រឿងលោកប៉ូលិសម្នាក់បើកឡានកិ.នសត្វទាងា.ប់ជិត១០០០ក្បាលនៅស្រុកពាមជរ ត្រូវបានដោះស្រាយបញ្ចប់ហើយ
- ព្រៃវែង
ខេត្តព្រៃវែង ៖ រយៈពេលមួយខែពេញ ទីបំផុត រឿងរ៉ាវលោកវរសេនីយ៍ទោ ចាន់ ដារ៉ា ប្រធានការិយាល័យសេដ្ឋកិច្ចនៃស្នងការដ្ឋាននគរបាលខេត្តព្រៃវែង ដែលស្រវឹងស្រា ហើយបើកឡានបុកនិងកិនសត្វទារបស់ប្រជាពលរដ្ឋងាប់អស់ជិត១០០០ក្បាលនៅស្រុកពាមជរ ត្រូវបានដោះស្រាយបញ្ចប់រឿងហើយ ក្រោមការសម្របសម្រួលពីអាជ្ញាធរមូលដ្ឋាន ។
ការសម្របសម្រួលបញ្ចប់រឿងនេះ ធ្វើឡើងកាលពីព្រឹកថ្ងៃទី០៩ កញ្ញា នៅក្នុងសាលាឃុំកោះសំពៅ ស្រុកពាមជរ ដោយភាគីលោកវរសេនីយ៍ទោ ចាន់ ដារ៉ា ប្រធានការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តព្រៃវែង បានទទួលស្គាល់ការបើកកិនសត្វទាងាប់ចំនួន៩០០ក្បាល និងបានយល់ព្រមសងសំណងចំនួន១០លានរៀល ហើយក្មួយស្រីកសិករជាម្ចាស់ទាឈ្មោះ ម៉ៃ ទូច ក៏បានព្រមព្រៀងទទួលយកសំណងនេះផងដែរ ។
គួររំលឹកផងដែរថា កាលពីថ្ងៃទី០៩ ខែសីហា ឆ្នាំ២០២៦ លោកវរសេនីយ៍ទោ ចាន់ ដារ៉ា ប្រធានការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តព្រៃវែង បានបើកបររថយន្តទាំងស្រវឹងស្រា ហើយបានបុកកិនទារបស់កសិករ ដែលកំពុងដេញឆ្លងកាត់ផ្លូវបណ្ដាលឲ្យងាប់ទាអស់ជិត1000ក្បាល ។
ភ្លាមៗ ក្រោយកើតហេតុ ភាគីម្ចាស់រថយន្តមិនបានចរចា និងសងសំណងដល់ម្ចាស់ទានោះទេ ខណៈដែលម្ចាស់ទាបានព្យាយាមទំនាក់ទំនងទៅលោកវរសេនីយ៍ទោ ចាន់ ដារ៉ា ជាច្រើនលើកច្រើនសារ ដើម្បីទាមទារសំណងការខូចខាត ប៉ុន្តែពុំទទួលបានលទ្ធផល ដល់អស់ជម្រើសម្ចាស់ទាក៏បានបង្ហោះរឿងរ៉ាវរបស់ខ្លួននៅលើបណ្ដាញសង្គម ទើបធ្វើឲ្យមានការភ្ញាក់ផ្អើលឡើង និងមានបណ្ដាញសារព័ត៌មានជាច្រើនបានធ្វើការចុះផ្សាយជាបន្តបន្ទាប់ រហូតដល់លោកវរសេនីយ៍ទោ ចាន់ ដារ៉ា ប្រធានការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តព្រៃវែង ទ្រាំលែងបានក៏ចេញមុខសារភាពទទួលស្គាល់កំហុស និងព្រមសងសំណងដល់កសិករជាម្ចាស់ទាចំនួន១០លានរៀលនៅព្រឹកថ្ងៃទី០៩ កញ្ញា នេះ ដើម្បីបញ្ចប់រឿងតែម្ដង ។
ចែករំលែកព័តមាននេះ