កំពង់ចាម៖ លោករដ្ឋមន្ត្រី ហង់ ជួនណារ៉ុន បញ្ជាក់ថា សិស្សជាប់និទ្ទេស A ថយចុះ ដោយសារវិញ្ញាសាគណិតវិទ្យាមានភាពលំបាក
- កំពង់ចាម
ខេត្តកំពង់ចាម ៖ «ចំពោះសិស្សប្រឡងសញ្ញាបត្រទុតិយភូមិ ដែលទទួលបាននិទ្ទេសA នៅទូទាំងប្រទេស មានការធ្លាក់ចុះ១០០០នាក់ ក្នុងនោះកំពង់ចាម ថយចុះ៤០នាក់ ដោយសារតែមុខវិជ្ជាគណិតវិទ្យាដែលដាក់មានភាពលំបាក» ។ នេះជាប្រសាសន៍លើកឡើងពីសំណាក់ឯកឧត្តមបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ថ្លែងកាលពីព្រឹកថ្ងៃទី៤ កញ្ញា ឆ្នាំ២០២៦ ក្នុងឱកាសជួបសំណេះសំណាល និងបំពាក់គ្រឿងឥស្សរិយយសការងារជូនបុគ្គលិកអប់រំក្នុងខេត្តកំពង់ចាមជាច្រើនរយនាក់ ដោយធ្វើឡើងនៅសាលសន្និសីទសាលាខេត្ត ។
ឯកឧត្តមរដ្ឋមន្ត្រី ក្រសួងអប់រំ បានមានប្រសាសន៍លើកឡើងថា ការប្រលងសញ្ញាបត្រមធ្យមសិក្សាទុតិយភូមិ ដែលបានប្រព្រឹត្តទៅនៅថ្ងៃទី១០ ខែសីហា ឆ្នាំ២០២៦ ចំពោះលទ្ធផលនៅខេត្តកំពង់ចាម សិស្សដែលបានប្រឡងជាប់មានរហូតដល់៨៥% គឺអត្រាជាប់លើសថ្នាក់ជាតិមួយភាគរយ ។
ជាការពិតសិស្សដែលជាប់និទ្ទេសA គឺមានភាពសប្បាយរីករាយ ហើយក្រៅពីនេះ គឺសប្បាយទាំងអស់ តែសិស្សដែលជាប់និទ្ទេសBទេ គឺជាអ្នកយំព្រោះតូចចិត្តមិនបានA ។
ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំមានប្រសាសន៍បន្តថា ចំពោះសិស្សដែលបានប្រឡងជាប់A B C គឺពូកែ តែអ្នកដែលជាប់និទ្ទេសA គឺពូកែគ្រប់មុខតែម្ដង។ ដូច្នេះ សិស្សដែលបានប្រលងជាប់ គឺបានជ្រើសរើស ដើម្បីសិក្សាបន្តនៅថ្នាក់ឧត្តមសិក្សារាជធានីភ្នំពេញ ឬបន្តការសិក្សានៅបរទេសដែលខ្លួនពេញចិត្ត ។
យោងតាមការសិក្សា សិស្សដែលបានប្រឡងជាប់និទ្ទេសA គឺដោយសារគេមានIQខ្ពស់ មិនមែនតែមានបញ្ញាមួយមុខទេ គឺសំខាន់ការខិតខំសិក្សាព្យាយាមបង្រៀនសូត្របន្ថែមទៀត ។
សម្រាប់ជាបទពិសោធន៍កន្លងទៅ មានសិស្សម្នាក់ដែលបានប្រឡងធ្លាក់ តែគាត់បានប្រឹងប្រែងសិក្សារហូតទទួលបានលទ្ធផលប្រឡងដែលចេញមកបាននិទ្ទេសA ដែលនេះពិតជាមោទនភាពណាស់ ។ តាមការកត់សំគាល់ នៅវិទ្យាល័យព្រះសីហនុ ក្រុងកំពង់ចាម តាំងពីសម័យមុនមកដល់ពេលនេះ គឺអ្នកដែលមានចំណេះដឹងច្រើនជាបញ្ញវន្តទទួលបានចំណេះដឹងខ្ពង់ខ្ពស់ចេញពីខេត្តកំពង់ចាម ដោយមានបម្រើការងារតាមក្រសួងស្ថាប័ននានាក្នុងជួររាជរដ្ឋាភិបាលកម្ពុជា ។
សូម្បីតែរូបលោក (ហង់ ជួនណារ៉ុន) ធ្លាប់បានរស់នៅក្នុងទឹកដីខេត្តកំពង់ចាម គ្រាដែលស្រុកទេសកើតសង្គ្រាមកាលពីអតីតកាល ក្រោយមក ពេលដែលប្រទេសជាតិត្រូវបានរំដោះក្រោយឆ្នាំ១៩៧៩ រូបលោកបានរៀនសូត្រទទួលបានចំណេះដឹងខ្ពស់រហូតក្លាយជារដ្ឋមន្ត្រីក្រសួងអប់រំ ។
រដ្ឋមន្ត្រីក្រសួងអប់រំបានបញ្ជាក់ថា ប្រទេសជប៉ុនដែលជាមិត្តរបស់កម្ពុជា បានផ្ដល់ជំនួយឥតសំណងជាហូរហែកន្លងមក មានទឹកប្រាក់ប្រមាណ៣០លានដុល្លារ ក្នុងការលើកកម្ពស់វិស័យអប់រំនៅកម្ពុជា ។
ដោយមើលឃើញពីការរីកចម្រើនបែបនេះហើយ ត្រូវបានរដ្ឋាភិបាលជប៉ុនបន្តជួយឧបត្ថម្ភទឹកប្រាក់៧លានដុល្លារបន្ថែមទៀត ដើម្បីប្រែក្លាយសាលាគរុកោសល្យខេត្តកំពង់ចាមទៅជាវិទ្យាស្ថានគរុកោសល្យកំពង់ចាម ។
ចែករំលែកព័តមាននេះ