ចំណេះដឹង៖ យោងតាមការចុះផ្សាយពីប្រភពបរទេស នៅពេលថ្ងៃឈប់សម្រាក ឪពុកម្តាយជាច្រើនចង់ផ្តល់ភាពសប្បាយរីករាយដល់កូន តាមរយៈការនាំដើរលេង ទិញអំណោយ ឬរៀបចំអាហារឆ្ងាញ់ៗ។ ប៉ុន្តែសម្រាប់កុមារ អ្វីដែលមានតម្លៃជាងគេ មិនមែនជារបស់ថ្លៃៗទេ ប៉ុន្តែជាពេលវេលា ការស្តាប់ និងការយកចិត្តទុកដាក់ពីឪពុកម្តាយ។

ពេលទី១ គឺ ពេលជួបជុំញ៉ាំអាហារជាមួយគ្រួសារ។ ជំនួសឱ្យការចំណាយពេលមើលទូរស័ព្ទ ឬរវល់ជាមួយការងារ ឪពុកម្តាយគួរចូលរួមនិយាយ និងស្តាប់កូន។ ពេលវេលាដ៏សាមញ្ញនេះអាចធ្វើឱ្យកូនមានអារម្មណ៍ថា ខ្លួនមានសារៈសំខាន់សម្រាប់គ្រួសារ។

ពេលទី២ គឺ នៅពេលកូនរំភើបចង់ប្រាប់រឿងមួយទៅឪពុកម្តាយ។ ទោះជារឿងតូចតាចក៏ដោយ ការបញ្ឈប់ការងារមួយភ្លែត ហើយស្តាប់កូនដោយយកចិត្តទុកដាក់ អាចមានន័យយ៉ាងខ្លាំង។ ប្រសិនបើកូនតែងតែទទួលបានការឆ្លើយតបបែបមិនអើពើ ពួកគេអាចលែងចង់ចែករំលែករឿងរ៉ាវរបស់ខ្លួននៅពេលក្រោយ។

ពេលទី៣ គឺ នៅពេលកូនមានអារម្មណ៍សោកសៅ ខឹង ឬខកចិត្ត។ ក្នុងថ្ងៃឈប់សម្រាក ក៏មិនមែនមានន័យថាកូនត្រូវតែសប្បាយគ្រប់ពេលនោះទេ។ ជំនួសឱ្យការស្តីបន្ទោស ឬប្រាប់ឱ្យឈប់យំ ឪពុកម្តាយគួរអង្គុយក្បែរកូន ស្តាប់អារម្មណ៍របស់ពួកគេ និងជួយឱ្យកូនយល់ពីអ្វីដែលខ្លួនកំពុងមានអារម្មណ៍។

ជាចុងក្រោយ អ្វីដែលកូនចងចាំបានយូរ មិនចាំបាច់ជាអំណោយថ្លៃៗ ឬដំណើរកម្សាន្តធំៗឡើយ។ ពេលខ្លះ ការចំណាយពេលស្តាប់កូនពីរបីនាទី ការញ៉ាំអាហារជាមួយគ្នា ឬការឱបកូននៅពេលពួកគេមិនសប្បាយចិត្ត អាចមានតម្លៃជាងអ្វីៗទាំងអស់។ ​ការនៅក្បែរទាំងផ្លូវកាយ និងផ្លូវអារម្មណ៍ គឺជាអំណោយដ៏មានតម្លៃបំផុតសម្រាប់កូន៕