មន្ទីរសាធារណការខេត្តតាកែវ បន្តចុះថែទាំ និងជួសជុលហេដ្ឋារចនាសម្ព័ន្ធផ្លូវថ្នល់ជាច្រើនខ្សែ ដើម្បីធានាសុវត្ថិភាពចរាចរណ៍
- តាកែវ
តាកែវ ៖ ជួបជាមួយកោះសន្តិភាព លោក ណុប នី ប្រធានមន្ទីរសាធារណការ និងដឹកជញ្ជូនខេត្តតាកែវ បានអោយមន្ត្រីជំនាញ និងក្រុមការងារបច្ចេកទេសនៃមន្ទីរសាធារណការខេត្ត បានខិតខំប្រឹងប្រែងបន្តសកម្មភាពចុះថែទាំ ជួសជុល និងពិនិត្យគុណភាពហេដ្ឋារចនាសម្ព័ន្ធផ្លូវថ្នល់ជាច្រើនខ្សែក្នុងខេត្ត កាលពីថ្ងៃទី១១ ខែកញ្ញា ឆ្នាំ២០២៦ ។
ផ្អែកតាមរបាយការណ៍សកម្មភាពការងារប្រចាំថ្ងៃ វិស័យសាធារណការ ត្រូវបានអនុវត្តយ៉ាងសកម្មលើបណ្តាញផ្លូវសំខាន់ៗ រួមមាន ការងារថែទាំប្រចាំ ផ្លូវជាតិលេខ៣ (NR3)៖ បន្តការងារលាបថ្នាំពណ៌ក្បាលស្ពាន ចន្លោះពី PK66+000 ដល់ PK69+000 និងបន្តការងារសម្អាតបរិក្ខារផ្លូវថ្នល់ ចន្លោះពី PK69+000 ដល់ PK71+000 ។ផ្លូវខេត្តលេខ១តេកា១ (PR1TK1)៖ បន្តការងារស្រោចកៅស៊ូ រោយកម្ទេចថ្ម និងលុបសំបុកមាន់ ចន្លោះពី PK00+000 ដល់ PK03+000។
ផ្លូវខេត្តលេខ ១តេកា៦ (PR1TK6)៖ ជួសជុលស្រទាប់គ្រឹះ និងលុបសំបុកមាន់ ចន្លោះពី PK00+000 ដល់ PK03+000។ ការងារថែទាំខួប៖ ផ្លូវខេត្តលេខ ១២៩ (PR129)៖ បន្តការងារចាក់ កៀរ កិន និងបង្ហាប់ថ្មម៉ិច (M30) បានប្រវែង២០០ម៉ែត្របន្ថែមទៀត (សរុបសម្រេចបាន ៦០០ម៉ែត្រ លើប្រវែងសរុប ១,៤០០ម៉ែត្រ) ចាប់ពី PK02+600 ដល់ PK04+000។ ការងារផ្សេងៗ៖ ផ្លូវជាតិលេខ៤១ (NR41)៖ ចុះត្រួតពិនិត្យ និងស្រង់ស្ថិតិបរិក្ខារផ្លូវថ្នល់ជាប្រចាំ ។
នាឱកាសនោះ លោក ណុប នី ប្រធានមន្ទីរសាធារណការ និងដឹកជញ្ជូនខេត្តតាកែវបានបន្តទៀតថា «ការថែទាំ និងជួសជុលហេដ្ឋារចនាសម្ព័ន្ធផ្លូវ-ស្ពាន គឺជាភារកិច្ចអាទិភាពបំផុតដែលមន្ទីរសាធារណការខេត្តតាកែវ ត្រូវធ្វើជាប្រចាំដូចភ្លៀងរលឹម ។
យើងមិនត្រូវបណ្តែតបណ្តោយឱ្យផ្លូវមានការខូចខាតធ្ងន់ធ្ងរឡើយ ពោលគឺត្រូវចាត់វិធានការឆ្លើយតបឱ្យបានទាន់ពេលវេលា ដើម្បីធានាសុវត្ថិភាពក្នុងការធ្វើដំណើរ បញ្ចៀសគ្រោះថ្នាក់ចរាចរណ៍ និងសម្រួលដល់ការដឹកជញ្ជូនកសិផលផ្សេងៗរបស់ប្រជាពលរដ្ឋឱ្យបានរហ័ស និងចំណាយតិច»។
លោក ណុប នី ប្រធានមន្ទីរបានបញ្ជាក់ និងបានអំពាវនាវដល់បងប្អូនប្រជាពលរដ្ឋអ្នកបើកបរ និងម្ចាស់យានយន្តដឹកជញ្ជូនទាំងអស់ ឱ្យចូលរួមសហការថែរក្សាសម្បត្តិសាធារណៈ ដោយកាត់បន្ថយការដឹកជញ្ជូនលើសទម្ងន់កំណត់ និងត្រូវបើកបរដោយការប្រុងប្រយ័ត្នខ្ពស់ នៅពេលឆ្លងកាត់ការដ្ឋានដែលកំពុងជួសជុល ដើម្បីធានាឱ្យផ្លូវថ្នល់ទាំងអស់មានភាពរឹងមាំ និងប្រើប្រាស់បានយូរអង្វែង ៕
ចែករំលែកព័តមាននេះ