កម្ពុជាត្រៀមបញ្ជូន ១៤ប្រភេទកីឡាទៅចូលរួមប្រកួតកីឡាអាស៊ីលើកទី ២០នៅប្រទេសជប៉ុន
- ភ្នំពេញ
រាជធានីភ្នំពេញ ៖ ក្រសួងអប់រំ យុវជននិងកីឡា ដែលជាស្ថាប័នគ្រប់គ្រងកីឡារបស់កម្ពុជាបានត្រៀមខ្លួនរួចជាស្រេចក្នុងការបញ្ជូនកីឡាចំនួន១៤ប្រភេទឱ្យទៅចូលរួមក្នុងព្រឹត្តិការណ៍កីឡាអាស៊ីលើកទី២០ នៅទីក្រុងណាកូយ៉ា ប្រទេសជប៉ុន ដែលនឹងរៀបចំធ្វើចាប់ពីថ្ងៃទី១៩ខែកញ្ញា ដល់ថ្ងៃទី៤ ខែតុលា ឆ្នាំ២០២៦។
តាមរយៈសិក្ខាសាលាស្ដីពីវិន័យ និងក្រមសីលធម៌ដែលបានធ្វើឡើងនៅមជ្ឈមណ្ឌលជាតិហ្វឹកហ្វឺនកីឡាកាលពីថ្ងៃទី៧ ខែកញ្ញា ឆ្នាំ២០២៦ ឯកឧត្តមវ៉ាត់ ចំរើន រដ្ឋលេខាធិការក្រសួងអប់រំយុវជន និងកីឡា តំណាងដ៏ខ្ពង់ខ្ពស់របស់ឯកឧត្តមបណ្ឌិតសភាចារ្យហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍ថា វគ្គសិក្ខាសាលានេះពិតជាមានសារៈសំខាន់ខ្លាំងណាស់ក្នុងការផ្ដល់នូវចំណេះដឹងនិងបទពិសោធន៍ថ្មីៗ ទៅដឹកនាំកីឡាករ កីឡាការិនីចូលរួមប្រកួតកីឡាអាស៊ីលើកទី២០ នៅទីក្រុងណាកូយ៉ា ប្រទេសជប៉ុន ប្រកបដោយ Fair Play សុវត្ថិភាព និងទទួលបានជោគជ័យ ។
ឯកឧត្តមវ៉ាត់ ចំរើន បានបន្តឱ្យដឹងទៀតថាកីឡាករ កីឡាការិនីដែលត្រូវមានបេសកកម្មទៅចូលរួមប្រកួតកីឡាអាស៊ីលើកទី២០នៅប្រទេសជប៉ុនត្រូវចាំថា រាជរដ្ឋាភិបាលកម្ពុជាតែងតែយកចិត្តទុកដាក់ លើកទឹកចិត្តផ្ដល់ជាថាមពលជានិច្ចរាល់ពេលចេញទៅប្រកួតនៅលើឆាកអន្តរជាតិ ។ ទន្ទឹមគ្នានេះដែរ ឯកឧត្តមបានសំណូមពរទៅដល់ប្រតិភូដឹកនាំ គ្រូបង្វឹក គ្រូជំនួយ និងកីឡាករ កីឡាការិនីទាំងអស់ត្រូវយកចិត្តទុកដាក់ជាចម្បងក្នុងការថែរក្សាសុខភាពឱ្យបានល្អមុនពេលចេញដំណើរ ជាពិសេសការទទួលទានចំណីអាហារ។
លោក យាន គីស៊ីវុត្ថា ប្រធានមជ្ឈមណ្ឌលជាតិហ្វឹកហ្វឺនកីឡាបានឱ្យដឹងថា វគ្គសិក្ខាសាលានេះមានតែរយៈពេល៣ថ្ងៃប៉ុណ្ណោះគឺចាប់ពីថ្ងៃទី៧ ដល់ថ្ងៃទី៩ ខែកញ្ញា ។ ចំណែកប្រភេទកីឡាដែលត្រូវទៅចូលរួមប្រកួតទាំង១៤រួមមាន កីឡាហែលទឹក អត្តពលកម្ម ប្រដាល់សកល ជឺជីតស៊ូ យូដូ ការ៉ាតេ តេក្វាន់ដូWT ទ្រីយ៉ាត្លុង ចំបាប់ អ៊ីស្ពត បាល់ទាត់លើតុ គុនចម្រុះ ទូកក្ដោង និងសូហ្វតេនីស ៕
ចែករំលែកព័តមាននេះ