អាសូរណាស់! លោកតាអាចារ្យមួយរូប ជួបគ្រោះអកុស.ល ពេលជិះម៉ូតូធ្វើដំណើរតាមផ្លូវ
- ព្រះសីហនុ
ខេត្តព្រះសីហនុ ៖ លោកតាអាចារ្យ មួយរូប បានស្លាប់ភ្លាមៗនៅកន្លែងកើតហេតុ ក្នុងគ្រោះថ្នាក់ចរាចរ រវាងរថយន្តធុនធំសណ្តោងរ៉ឺម៉កដឹកទូកុងតឺន័របុកជាមួយម៉ូតូ១គ្រឿង ក្នុងទិសដៅបញ្ច្រាសគ្នា។
ហេតុការណ៍ខាងលើនេះ បានកើតឡើងនៅវេលាម៉ោង៩និង៤០នាទីព្រឹកថ្ងៃទី១៤ ខែកញ្ញា ឆ្នាំ២០២៦ នៅតាមបណ្ដោយផ្លូវ១៤៨ ចន្លោះបង្គោលគីទ្បូម៉ែត្រលេខ (១៧-១៨) ស្ថិតនៅភូមិ១ ឃុំអូរត្រេះ ស្រុកស្ទឹងហាវ ខេត្តព្រះសីហនុ ។
សមត្ថកិច្ចជំនាញចរាចរណ៍នៅស្រុកស្ទឹងហាវ ខេត្តព្រះសីហនុ បានឱ្យដឹងថា រថយន្តបង្កម៉ាក FUSO ពណ៌ខៀវ ពាក់ស្លាកលេខ ភ្នំពេញ ៣F-០៥២៩ សណ្តោងរ៉ឺម៉ក ពាក់ស្លាកលេខ ភ្នំពេញ ៤A -៧៥៨៧ អ្នកបើកបរមិនស្គាល់អត្តសញ្ញាណក្រោយកើតហេតុ រត់គេចខ្លួនបាត់ ។ ចំណែកភាគីខាងម៉ូតូម៉ាកហុងដាឌ្រីម ពណ៌ខ្មៅ ពាក់ស្លាកលេខ ព្រះសីហនុ ១B-១០៥៩ បើកបរដោយឈ្មោះ ឈុន អឿន ភេទប្រុស អាយុ៧៩ ឆ្នាំ ជាអាចារ្យវត្តពោធិ៍មានជ័យ ស្នាក់នៅភូមិ២ ឃុំទំនប់រលក ស្រុកស្ទឹងហាវ ខេត្តព្រះសីហនុ (ជនរងគ្រោះបានស្លាប់នៅនឹងកន្លែងហេតុ) ។
សមត្ថកិច្ចជំនាញចរាចរណ៍នៅស្រុកស្ទឹងហាវ ខេត្តព្រះសីហនុ បានឱ្យដឹងបន្តថា មុនពេលកើតហេតុ រថយន្តបង្កម៉ាក FUSO បានធ្វើដំណើរក្នុងទិសដៅស្ទឹងហាវ-ព្រះសីហនុ លុះមកដល់ចំណុចខាងលើបានបុកជាមួយម៉ូតូមួយគ្រឿងម៉ាកហុងដាឌ្រីម បណ្តាលឱ្យអ្នកបើកបរម៉ូតូស្លាប់នៅកន្លែងហេតុ ។
ក្រោយពេលកើតហេតុ សពជនរងគ្រោះត្រូវបានសាច់ញាតិយកទៅធ្វើបុណ្យតាមប្រពៃណី រីឯរថយន្ត និងម៉ូតូ ត្រូវបានយកមករក្សាទុកនៅអធិការដ្ឋាននគរបាលស្រុកស្ទឹងហាវ រង់ចាំដោះស្រាយតាមនីតិវិធី ៕
ចែករំលែកព័តមាននេះ