ខេត្តព្រះសីហនុ ៖ យុវជន៣នាក់ដែលជាប់សង្ស័យពីបទលួចដោយប្រើហិង្សាបានត្រូវ សមត្ថកិច្ចឃាត់ខ្លួនកាលពីថ្ងៃទី៨ សីហា នៅក្រុមទី៨ ភូមិ៣ សង្កាត់លេខ៣ ក្រុងព្រះសីហនុ ។ លោកម៉េង ចន្ថា អធិការរងនគរបាលក្រុងព្រះសីហនុបានឱ្យដឹងថា យុវជនទាំង៣នាក់នេះ គឺជាក្រុមលួច និងវាយអ្នកដទៃយកលុយប្រចាំភូមិថ្មី
ខេត្តព្រះសីហនុ ៖ យុវជន៣នាក់ដែលជាប់សង្ស័យពីបទលួចដោយប្រើហិង្សាបានត្រូវសមត្ថកិច្ចឃាត់ខ្លួនកាលពីថ្ងៃទី៨ សីហា នៅក្រុមទី៨ ភូមិ៣ សង្កាត់លេខ៣ ក្រុងព្រះសីហនុ ។ លោកម៉េង ចន្ថា អធិការរងនគរបាលក្រុងព្រះសីហនុបានឱ្យដឹងថា យុវជនទាំង៣នាក់នេះ គឺជាក្រុមលួច និងវាយអ្នកដទៃយកលុយប្រចាំភូមិថ្មីជាយូរមកហើយ តែខាងសមត្ថកិច្ចពុំមានភស្ដុតាងក្នុងការចោទប្រកាន់បាន។
យុវជនទាំង៣នាក់នេះមាន ១-ឈ្មោះង៉ែត រ៉ូ ហៅការ៉ូ ភេទប្រុស អាយុ១៩ឆ្នាំ ជាកម្មករសំណង់ មានទីលំនៅក្រុមទី១១ ភូមិ៣ សង្កាត់លេខ៣ ក្រុងព្រះសីហនុ ២-ឈ្មោះអ៊ុន វិចិត្រ ភេទប្រុស អាយុ២០ឆ្នាំ ជាកម្មករសំណង់ មានទីលំនៅក្រុមទី១១ ភូមិ៣ សង្កាត់លេខ៣ ក្រុងព្រះសីហនុ និង៣-ឈ្មោះម៉ា អៀ ភេទប្រុស អាយុ២២ឆ្នាំ មុខរបររត់តុនៅហាងម្លប់ជ្រៃ មានទីលំនៅក្រុមទី១ ភូមិ៣ សង្កាត់លេខ៣ ក្រុងព្រះសីហនុ។
លោកម៉េង ចន្ថា បន្ដទៀតថា នៅថ្ងៃទី៧ ខែសីហា ឆ្នាំ២០១១ វេលាម៉ោង២រំលងអធ្រាត្រ នៅចំណុចចុងភូមិថ្មី ក្រុមទី៨ ភូមិ៣ សង្កាត់លេខ៣ ក្រុងព្រះសីហនុ ជនសង្ស័យមានគ្នាចំនួន៣នាក់ បានធ្វើសកម្មភាពវាយជនរងគ្រោះឈ្មោះហុង សុង ភេទប្រុស អាយុ២៥ឆ្នាំ មុខរបរធ្វើចុងភៅ មានទីលំនៅបណ្ដោះអាសន្នក្រុមទី១១ ភូមិ៣ សង្កាត់លេខ៣ ក្រុងព្រះសីហនុ ក្នុងខណៈពេលដែលជនរងគ្រោះដើរទៅធ្វើការដោយវាយដណ្ដើមយកទូរស័ព្ទ១គ្រឿងម៉ាកណូគា(ចាស់) ពណ៌ខ្មៅលាយក្រហម និងលុយចំនួន៥៣.០០០រៀល។ ពេលធ្វើសកម្មភាពរួច ជនសង្ស័យទាំង៣នាក់បានរត់គេចខ្លួនបាត់ទៅ លុះដល់ថ្ងៃទី៩ ខែសីហា ឆ្នាំ២០១១ វេលាម៉ោង៨ សមត្ថកិច្ចបានធ្វើការស្រាវជ្រាវឃាត់ខ្លួនជនសង្ស័យចំនួន៣នាក់ដែលមានឈ្មោះដូចខាងលើនាំមកកាន់អធិការដ្ឋាននគរបាលក្រុងព្រះសីហនុ ដើម្បីធ្វើការសាកសួរ ។
តាមការបំភ្លឺរបស់ដើមបណ្ដឹងឈ្មោះហុង សុង បានឱ្យដឹងថា នៅយប់នោះ ខណៈគាត់ដើរចេញពីផ្ទះនៅម្ដុំភូមិថ្មីទៅធ្វើចុងភៅនៅសណ្ឋាគារហ្គោលដិនស៊ី ក៏មានឈ្មោះការ៉ូ និងបក្សពួក២នាក់ទៀតមិនស្គាល់ឈ្មោះដើរតាមពីក្រោយ។ ពេលគាត់ដើរដល់ចំណុចកើតហេតុ ចន្លោះលូទឹក និងដើមស្វាយ១ដើម ស្ថិតក្នុងក្រុមទី៨ ភូមិ៣ សង្កាត់លេខ៣ ជនទាំង៣នាក់់ បានធ្វើសកម្មភាព ដោយទះកំផ្លៀងគាត់១ដៃ ហើយឈ្មោះការ៉ូ ក៏ស្ទុះទៅចាប់ក្រៀក.ក និងបោចសក់គាត់ ហើយសម្លុតប្លន់ និងបានលូកហោប៉ៅខោយកលុយចំនួន៥៣.០០០រៀល និងលូកហោប៉ៅអាវ យកទូរស័ព្ទដៃ១គ្រឿងម៉ាកណូគា។ ពេលធ្វើសកម្មភាពរួចហើយ ជនទាំង៣នាក់នោះ ក៏ដើរត្រឡប់ក្រោយវិញបាត់ទៅ ចំណែករូបគាត់ក៏ដើរទៅមុខកំពង់ផែខ្ចីទូរស័ព្ទគេរួចនិយាយទៅប្រាប់បងប្រុសឱ្យមកឌុបទៅប្ដឹងសមត្ថកិច្ចនៅប៉ុស្ដិ៍ប្រជាការពារភូមិថ្មី ពីហេតុការណ៍ខាងលើ ។
ចំណែកតាមការឆ្លើយរបស់ចុងបណ្ដឹងឈ្មោះង៉ែត រ៉ូ ហៅការ៉ូ ពេលសួរលើកទី១ មិនបានសារភាពទេ។ លុះសមត្ថកិច្ចយើងសួរលើកទី២ ទើបបានឆ្លើយសារភាព៕
ចែករំលែកព័តមាននេះ