ខេត្តស្វាយរៀង ៖ ដោយអនុវត្តតាមអនុក្រឹត្យលេខ០៣ របស់រាជរដ្ឋាភិបាលកម្ពុជា នៅថ្ងៃទី០៩ ខែកញ្ញា ឆ្នាំ២០២៦ លោក ម៉ែន អេង អភិបាលរងខេត្ត តំណាងលោក ប៉េង ពោធិ៍សា អភិបាលខេត្តស្វាយរៀង ក្រោមការសម្របសម្រួលនីតិវិធីពីលោក ចាន់ វណ្ណៈ ព្រះរាជអាជ្ញារង នៃអយ្យការអមសាលាដំបូងខេត្តស្វាយរៀង បានដឹកនាំកងកម្លាំងចម្រុះ និងក្រុមការងារជំនាញ ចុះធ្វើការត្រួតពិនិត្យជាក់ស្ដែងនៅទីតាំង «សណ្ឋាគារ ណូបែល បាវិតហូថែល» (Nobel Bavet Hotel) ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀងឃាត់ខ្លួនជនសង្ស័យ០៦នាក់ ដកហូតអាវុធខ្លីម៉ាកK59 ចំនួន០១ដើម និងសម្ភារបទល្មើសមួយចំនួន ។
ប្រតិបត្តិការនេះ ក៏មានការចូលរួមសហការពីសំណាក់លោក ម៉ែន ចាន់រ៉ា អភិបាលក្រុងបាវិត ព្រមទាំងកងកម្លាំងសមត្ថកិច្ច និងអាជ្ញាធរពាក់ព័ន្ធជាច្រើនរូបផងដែរ ។
បើតាមសមត្ថកិច្ចបានឲ្យដឹងថា ប្រតិបត្តិការនេះធ្វើឡើងនៅថ្ងៃទី០៩-១០ កញ្ញា ២០២៦ ជាលទ្ធផល នៃការចុះត្រួតពិនិត្យ សមត្ថកិច្ចបានរកឃើញជនបរទេសស្នាក់នៅសរុបចំនួន ០៨នាក់ (ស្រី០២នាក់) ទាំងអស់ជាជនជាតិវៀតណាម ក្នុងនោះមានលិខិតឆ្លងដែនចំនួន ០៤ក្បាល ។
ប្រភពបន្តថា តាមការពិនិត្យតាមបន្ទប់នីមួយៗ រួមមាន ៖ បន្ទប់លេខ៣៣០៥ រកឃើញជនបរទេសស្នាក់នៅចំនួន ០២នាក់ (ស្រី ០១នាក់) ជនជាតិវៀតណាម ដោយមានកាន់កាប់លិខិតឆ្លងដែនត្រឹមត្រូវ។ បន្ទប់លេខ២២២០ សមត្ថកិច្ចបានរកឃើញសម្ភារៈ និងវត្ថុតាងរួមមាន៖ អាវុធខ្លីម៉ាក K59 ចំនួន ០១ដើម បង់ចំនួន ០១ និងគ្រាប់ចំនួន ០៣គ្រាប់, កុំព្យូទ័រយួរដៃ (Laptop) ចំនួន ០៤គ្រឿង, ទូរសព្ទដៃផ្ទាល់ខ្លួន ចំនួន ១១គ្រឿង, លិខិតឆ្លងដែន ចំនួន ០២ក្បាល និងរថយន្តម៉ាក អាល់ហ្វាត (Alphard) ពណ៌ស ចំនួន ០១គ្រឿង ពាក់ស្លាកលេខ ភ្នំពេញ 2BU-8959 ។
ក្រោយបញ្ចប់ការត្រួតពិនិត្យ ក្រុមការងារបានសម្រេចនាំខ្លួនជនជាតិវៀតណាម ចំនួន ០៦នាក់ (ស្រី ០១នាក់) រួមជាមួយវត្ថុតាងអាវុធខ្លី១ដើម រថយន្ត ០១គ្រឿង និងសម្ភារអេឡិចត្រូនិកទាំងអស់ បញ្ជូនទៅកាន់ការិយាល័យជំនាញ នៃស្នងការដ្ឋាននគរបាលខេត្តស្វាយរៀង ដើម្បីបន្តនីតិវិធីសាកសួរ និងចាត់ការតាមផ្លូវច្បាប់ជាធរមាន ៕
ចែករំលែកព័តមាននេះ