស្លាប់មនុស្សម្នាក់នោះ គឺចេញពីភូមិសោមត្រក ឆ្ពោះទៅច្រករបៀង ភូមិឡុំឃុំបកញ៉ៃ ស្រុកអូរយ៉ាដាវ ខេត្ត​រតនគីរី ចូលទៅប្រទេសវៀតណាម ។ តែគ្រោះអកុសល្យក៏ជួបគ្រោះថ្នាក់តាមផ្លូវជិតដល់ច្រករបៀងនោះតែម្តង ។

ក្រោយកើតហេតុ សមត្ថកិច្ច និងលោកមេភូមិបានចុះទៅសួរនាំអំពីហេតុការណ៍ រួចក៏នាំយកម៉ូតូទៅរក្សា​ទុកនៅប៉ុស្ដិ៍រដ្ឋបាល រង់ចាំសម្រួល​ដោះស្រាយតាមក្រោយ ។ ចំណែកឯសាកសពត្រូវសាច់ញាតិបងប្អូនយកទៅធ្វើបុណ្យតាមប្រពៃណីជនជាតិដើមភាគតិច ។

តាមប្រភពពីប្រជាពលរដ្ឋ​រស់នៅក្នុងភូមិឡុំបានឱ្យដឹងថា ទោះជាមានករណីដឹកឈើតាមម៉ូតូ ហើយដួលសង្កត់លើរហូតដល់ស្លាប់យ៉ាងណាក៏ដោយ ក៏សមត្ថកិច្ចនៅតែបើកផ្លូវឱ្យមានម៉ូតូជាច្រើនគ្រឿង សម្រុកដឹកជញ្ជូនឈើយ៉ាងគគ្រឹកគគ្រេងដដែល ដោយពុំមានការបង្ក្រាប ឬទប់ស្កាត់នោះទេ ពោលគឺសម្រុកដឹកលើសដើម ទំនងបានផលប្រយោជន៍ ដោយចោរដឹកឈើផង និងខ្លាចក្រោយលេចឮមានគ្រោះថ្នាក់ម៉ូតូដឹកឈើដួលស្លាប់មនុស្ស​អាចនឹងមានបទបញ្ជាថ្នាក់លើតឹងរឹងឈានដល់ទប់ស្កាត់ និងការបង្ក្រាបដែលនាំឱ្យខាតលាភទៅថ្ងៃក្រោយ ។

តែទោះជាយ៉ាងណា ក៏មជ្ឈដ្ឋានជុំវិញ​កំពុងរង់ចាំមើលទៅថ្ងៃបន្ទាប់ៗទៀត មានការទប់ស្កាត់បង្ក្រាបដែរឬទេ ព្រោះរបរនោះក៏ជារបរចិញ្ចឹមឆ្នាំងរបស់សមត្ថកិច្ចគ្រប់លំដាប់ថ្នាក់ផងដែរ ប្រចាំការនៅក្នុងតំបន់នោះ ​។

បើគ្មានចោរលួចកាប់ឈើដឹកទៅស្រុកវៀតណាមទេ ច្បាស់ជាស្ងួតឆ្នាំងបាយទេដឹង?…ហេ! ហេ!​

ព័ត៌មានបន្ថែមនឹងមានផ្សាយជូនលើកាសែតកោះសន្តិភាព ។