នាវាកងទ័ពជើងទឹកឥណ្ឌា០១គ្រឿងចូលចតកំពង់ផែមូលដ្ឋានសមុទ្ររាមធ្វើទស្សនកិច្ចនៅកម្ពុជា
- ព្រះសីហនុ
ខេត្តព្រះសីហនុ ៖ នៅព្រឹកថ្ងៃទី១២ កញ្ញា ឆ្នាំ២០២៦ នេះ នាវាកងទ័ពជើងទឹកឥណ្ឌា ឈ្មោះ INS KULISH (P63) ដឹកនាំដោយលោកវរនាវីទោ Suraj Kumar Singh មេបញ្ជាការនាវា បានចូលសំចតនៅផែលេខ២ មូលដ្ឋានសមុទ្ររាមប្រកបដោយសុវត្ថិភាព ក្នុងដំណើរទស្សនកិច្ចរយៈពេល៤ថ្ងៃ គិតចាប់ពីថ្ងៃទី១២ ដល់ថ្ងៃទី១៥ ខែកញ្ញា ឆ្នាំ២០២៦ នៅព្រះរាជាណាចក្រកម្ពុជា ដើម្បីពង្រឹងចំណងសាមគ្គីភាព មិត្តភាព និងកិច្ចសហប្រតិបត្តិការ រវាងកងទ័ពជើងទឹកនៃប្រទេសទាំងពីរ ក៏ដូចជារដ្ឋាភិបាលនៃប្រទេសទាំងពីរ។
ក្នុងឳកាសចូលសំចត នៅកំពង់ផែមូលដ្ឋានសមុទ្ររាម ដោយមានការទទួលស្វាគមន៍ពីនាយ នាយរងកងទ័ពជើងទឹកមូលដ្ឋានសមុទ្ររាម ដឹកនាំដោយលោកឧត្តមនាវីត្រី អ៊ិន សុខេមរា មេបញ្ជាការរងមូលដ្ឋានសមុទ្ររាម ។
ជាមូយគ្នានោះដែរ លោកឧត្តមនាវីត្រី អ៊ិន សុខេមរា មេបញ្ជាការរងមូលដ្ឋានសមុទ្ររាម បានទទួលស្វាគមន៍ការចូលចតរបស់នាវាកងទ័ពជើងទឹកឥណ្ឌាមកដល់ព្រះរាជាណាចក្រកម្ពុជា ជាពិសេស ការចូលសំចតនៅកំពង់ផែមូលដ្ឋានសមុទ្រ ប្រកបដោយសុវត្ថិភាព និងសុំជូនពរអោយនាយ នាយរង ពលនាវិកកងទ័ពជើងទឹកឥណ្ឌាទាំងអស់ ទទួលបានសុខសុវត្ថិភាពគ្រប់គ្នា ក្នុងបេសកកម្មទស្សនកិច្ច ស្នាក់នៅនាទឹកដីខេត្តព្រះសីហនុនៃព្រះរាជាណាចក្រកម្ពុជា ។
តាមការគ្រោងទុក ក្នុងការស្នាក់នៅទស្សនកិច្ចនៅព្រះរាជាណាចក្រកម្ពុជាគណៈប្រតិភូកងទ័ពជើងទឹកឥណ្ឌា មានគម្រោងចូលជួបសម្ដែងការគួរសមជាមួយ លោកអភិបាលខេត្តព្រះសីហនុ លោកមេបញ្ជាការមូលដ្ឋានសមុទ្ររាមនិងថ្នាក់ដឹកនាំក្រសួងការពារជាតិមួយចំនួនផងដែរ ។
ចែករំលែកព័តមាននេះ