រឿងប៉ូលិសសេដ្ឋកិច្ចយកប្រាក់ ៩ពាន់ដុល្លារ ត្រូវតុលាការសម្រេចឃុំខ្លួន
- ស្វាយរៀង
ខេត្តស្វាយរៀង ៖ លោកចៅក្រមស៊ើបសួរសាលាដំបូងខេត្ត បានសម្រេចចេញដីកាបង្គាប់ឱ្យឃុំខ្លួនជនត្រូវចោទឈ្មោះ សុខ ធន់ ដាក់ពន្ធនាគារខេត្តជាបណ្តោះអាសន្ន ក្រោមបទចោទប្រកាន់«សមគំនិតក្នុងបទកំហែងយក» ពាក់ព័ន្ធនឹងករណីជំរិតទារប្រាក់ចំនួន៩ពាន់ដុល្លារអាមេរិក ពីរថយន្តដឹកក្រណាត់ ។ បើនិយាយឱ្យចំទៅ បុគ្គលនេះប្រៀបដូចជា«ចៃ»ម្នាក់បម្រើឲ្យប៉ូលិសសេដ្ឋកិច្ចខេត្តស្វាយរៀង ដែលគេប្រើសម្រាប់ការទទួលលុយដោយផ្ទាល់ មុនពេលយកមកឱ្យប៉ូលិសសេដ្ឋកិច្ចជាមេប្រចាំការខាងចាប់ ។ គួររំលឹកថា គ្មានរឿងអីដែលត្រូវរួចខ្លួនទេ ល្បីណាស់ ៩ពាន់ដុល្លារ
យោងតាមដីកាបង្គាប់ឱ្យឃុំខ្លួនលេខ៦៧៣ របស់សាលាដំបូងខេត្តស្វាយរៀង ចុះថ្ងៃទី៥ ខែកញ្ញា ឆ្នាំ២០២៦ ចេញដោយលោក យៀង សុខនីនាថ ចៅក្រមស៊ើបសួរនៃសាលាដំបូងខេត្ត បានឱ្យដឹងថា ជនត្រូវចោទឈ្មោះ សុខ ធន់ ភេទប្រុស អាយុ៤៧ឆ្នាំ ជនជាតិខ្មែរ មានទីលំនៅបច្ចុប្បន្ននៅភូមិហែកសំណាញ់ ឃុំម៉ឺនជ័យ ស្រុករំដួលខេត្តស្វាយរៀង ត្រូវបានដាក់ឱ្យស្ថិតក្រោមការ
ពិនិត្យពីបទ«សមគំនិតក្នុងបទកំហែងយក» ប្រព្រឹត្តនៅក្រុងស្វាយរៀង ខេត្តស្វាយរៀង ពីថ្ងៃទី៣ រហូតដល់ថ្ងៃទី៥ ខែសីហា ឆ្នាំ២០២៦ ។
អំពើនេះ ជាបទល្មើសដែលមានចែងនិងផ្តន្ទាទោសតាមមាត្រា២៩ មាត្រា៣៦៣ និងមាត្រា៣៦៤ នៃក្រមព្រហ្មទណ្ឌ ។
ពាក់ព័ន្ធនឹងករណីខាងលើនេះ ប្រភពព័ត៌មានបានឱ្យដឹងថា បុគ្គល សុខ ធន់ គឺជាអ្នកសមគំនិតក្នុងសកម្មភាពជំរិតទារប្រាក់ចំនួន៩ពាន់ដុល្លារពីរថយន្តដឹកក្រណាត់ ខណៈដែលជនសង្ស័យជាមេគំនិត ត្រូវបានគេស្គាល់ថា គឺលោកឈុន ឆាង អតីតប្រធានការិយាល័យប្រឆាំងបទល្មើសសេដ្ឋកិច្ចខេត្តស្វាយរៀង ដែលរហូតមកទល់ពេលនេះ មិនទាន់ត្រូវបានសមត្ថកិច្ចឃាត់ខ្លួននៅ
ឡើយទេ ។ សង្ស័យមេរួចខ្លួន កូនចៅជាប់គុកទេដឹង ? ហេ ! ហេ !
បច្ចុប្បន្ន ចៅក្រមស៊ើបសួរបានបង្គាប់ឱ្យភ្នាក់ងារមានសមត្ថកិច្ចនៃកម្លាំងសាធារណៈ នាំខ្លួនជនត្រូវចោទឈ្មោះ សុខ ធន់ ទៅឃុំខ្លួនបណ្តោះអាសន្ននៅពន្ធនាគារខេត្តស្វាយរៀងរួចហើយ ៕
ចែករំលែកព័តមាននេះ